1 * 2 * 3 * 4

---

ДИАКОН: Елицы оглашеннии, изыдите: оглашеннии, изыдите: елицы оглашеннии, изыдите: да никто от оглашенных, елицы вернии, паки и паки миром Господу помолимся.
НАРОД: Господи, помилуй.
ДИАКОН: Заступи, спаси, помилуй и сохрани нас, Боже, Твоею благодатию.
НАРОД: Господи, помилуй.
ДИАКОН: Премудрость.
ПРЕСВИТЕР: Благодарим Тя, Господи Боже сил, сподобившаго нас предстати и ныне святому Твоему Жертвеннику и припасти ко щедротам Твоим о наших гресех и о людских неведениих: приими, Боже, моление наше, сотвори ны достойны быти, еже приносити Тебе моления и мольбы, и жертвы безкровныя о всех людех Твоих: и удовли нас, ихже положил еси в службу Твою сию, силою Духа Твоего Святаго, неосужденно и непреткновенно, в чистем свидетельстве совести нашея, призывати Тя на всякое время и место: да послушая нас, милостив нам будеши, во множестве Твоея благости. Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
НАРОД: Аминь.
ДИАКОН: Паки и паки миром Господу помолимся.
НАРОД: Господи, помилуй.
ДИАКОН: Заступи, спаси, помилуй и сохрани нас, Боже, Твоею благодатию.
НАРОД: Господи, помилуй.
ДИАКОН: Премудрость.
ПРЕСВИТЕР: Паки, и многажды Тебе припадаем, и Тебе молимся, Благий и Человеколюбче, яко да призрев на моление наше, очистиши наша душы и телеса от всякия скверны плоти и духа, и даси нам неповинное и неосужденное предстояние святаго Твоего Жертвенника. Даруй же, Боже, и молящымся с нами преспеяние жития и веры и разума духовнаго: даждь им всегда со страхом и любовию служащым Тебе, неповинно и неосужденно причаститися святых Твоих Таин, и Небеснаго Твоего Царствия сподобитися. Яко да под Державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.
НАРОД: Аминь (протяжно).
(Таже, Херувимской песни от певцев певаемой, ИЕРЕЙ кадит святую Трапезу окрест, и олтарь весь, и иконостас, лик и людей, глаголя 50й псалом, и тропари покаянныя, сколько изволит. Таже глаголет тайно молитву сию: )
Никтоже достоин от связавшихся плотскими похотьми и сластьми приходити, или приближитися, или служити Тебе, Царю Славы: еже бо служити Тебе, велико и страшно и самем небесным силам. Но обаче, неизреченнаго ради и безмернаго Твоего человеколюбия, непреложно и неизменно был еси Человек, и Архиерей нам был еси, и служебныя сея и безкровныя жертвы священнодействие предал еси нам, яко Владыка всех: Ты бо един, Господи Боже наш, владычествуеши небесными и земными, иже на престоле херувимстем Носимый, иже серафимов Господь и Царь Израилев, иже един Свят и во святых почиваяй. Тя убо молю единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей Трапезе и священнодействовати святое и пречистое Твое Тело и честную Кровь: к Тебе бо прихожду, приклонь мою выю, и молю Ти ся, да не отвратиши лица Твоего от мене, ниже отринеши мя от отрок Твоих, но сподоби принесенным Тебе быти, мною грешным и недостойным рабом Твоим, даром сим: Ты бо еси Приносяй и Приносимый, и Приемляй и Раздаваемый, Христе Боже наш, и Тебе славу возсылаем со Безначальным Твоим Отцем, и Пресвятым, и Благим, и Животворящим Твоим Духом, ныне и присно и во веки веков. Аминь. Иже херувимы тайно образующе и Животворящей Троице Трисвятую песнь припевающе, всякое ныне житейское отложим попечение. Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа. (трижды: на каждое воздевая руки, по каждом же скончании, покланяется единожды. Таже отходит в предложение и кадит ИЕРЕЙ святая, в себе моляся: ) Боже, очисти мя грешнаго.
( взяв воздУх, возлагает на левое плечо, глаголя: ) Возмите руки ваша во святая и благословите Господа.
(И, взяв вятые Дары, выходят северными дверьми, из алтаря на солею: )
ДИАКОН:Великаго Господина и Отца нашего Алексия, святейшаго Патриарха Московскаго и всея Руси, и Господина нашего преосвященнейшаго имярек , епископа (...) , да помянет Господь Бог во Царствии Своем, всегда, ныне и присно, и во веки веков.
ПРЕСВИТЕР: Преосвященныя митрополиты, архиепископы и епископы, и весь священнический и монашеский чин, и причет святаго храма сего, вас и всех православных христиан да помянет Господь Бог во Царствии Своем, всегда, ныне и присно, и во веки веков.
НАРОД: Аминь. (И допевает оставшуюся часть Херувимской - от "яко да Царя").
(Вшед же внутрь святых дверей, ИЕРЕЙ глаголет: ) Помяни мя, Господи, егда приидеши во Царствии Твоем.
(И поставляет святый потир на святую Трапезу, святый же дискос поставляет, глаголя:) Благообразный Иосиф, с древа снем пречистое Тело Твое, плащаницею чистою обвив, и благоуханьми во гробе нове закрыв положи. Во гробе плотски, во аде же с душею яко Бог, в Раи же с разбойником, и на Престоле был еси, Христе, со Отцем и Духом, вся Исполняяй Неописанный. Яко Живоносец, яко Рая краснейший, воистинну и чертога всякаго царскаго показася светлейший, Христе, гроб Твой, источник нашего Воскресения.
(Таже покровцы взем от священнаго дискоса, и святаго потира, полагает на единей стране святыя Трапезы, взяв же воздух и окадив, покрывает им Святая, глаголя: ) Благообразный Иосиф, с древа снем пречистое Тело Твое, плащаницею чистою обвив, и благоуханьми во гробе нове закрыв положи.
(И приемь кадильницу, кадит Святая трижды, глаголя:) Ублажи, Господи, благоволением Твоим Сиона, и да созиждутся стены Иерусалимския: тогда благоволиши жертву правды, возношение и всесожегаемая, тогда возложат на олтарь Твой тельцы.
(И глаголет диакону): Помяни мя, брате и сослужителю
ДИАКОН: Да помянет Господь Бог священство твое во Царствии Своем. Помолися о мне, владыко святый.
ПРЕСВИТЕР: Дух Святый найдет на тя, и сила Вышняго осенит тя.
ДИАКОН: Тойже Дух содействует нам вся дни живота нашего. Помяни мя, владыко святый.
ПРЕСВИТЕР: Да помянет тя Господь Бог во Царствии Своем, всегда, ныне и присно и во веки веков.
ДИАКОН: Аминь. (громко:) Исполним молитву нашу Господеви.
НАРОД: Господи, помилуй (на каждое прошение)
- О предложенных честных Дарех Господу помолимся.
- О святем храме сем, и с верою, благоговением и страхом Божиим входящих во нь, Господу помолимся.
- О избавитися нам от всякия скорби, гнева и нужды, Господу помолимся.
- Заступи, спаси, помилуй и сохрани нас, Боже, Твоею благодатию.
- Дне всего совершенна, свята, мирна и безгрешна, у Господа просим.
НАРОД: Подай, Господи (на каждое прошение)
- Ангела мирна, верна наставника, хранителя душ и телес наших, у Господа просим.
- Прощения и оставления грехов и прегрешений наших, у Господа просим.
- Добрых и полезных душам нашым и мира мирови, у Господа просим.
- Прочее время живота нашего в мире и покаянии скончати, у Господа просим.
- Христианския кончины живота нашего, безболезненны, непостыдны, мирны, и добраго ответа на Страшнем Судищи Христове, просим.
- Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
НАРОД: Тебе, Господи.
ПРЕСВИТЕР: Господи Боже Вседержителю, Едине Святе, приемляй жертву хваления от призывающих Тя всем сердцем, приими и нас грешных моление, и принеси ко святому Твоему Жертвеннику, и удовли нас приносити Тебе дары же и жертвы духовныя о наших гресех и о людских неведениих: и сподоби нас обрести благодать пред Тобою, еже быти Тебе благоприятней жертве нашей, и вселитися Духу благодати Твоея Благому в нас, и на предлежащих Дарех сих, и на всех людех Твоих. Щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.
НАРОД: Аминь.
ПРЕСВИТЕР: Мир всем.
НАРОД: И духови твоему.
ПРЕСВИТЕР: Возлюбим друг друга, да единомыслием исповемы
НАРОД: Отца и Сына и Святаго Духа, Троицу Единосущную и Нераздельную.
(ПРЕСВИТЕР покланяется трижды, глаголя тайно: ) Возлюблю Тя, Господи, крепосте моя, Господь утверждение мое и прибежище мое. (Трижды.И целует Святая сверху покровения, сначала верх святаго дискоса, затем верх святаго потира, и край святыя Трапезы пред собою. Если же будет священников двое или более, то и они целуют Святая вси, и друг друга в рамена. Настоятель же глаголет: "Христос посреде нас" И отвещает целовавый: "И есть, и будет" (От Пасхи до её отдания: "Христос воскресе"- "Воистину воскресе") Также и народ приветствует друг друга)
ДИАКОН: Двери, двери, премудростию вонмем.
(ПРЕСВИТЕР воздвизает воздух, и держит над святыми Дарами, потрясающе и глаголюще к себе, вместе с НАРОДОМ, исповедание веры:)
Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, иже от Отца Рожденнаго прежде всех век: Света от Света, Бога Истинна от Бога Истинна, Рожденна, Несотворенна, Единосущна Отцу, Имже вся быша. Нас ради человек и нашего ради спасения Сшедшаго с Небес, и Воплотившагося от Духа Свята и Марии Девы, и Вочеловечшася. Распятаго же за ны при Понтийстем Пилате, и Страдавша, и Погребенна. И Воскресшаго в третий день по Писанием. И Возшедшаго на Небеса, и Седяща одесную Отца. И паки Грядущаго со славою, судити живым и мертвым, Егоже Царствию не будет конца. И в Духа Святаго, Господа, Животворящаго, иже от Отца Исходящаго, иже со Отцем и Сыном Спокланяема и Сславима, Глаголавшаго пророки. Во едину Святую Соборную и Апостольскую Церковь. Исповедую едино Крещение, во оставление грехов. Чаю воскресения мертвых: И жизни будущаго века. Аминь. (Иерей убо, взем воздУх от Святых и целовав его, полагает на едино место.)