<55>1

1 Первое убо слово сотворих о всeх, о! феофиле, яже начат Иисус творити же и учити

2 даже до дне, в оньже, заповeдав апостолом Духом святым, ихже избра, вознесеся:

3 пред нимиже и постави себе жива по страдании своем во мнозeх истинных знамениих, деньми четыредесятьми являяся им и глаголя яже о царствии Божии:

4 с нимиже и ядый повелe им от иерусалима не отлучатися, но ждати обeтования Отча, еже слышасте от мене:

5 яко иоанн убо крестил есть водою, вы же имате креститися Духом святым не по мнозeх сих днех.

6 Они же убо сошедшеся вопрошаху его, глаголюще: Господи, аще в лeто сие устрояеши царствие Израилево?

7 Рече же к ним: нeсть ваше разумeти времена и лeта, яже Отец положи во своей власти:

8 но приимете силу, нашедшу святому Духу на вы, и будете ми свидeтелие во иерусалимe же и во всей иудеи и самарии и даже до послeдних земли.

9 И сия рек, зрящым им взятся, и облак подят его от очию их.

10 И егда взирающе бяху на небо, идущу ему, и се, мужа два стаста пред ними во одежди бeлe,

11 яже и рекоста: мужие галилейстии, что стоите зряще на небо? сей Иисус, вознесыйся от вас на небо, такожде приидет, имже образом видeсте его идуща на небо.

12 Тогда возвратишася во иерусалим от горы нарицаемыя елеон, яже есть близ иерусалима, субботы имущия путь.

13 И егда внидоша, взыдоша на горницу, идeже бяху пребывающе, петр же и иаков, и иоанн и андрей, филипп и фома, варфоломей и матфей, иаков алфеов и симон зилот и иуда иаковль:

14 сии вси бяху терпяще единодушно в молитвe и молении, с женами и мариею материю Иисусовою и с братиею его.

15 И во дни тыя востав петр посредe ученик, рече,

16 бe же имен народа вкупe яко сто и двадесять: мужие братие, подобаше скончатися писанию сему, еже предрече Дух святый усты давидовыми о иудe, бывшем вожди емшым Иисуса:

17 яко причтен бe с нами и приял бяше жребий службы сея:

18 сей убо стяжа село от мзды неправедныя, и ниц быв просeдеся посредe, и излияся вся утроба его:

19 и разумно бысть всeм живущым во иерусалимe, яко нарещися селу тому своим их языком акелдама, еже есть село крове:

20 пишется бо в книзe псаломстeй: да будет двор его пуст, и да не будет живущаго в нем, и епископство его да приимет ин:

21 подобает убо от сходившихся с нами мужей во всяко лeто, в неже вниде и изыде в нас Господь Иисус,

22 начен от крещения иоаннова даже до дне, в оньже вознесеся (на небо) от нас, свидeтелю воскресeния его быти с нами единому от сих.

23 И поставиша два, иосифа нарицаемаго варсаву, иже наречен бысть иуст, и матфиа,

24 и помолившеся рeша: ты, Господи, срдцевeдче всeх, покажи, егоже избрал еси от сею двою единаго,

25 прияти жребий служения сего и апостолства, из негоже испаде иуда, ити в мeсто свое.

26 И даша жребия има, и паде жребий на матфиа, и причтен бысть ко единонадесяти апостолом.

<55>2

1 И егда скончавашася дние пятьдесятницы, бeша вси апостоли единодушно вкупe.

2 И бысть внезапу с небесе шум, яко носиму дыханию бурну, и исполни весь дом, идeже бяху сeдяще:

3 и явишася им раздeлени языцы яко огненни, сeде же на единeм коемждо их.

4 И исполнишася вси Духа свята и начаша глаголати иными языки, якоже Дух даяше им провeщавати.

5 Бяху же во иерусалимe живущии иудее, мужие благоговeйнии, от всего языка, иже под небесем.

6 Бывшу же гласу сему, снидеся народ и смятеся, яко слышаху един кийждо их своим языком глаголющих их.

7 Дивляхуся же вси и чудяхуся, глаголюще друг ко другу: не се ли, вси сии суть глаголющии галилеане?

8 и како мы слышим кийждо свой язык наш, в немже родихомся,

9 парфяне и мидяне и еламите, и живущии в месопотамии, во иудеи же и каппадокии, в понтe и во асии,

10 во фригии же и памфилии, во египтe и странах ливии, яже при киринии, и приходящии римляне, иудее же и пришелцы,

11 критяне и аравляне, слышим глаголющих их нашими языки величия Божия?

12 Ужасахуся же вси и недоумeвахуся, друг ко другу глаголюще: что убо хощет сие быти?

13 Инии же ругающеся глаголаху, яко вином исполнени суть.

14 Став же петр со единонадесятьми, воздвиже глас свой и рече им: мужие иудейстии и живущии во иерусалимe вси, сие вам разумно да будет, и внушите глаголы моя:

15 не бо, якоже вы непщуете, сии пияни суть, есть бо час третий дне:

16 но сие есть рeченное пророком иоилем:

17 и будет в послeдния дни, глаголет Господь, излию от Духа моего на всяку плоть, и прорекут сынове ваши и дщери вашя, и юноши ваши видeния узрят, и старцы ваши сония видят:

18 ибо на рабы моя и на рабыни моя во дни оны излию от Духа моего, и прорекут:

19 и дам чудеса на небеси горe и знамения на земли низу, кровь и огнь и курение дыма:

20 солнце преложится во тму, и луна в кровь, прежде даже не приити дню Господню великому и просвeщенному:

21 и будет, всяк, иже аще призовет имя Господне, спасется.

22 Мужие Израилстии, послушайте словес сих: Иисуса назореа, мужа от Бога извeствованна в вас силами и чудесы и знамении, яже сотвори тeм Бог посредe вас, якоже и сами вeсте,

23 сего нарекованным совeтом и проразумeнием Божиим предана приемше, руками беззаконных пригвождше убисте:

24 егоже Бог воскреси, разрeшив болeзни смертныя, якоже не бяше мощно держиму быти ему от нея.

25 Давид бо глаголет о нем: предзрeх Господа предо мною выну, яко о десную мене есть, да не подвижуся:

26 сего ради возвеселися сердце мое, и возрадовася язык мой: еще же и плоть моя вселится на уповании,

27 яко не оставиши души моея во адe, ниже даси прпдбному твоему видeти истлeния:

28 сказал ми еси пути живота: исполниши мя веселия с лицем твоим.

29 Мужие братие, достоит рещи с дерзновением к вам о патриарсe давидe, яко и умре и погребен бысть, и гроб его есть в нас даже до дне сего:

30 пророк убо сый и вeдый, яко клятвою клятся ему Бог от плода чресл его по плоти воздвигнути Христа и посадити его на престолe его,

31 предвидeв глагола о воскресeнии Христовe, яко не оставися душа его во адe, ни плоть его видe истлeния.

32 Сего Иисуса воскреси Бог, емуже вси мы есмы свидeтелие.

33 Десницею убо Божиею вознесеся, и обeтование святаго Духа приемь от Отца, излия сие, еже вы нынe видите и слышите.

34 Не бо давид взыде на небеса, глаголет бо сам: рече Господь Господеви моему: сeди о десную мене,

35 дондеже положу враги твоя подножие ног твоих.

36 Твердо убо да разумeет весь дом Израилев, яко и Господа и Христа его Бог сотворил есть, сего Иисуса, егоже вы распясте.

37 Слышавше же умилишася сердцем и рeша к петру и прочым апостолом: что сотворим, мужие братие?

38 Петр же рече к ним: покайтеся, и да крестится кийждо вас во имя Иисуса Христа во оставление грeхов: и приимете дар святаго Духа:

39 вам бо есть обeтование и чадом вашым и всeм дальним, елики аще призовет Господь Бог наш.

40 И иными словесы множайшими засвидeтелствоваше и моляше я, глаголя: спаситеся от рода строптиваго сего.

41 Иже убо любезно прияша слово его, крестишася: и приложишася в день той душ яко три тысящы:

42 бяху же терпяще во учении апостол и во общении и в преломлении хлeба и в молитвах.

43 Бысть же на всякой души страх: многа бо чудеса и знамения апостолы быша во иерусалимe.

43 Страх же велий бяше на всeх их. Вси же вeровавшии бяху вкупe и имяху вся обща:

45 и стяжания и имeния продаяху, и раздаяху всeм, егоже аще кто требоваше:

46 по вся же дни терпяще единодушно в церкви и ломяще по домом хлeб, приимаху пищу в радости и в простотe сердца,

47 хваляще Бога и имуще благодать у всeх людий. Господь же прилагаше по вся дни церкви спасающыяся.

<55>3

1 Вкупe же петр и иоанн восхождаста во святилище на молитву в час девятый.

2 И нeкий муж, хром от чрева матере своея сый, носимь бываше, егоже полагаху по вся дни пред дверьми церковными, рекомыми красными, просити милостыни от входящих в церковь:

3 иже видeв петра и иоанна хотящыя внити в церковь, прошаше милостыни.

4 воззрeв же петр нань со иоанном, рече: воззри на ны.

5 Он же прилeжаше има, мня нeчто от нею прияти.

6 Рече же петр: сребра и злата нeсть у мене, но еже имам, сие ти даю: во имя Иисуса Христа назореа востани и ходи.

7 И емь его за десную руку воздвиже: абие же утвердистeся его плеснe и глезнe,

8 и вскочив ста и хождаше, и вниде с нима в церковь, ходя и скачя и хваля Бога.

9 И видeша его вси людие ходяща и хваляща Бога,

10 знаху же его, яко сей бяше, иже милостыни ради сeдяше при красных дверех церковных: и исполнишася чуда и ужаса о приключившемся ему.

11 Держащужеся исцeлeвшему хромому петра и иоанна, притекоша к нима вси людие в притвор, нарицаемый соломонов, ужасни.

12 Видeв же петр отвeщаваше к людем: мужие Израилтяне, что чудитеся о сем, или на ны что взираете, яко своею ли силою или благочестием сотворихом его ходити?

13 Бог авраамов и исааков и иаковль, Бог отец наших, прослави отрока своего Иисуса, егоже вы предасте, и отвергостеся его пред лицем пилатовым, суждьшу оному пустити:

14 вы же святаго и првднаго отвергостеся, и испросисте мужа убийцу дати вам,

15 началника же жизни убисте: егоже Бог воскреси от мертвых, емуже мы свидeтелие есмы.

16 И о вeрe имене его, сего, егоже видите и знаете, утверди имя его: и вeра, яже его ради, даде ему всю цeлость сию пред всeми вами.

17 И нынe, братие, вeм, яко по невeдeнию сие сотвористе, якоже и князи ваши:

18 Бог же, яже предвозвeсти усты всeх пророк своих пострадати Христу, исполни тако.

19 Покайтеся убо и обратитеся, да очиститеся от грeх ваших,

20 яко да приидут времена прохладна от лица Господня, и послет пронарeченнаго вам Христа Иисуса,

21 егоже подобает небеси убо прияти даже до лeт устроения всeх, яже глагола Бог усты всeх святых своих пророк от вeка.

22 Моисей убо ко отцем рече: яко пророка вам воздвигнет Господь Бог ваш от братии вашея, яко мене: того послушайте по всему, елика аще речет к вам:

23 будет же, всяка душа, яже аще не послушает пророка онаго, потребится от людий.

24 И вси же пророцы от самуила и иже по сих, елицы глаголаша, такожде предвозвeстиша дни сия.

25 Вы есте сынове пророк и завeта, егоже завeща Бог ко отцем вашым, глаголя ко аврааму: и о сeмени твоем возблагословятся вся отечествия земная.

26 Вам первeе Бог, воздвигий отрока своего Иисуса, посла его благословяща вас, во еже отвратитися вам комуждо от злоб ваших.

<55>4

1 Глаголющым же им к людем, наидоша на них священницы и воевода церковный и саддукее,

2 жаляще си, за еже учити им люди и возвeщати о Иисусe воскресeние мертвых:

3 и возложиша на них руки и положиша их в соблюдение до утрия: бe бо вечер уже.

4 Мнози же от слышавших слово вeроваша: и бысть число мужей яко тысящ пять.

5 Бысть же наутрие собратися князем их и старцем и книжником во иерусалим,

6 и аннe архиерею и каиафe и иоанну и александру, и елицы бeша от рода архиерейска:

7 и поставльше их посредe, вопрошаху: коею силою или коим именем сотвористе сие вы?

8 Тогда петр, исполнився Духа свята, рече к ним: князи людстии и старцы Израилевы,

9 аще мы днесь истязуеми есмы о благодeянии человeка немощна, о чесом сей спасеся,

10 разумно буди всeм вам и всeм людем Израилевым, яко во имя Иисуса Христа назореа, егоже вы распясте, егоже Бог воскреси от мертвых, о сем сей стоит пред вами здрав:

11 сей есть камень укореный от вас зиждущих, бывый во главу угла, и нeсть ни о единeм же инeм спасeния:

12 нeсть бо иного имене под небесем, даннаго в человeцeх, о немже подобает спастися нам.

13 Видяще же петрово дерзновение и иоанново и разумeвше, яко человeка некнижна еста и проста, дивляхуся, знаху же их, яко со Иисусом бeста:

14 видяще же исцeлeвшаго человeка с нима стояща, ничтоже имяху противу рещи.

15 Повелeвше же има вон из сонмища изыти, стязахуся друг со другом,

16 глаголюще: что сотворим человeкома сима? яко убо нарочитое знамение бысть има, всeм живущым во иерусалимe явe, и не можем отврещися:

17 но да не болeе прострется в людех, прещением да запретим има ктому не глаголати о имени сем ни единому от человeк.

18 И призвавше их, заповeдаша има отнюд не провeщавати ниже учити о имени Иисусовe.

19 Петр же и иоанн отвeщавша к ним рeста: аще првдно есть пред Богом вас послушати паче, нежели Бога, судите:

20 не можем бо мы, яже видeхом и слышахом, не глаголати.

21 Они же призапрещше има, пустиша я, ничтоже обрeтше како мучити их, людий ради, яко вси прославляху Бога о бывшем:

22 лeт бо бяше множае четыредесяти человeк той, на немже бысть чудо сие исцeления.

23 Отпущена же бывша приидоста ко своим и возвeстиста, елика к нима архиерее и старцы рeша.

24 Они же слышавше единодушно воздвигоша глас к Богу и рекоша: влдко, ты, Боже, сотворивый небо и землю и море и вся, яже в них,

25 иже Духом святым усты отца нашего давида отрока твоего рекл еси: вскую шаташася языцы, и людие поучишася тщетным?

26 предсташа царие земстии, и князи собрашася вкупe на Господа и на Христа его.

27 Собрашася бо воистинну во градe сем на святаго отрока твоего Иисуса, егоже помазал еси, ирод же и понтийский пилат с языки и людьми Израилевыми,

28 сотворити, елика рука твоя и совeт твой преднарече быти:

29 и нынe, Господи, призри на прещения их и даждь рабом твоим со всяким дерзновением глаголати слово твое,

30 внегда руку твою прострети ти во исцeления, и знамением и чудесем бывати именем святым отрока твоего Иисуса.

31 И помолившымся им, подвижеся мeсто, идeже бяху собрани, и исполнишася вси Духа свята и глаголаху слово Божие со дерзновением.

32 Народу же вeровавшему бe сердце и душа едина, и ни един же что от имeний своих глаголаше свое быти, но бяху им вся обща.

33 И велиею силою воздаяху свидeтелство апостоли воскресeнию Господа Иисуса Христа, благодать же бe велия на всeх их.

34 Не бяше бо нищь ни един в них: елицы бо господие селом или домовом бяху, продающе приношаху цeны продаемых

35 и полагаху при ногах апостол: даяшеся же коемуждо, егоже аще кто требоваше.

36 Иосиа же, нарeченный варнава от апостол, еже есть сказаемо сын утeшения, левит, кипрянин родом,

37 имeя село, продав принесе цeну и положи пред ногами апостол.

<55>5

1 Муж же нeкий, ананиа именем, с сапфирою женою своею, продаде село

2 и утаи от цeны, свeдущей и женe его: и принес часть нeкую, пред ногами апостол положи.

3 Рече же петр: анание, почто исполни сатана сердце твое солгати Духу святому и утаити от цeны села?

4 сущее тебe не твое ли бe, и проданое не в твоей ли власти бяше? что яко положил еси в сердцы твоем вещь сию? не человeком солгал еси, но Богу.

5 Слышав же ананиа словеса сия, пад издше: и бысть страх велик на всeх слышащих сия.

6 Вставше же юноши взяша его и изнесше погребоша.

7 Бысть же яко трием часом минувшым, и жена его не вeдущи бывшаго вниде.

8 Отвeща же ей петр: рцы ми, аще на толицe село отдаста? Она же рече: ей, на толицe.

9 Петр же рече к ней: что яко согласистася искусити Духа Господня? се, ноги погребших мужа твоего при дверех, и изнесут тя.

10 Паде же абие пред ногама его и издше: вшедше же юноши обрeтоша ю мертву и изнесше погребоша близ мужа ея.

11 И бысть страх велик на всей церкви и на всeх слышаших сия.

12 Руками же апостолскими быша знамения и чудеса в людех многа: и бяху единодушно вси в притворe соломони:

13 от прочих же никтоже смeяше прилeплятися им, но величаху их людие.

14 Паче же прилагахуся вeрующии Господви, множество мужей же и жен,

15 яко и на стогны износити недужныя и полагати на постелех и на одрeх, да грядущу петру поне сeнь его осeнит нeкоего от них.

16 Схождашеся же и множество от окрестных градов во иерусалим, приносяще недужныя и страждущыя от дух нечистых, иже исцeлeвахуся вси.

17 Востав же архиерей и вси иже с ним, сущая ересь саддукейская, исполнишася зависти,

18 и возложиша руки своя на апостолы и послаша их в соблюдение общее.

19 Ангел же Господень нощию отверзе двери темницы, извед же их, рече:

20 идите и ставше глаголите в церкви людем вся глаголы жизни сея.

21 Слышавше же внидоша по утреницe (утро) в церковь и учаху. Пришед же архиерей и иже с ним, созваша собор и вся старцы от сынов Израилевых и послаша во узилище, привести их.

22 Слуги же шедше не обрeтоша их в темницe, возвращшежеся возвeстиша,

23 глаголюще, яко темницу убо обрeтохом заключену со всяким утверждением и блюстители стоящыя пред дверьми: отверзше же, внутрь ни единаго обрeтохом.

24 Якоже слышаша словеса сия архиерей же и воевода церковный и первосвященницы, недоумeвахуся о них, что убо будет сие.

25 Пришед же нeкто возвeсти им, глаголя, яко се, мужие, ихже всадисте в темницу, суть в церкви стояще и учаще люди.

26 Тогда шед воевода со слугами, приведе их не с нуждею, бояхуся бо людий, да не камением побиют их:

27 приведше же их, поставиша на сонмищи, и вопроси их архиерей, глаголя:

28 не запрещением ли запретихом вам не учити о имени сем? и се, исполнисте иерусалим учением вашим и хощете навести на ны кровь человeка сего.

29 Отвeщав же петр и апостоли рeша: повиноватися подобает Богови паче, нежели человeком:

30 Бог отец наших воздвиже Иисуса, егоже вы убисте, повeсивше на древe:

31 сего Бог началника и спаса возвыси десницею своею, дати покаяние Израилеви и оставление грeхов:

32 и мы есмы того свидeтелие глагол сих, и Дух святый, егоже даде Бог повинующымся ему.

33 Они же слышавше распыхахуся и совeщаша убити их.

34 Востав же нeкий на сонмищи фарисей, именем гамалиил, законоучитель честен всeм людем, повелe внe мало что апостолом уступити,

35 рече же к ним: мужие Израильтяне, внимайте себe о человeцeх сих, что хощете сотворити:

36 пред сими бо деньми воста февда, глаголя быти велика нeкоего себе, емуже прилeпишася числом мужей яко четыреста: иже убиен бысть, и вси, елицы повинушася ему, разыдошася и быша ни во чтоже:

37 по сем воста иуда галилеанин во дни написания и отвлече люди доволны вслeд себе: и той погибе, и вси, елицы послушаша его, разсыпашася:

38 и нынe, глаголю вам, отступите от человeк сих и оставите их: яко аще будет от человeк совeт сей или дeло сие, разорится,

39 аще ли же от Бога есть, не можете разорити то, да не како и Богоборцы обрящетеся.

40 Послушаша же его, и призвавше апостолы, бивше запретиша им не глаголати о имени Иисусовe и отпустиша их.

41 Они же убо идяху радующеся от лица собора, яко за имя Господа Иисуса сподобишася безчестие прияти:

42 по вся же дни в церкви и в домeх не престаяху учаще и благовeствующе Иисуса Христа.

<55>6

1 Во днех же сих, умножившымся учеником, бысть роптание еллинов ко евреом, яко презираемы бываху во вседневнeм служении вдовицы их.

2 Призвавше же дванадесять множество ученик, рeша: не угодно есть нам, оставльшым слово Божие, служити трапезам:

3 усмотрите убо, братие, мужы от вас свидeтелствованы седмь, исполнены Духа свята и премудрости, ихже поставим над службою сею:

4 мы же в молитвe и служении слова пребудем.

5 И угодно бысть слово сие пред всeм народом: и избраша стефана, мужа исполнена вeры и Духа свята, и филиппа, и прохора и никанора, и тимона и пармена, и николаа пришелца антиохийскаго,

6 ихже поставиша пред апостолы: и помолившеся возложиша на ня руцe.

7 И слово Божие растяше, и множашеся число ученик во иерусалимe зeло: мног же народ священников послушаху вeры.

8 Стефан же исполнь вeры и силы творяше знамения и чудеса велия в людех.

9 Восташа же нeцыи от сонма глаголемаго ливертинска и киринейска и александрска, и иже от киликии и асии, стязающеся со стефаном:

10 и не можаху противустати премудрости и духу, имже глаголаше.

11 Тогда подустиша мужы глаголющыя, яко слышахом его глаголюща глаголы хульныя на моисеа и на Бога.

12 Сподвигоша же люди и старцы и книжники, и нападше восхитиша его и приведоша на сонмище,

13 поставиша же свидeтели ложны глаголющыя, яко человeк сей не престает глаголы хульныя глаголя на мeсто святое сие и закон:

14 слышахом бо его глаголюща, яко Иисус назорей сей разорит мeсто сие и измeнит обычаи, яже предаде нам моисей.

15 И воззрeвше нань вси сeдящии в сонмищи, видeша лице его яко лице ангела.

<55>7

1 Рече же архиерей: аще убо сия тако суть?

2 Он же рече: мужие братие и отцы, послушайте. Бог славы явися отцу нашему аврааму сущу в месопотамии, прежде даже не вселитися ему в харрань,

3 и рече к нему: изыди от земли твоея и от рода твоего и от дому отца твоего, и прииди в землю, юже аще ти покажу.

4 Тогда изшед от земли халдейския, вселися в харрань: и оттуду, по умертвии отца его, пресели его в землю сию, на нейже вы нынe живете,

5 и не даде ему наслeдия в ней, ниже стопы ногу: и обeща дати ему ю во одержание и сeмени его по нем, не сущу ему чаду.

6 Глагола же сице Бог, яко будет сeмя его пришелцы в земли чуждей, и поработят е и озлобят лeт четыреста.

7 И языку, емуже поработают, сужду аз, рече Бог: и по сих изыдут и послужат ми на мeстe сем.

8 И даде ему завeт обрeзания. И тако роди исаака и обрeза его в день осмый: и исаак иакова, и иаков дванадесять патриарх.

9 И патриарси позавидeвше иосифу продаша его во египет: и бe Бог с ним,

10 и изят его от всeх скорбей его, и даде ему благодать и премудрость пред фараоном царем египетским: и постави его началника над египтом и над всeм домом своим.

11 Прииде же глад на всю землю египетскую и ханааню и скорбь велия, и не обрeтаху сытости отцы наши.

12 Слышав же иаков сущую пшеницу во египтe, посла отцы нашя первeе,

13 и внегда второе (приидоша), познан бысть иосиф братии своей, и явe бысть фараону род иосифов.

14 Послав же иосиф призва отца своего иакова и все сродство свое, седмьдесят и пять душ.

15 Сниде же иаков во египет, и скончася сам и отцы наши:

16 и принесени быша в сихем и положени быша во гробe, егоже купи авраам цeною сребра от сынов еммора сихемова.

17 И якоже приближашеся время обeтования, имже клятся Бог аврааму, возрастоша людие и умножишася во египтe,

18 дондеже наста царь ин (во египтe), иже не знаше иосифа:

19 сей злe умыслив о родe нашем, озлоби отцы нашя, уморити младенцы их и не оживити (дабы извергали младенцы своя во еже не быти им живым).

20 В неже время родися моисей и бe угоден Богови, иже питан бысть мeсяцы три в дому отца своего:

21 извержена же его взят его дщи фараонова и воспита и себe в сына:

22 и наказан бысть моисей всей премудрости египетстeй, бe же силен в словесeх и дeлeх.

23 Егда же исполняшеся ему лeт четыредесятих время, взыде на сердце ему посeтити братию свою сыны Израилевы:

24 и видeв нeкоего обидима, пособствова и сотвори отмщение обидимому, убив египтянина.

25 Мняше же разумeти братиям своим, яко Бог рукою его даст им спасение: они же не разумeша.

26 Во утрий же день явися им тяжущымся и привлачаше их в примирение, рек: мужие, братия есте вы, вскую обидите друг друга?

27 Обидяй же ближняго отрину его, рек: кто тя постави князя и судию над нами?

28 еда убити мя ты хощеши, имже образом убил еси вчера египтянина?

29 Бeжа же моисей о словеси сем и бысть пришлец в земли мадиамстeй, идeже роди сына два.

30 И исполньшымся лeтом четыредесятим, явися ему в пустыни горы синайския ангел Господень в пламени огненe в купинe:

31 моисей же видeв дивляшеся видeнию: приступающу же ему разумeти, бысть глас Господень к нему:

32 аз Бог отец твоих, Бог авраамов и Бог исааков и Бог иаковль. Трепетен же быв моисей не смeяше смотрити.

33 Рече же ему Господь: изуй сапоги ногу твоею, мeсто бо, на немже стоиши, земля свята есть:

34 видя видeх озлобление людий моих, иже во египтe, и стенание их услышах, и снидох изяти их: и нынe гряди, послю тя во египет.

35 Сего моисеа, егоже отринуша, рекше: кто тя постави началника и судию? сего Бог князя и избавителя посла рукою ангела явльшагося ему в купинe:

36 сей изведе их, сотворь чудеса и знамения в земли египетстeй и в чермнeм мори, и в пустыни лeт четыредесять.

37 Сей есть моисей рекий сыном Израилевым: пророка вам воздвигнет Господь Бог ваш от братии вашея яко мене: того послушайте.

38 Сей есть бывый в церкви в пустыни со ангелом, глаголавшим ему на горe синайстeй, и со отцы нашими, иже прият словеса жива дати нам,

39 егоже не восхотeша послушати отцы наши, но отринуша и и обратишася сердцем своим во египет,

40 рекше аарону: сотвори нам боги, иже предидут пред нами, моисею бо сему, иже изведе нас от земли египетския, не вeмы, что бысть ему.

41 И сотвориша телца во дни оны, и принесоша жертву идолу, и веселяхуся в дeлeх руку своею.

42 Отвратися же Бог и предаде их служити воем небесным, якоже писано есть в книзe пророк: еда заколения и жертвы принесосте ми лeт четыредесять в пустыни, доме Израилев?

43 И восприясте скинию молохову и звeзду бога вашего ремфана, образы, яже сотвористе покланятися им: и преселю вы далeе вавилона.

44 Сeнь свидeния бяше отцем нашым в пустыни, якоже повелe глаголяй моисеови сотворити ю по образу, егоже видe:

45 юже и внесоша приемше отцы наши со иисусом во одержание языков, ихже изрину Бог от лица отец наших, даже до дний давида:

46 иже обрeте благодать пред Богом и испроси обрeсти селение Богу иаковлю.

47 Соломон же созда ему храм.

48 Но вышний не в рукотворенных церквах живет, якоже пророк глаголет:

49 небо мнe престол есть, земля же подножие ногама моима: кий храм созиждете ми, глаголет Господь, или кое мeсто покоищу моему?

50 Не рука ли моя сотвори сия вся?

51 Жестоковыйнии и необрeзаннии сердцы и ушесы, вы присно духу святому противитеся, якоже отцы ваши, тако и вы:

52 кого от пророк не изгнаша отцы ваши? и убиша предвозвeстившыя о пришествии првднаго, егоже вы нынe предателе и убийцы бысте,

53 иже приясте закон устроением ангелским и не сохранисте.

54 Слышаще же сия, распыхахуся сердцы своими и скрежетаху зубы нань.

55 Стефан же сый исполнь духа свята, воззрeв на небо, видe славу Божию и Иисуса стояща о десную Бога,

56 и рече: се, вижу небеса отверста и Сына человeча о десную стояща Бога.

57 Возопивше же гласом велиим, затыкаху ушы свои и устремишася единодушно нань,

58 и изведше внe града, камением побиваху его: и свидeтелие (снемше) ризы своя положиша при ногу юноши нарицаемаго савла,

59 и камением побиваху стефана, молящася и глаголюща: Господи Иисусе, приими дух мой.

60 Преклонь же колeна, возопи гласом велиим: Господи, не постави им грeха сего. И сия рек успе.

<55>8

1 Савл же бe соизволяя убийству его. Бысть же в той день гонение велие на церковь иерусалимскую: вси же разсeяшася по странам иудейским и самарийским, кромe апостол:

2 погребоша же стефана мужие благоговeйнии и сотвориша плачь велий над ним.

3 Савл же озлобляше церковь, в домы входя, и влачя мужы и жены, предаяше в темницу.

4 Разсeявшиися же прохождаху, благовeствующе слово.

5 Филипп же сошед во град самарийский, проповeдаше им Христа:

6 внимаху же народи глаголемым от филиппа единодушно, слышаще и видяще знамения, яже творяше:

7 дуси бо нечистии от многих имущих я, вопиюще гласом велиим, исхождаху, мнози же разслабленнии и хромии исцeлишася:

8 и бысть радость велия во градe том.

9 Муж же нeкий, именем симон, прежде бe во градe волхвуя и удивляя язык самарийский, глаголя нeкоего быти себе велика,

10 емуже внимаху вси от мала даже до велика, глаголюще: сей есть сила Божия великая.

11 Внимаху же ему, зане доволно время волхвовании удивляше их.

12 Егда же вeроваша филиппу благовeствующу яже о царствии Божии и о имени Иисус Христовe, крещахуся мужие же и жены.

13 Симон же и сам вeрова и крещься бe пребывая у филиппа: видя же силы и знамения велия бываема, ужасен дивляшеся.

14 Слышавше же иже во иерусалимe апостоли, яко прият самариа слово Божие, послаша к ним петра и иоанна,

15 иже сошедше помолишася о них, яко да приимут духа святаго:

16 еще бо ни на единаго их бe пришел, точию крещени бяху во имя Господа Иисуса:

17 тогда возложиша руцe на ня, и прияша духа святаго.

18 Видeв же симон, яко возложением рук апостолских дается дух святый, принесе им сребро,

19 глаголя: дадите и мнe власть сию, да, на негоже аще положу руцe, приимет духа святаго.

20 Петр же рече к нему: сребро твое с тобою да будет в погибель, яко дар Божий непщевал еси сребром стяжати:

21 нeсть ти части ни жребия в словеси сем, ибо сердце твое нeсть право пред Богом:

22 покайся убо о злобe твоей сей и молися Богу, аще убо отпустится ти помышление сердца твоего:

23 в желчи бо горести и союзe неправды зрю тя суща.

24 Отвeщав же симон рече: помолитеся вы о мнe ко Господу, яко да ничтоже сих найдет на мя, яже рекосте.

25 Они же убо, засвидeтелствовавше и глаголавше слово Господне, возвратишася во иерусалим и многим весем самарийским благовeстиша.

26 Ангел же Господень рече к филиппу, глаголя: востани и иди на полудне, на путь сходящий от иерусалима в газу: и той есть пуст.

27 И востав пойде: и се, муж мурин, евнух силен кандакии царицы муринския, иже бe над всeми сокровищи ея, иже прииде поклонитися во иерусалим:

28 бe же возвращаяся, и сeдя на колесницe своей, чтяше пророка исаию.

29 Рече же дух к филиппу: приступи и прилeпися колесницe сей.

30 Притек же филипп услыша его чтуща пророка исаию и рече: убо разумeеши ли, яже чтеши?

31 Он же рече: како убо могу (разумeти), аще не кто наставит мя? умоли же филиппа, да возшед сядет с ним.

32 Слово же писания, еже чтяше, бe сие: яко овча на заколение ведеся, и яко агнец прямо стригущему его безгласен, тако не отверзает уст своих:

33 во смирении его суд его взятся, род же его кто исповeсть? яко вземлется от земли живот его.

34 Отвeщав же каженик к филиппу, рече: молю тя, о ком пророк глаголет сие? о себe ли, или о инeм нeкоем?

35 Отверз же филипп уста своя и начен от писания сего, благовeсти ему Иисуса.

36 Якоже идяху путем, приидоша на нeкую воду, и рече каженик: се, вода: что возбраняет ми креститися?

37 Рече же ему филипп: аще вeруеши от всего сердца твоего, мощно ти есть. Отвeщав же рече: вeрую Сына Божия быти Иисуса Христа.

38 И повелe стати колесницe: и снидоста оба на воду, филипп же и каженик: и крести его.

39 Егда же изыдоста от воды, дух святый нападе на каженика: ангел же Господень восхити филиппа, и не видe его ктому каженик, идяше бо в путь свой радуяся.

40 Филипп же обрeтеся во азотe и проходя благовeствоваше градом всeм, дондеже приити ему в кесарию.

<55>9

1 Савл же, еще дыхая прещением и убийством на ученики Господни, приступль ко архиерею,

2 испроси от него послания в дамаск к соборищем, яко да аще нeкия обрящет того пути сущыя, мужы же и жены, связаны приведет во иерусалим.

3 Внегда же ити, бысть ему приближитися к дамаску, и внезапу облиста его свeт от небесе:

4 и пад на землю, слыша глас глаголющь ему: савле, савле, что мя гониши?

5 Рече же: кто еси, Господи? Господь же рече: аз есмь Иисус, егоже ты гониши: жестоко ти есть противу рожну прати.

6 Трепещя же и ужасаяся глагола: Господи, что мя хощеши творити? И Господь рече к нему: востани и вниди во град, и речется ти, что ти подобает творити.

7 Мужие же идущии с ним стояху чудящеся, глас убо слышаще, но ни когоже видяще.

8 Воста же савл от земли и отверстыма очима своима ни единаго видяше: ведуще же его за руку, введоша в дамаск:

9 и бe дни три не видя, и ни яде, ниже пияше.

10 Бe же нeкто ученик в дамасцe, именем ананиа, и рече к нему Господь в видeнии: анание. Он же рече: се, аз, Господи.

11 Господь же к нему: востав поиди на стогну нарицаемую правую и взыщи в дому иудовe савла именем, тарсянина: се бо, молитву дeет

12 и видe в видeнии мужа, именем ананию, вшедша и возложша нань руку, яко да прозрит.

13 Отвeща же ананиа: Господи, слышах от многих о мужи сем, колика зла сотвори святым твоим во иерусалимe:

14 и здe имать власть от архиерей связати вся нарицающыя имя твое.

15 Рече же к нему Господь: иди, яко сосуд избран ми есть сей, пронести имя мое пред языки и царьми и сынми Израилевыми:

16 аз бо скажу ему, елика подобает ему о имени моем пострадати.

17 Пойде же ананиа и вниде в храмину, и возложь нань руцe, рече: савле брате, Господь Иисус явлейтися на пути, имже шел еси, посла мя, яко да прозриши и исполнишися духа свята.

18 И абие отпадоша от очию его яко чешуя: прозрe же абие, и востав крестися,

19 и приемь пищу, укрeпися. Бысть же савл с сущими в дамасцe учениками дни нeкия:

20 и абие на сонмищих проповeдаше Иисуса, яко сей есть Сын Божий.

21 Дивляхуся же вси слышащии и глаголаху: не сей ли есть гонивый во иерусалимe нарицающыя имя сие, и здe на сие прииде, да связаны тыя приведет ко архиереем?

22 Савл же паче крeпляшеся и смущаше иудеи живущыя в дамасцe, препирая, яко сей есть Христос.

23 Якоже исполнишася дние доволни, совeщаша иудее убити его,

24 увeдан же бысть савлу совeт их: стрежаху же врат день и нощь, яко да убиют его:

25 поемше же его ученицы нощию, свeсиша по стeнe в кошницe.

26 Пришед же савл во иерусалим, покушашеся прилeплятися учеником: и вси бояхуся его, не вeрующе, яко есть ученик.

27 Варнава же приемь его, приведе ко апостолом и повeда им, како на пути видe Господа, и яко глагола ему, и како в дамасцe дерзаше о имени Иисусовe.

28 И бяше с ними входя и исходя во иерусалимe и дерзая о имени Господа Иисуса.

29 Глаголаше же и стязашеся с еллины: они же искаху убити его.

30 Разумeвше же братия, сведоша его в кесарию и отпустиша его в тарс.

31 Церкви же по всей иудеи и галилеи и самарии имeяху мир, созидающяся и ходящя в страсe Господни, и утeшением святаго духа умножахуся.

32 И бысть петру, посeщающу всeх, снити и ко святым живущым в лиддe:

33 обрeте же тамо человeка нeкоего, именем енеа, от осми лeт лежаща на одрe, иже бe разслаблен.

34 И рече ему петр: енее, исцeляет тя Иисус Христос: востани с постели твоея. И абие воста:

35 и видeша его вси живущии в лиддe и во ассаронe, иже обратишася ко Господу.

36 Во иоппии же бe нeкая ученица, именем тавифа, яже сказаема глаголется серна: сия бяше исполнена благих дeл и милостынь, яже творяше.

37 Бысть же во дни тыя, болeвшей ей умрети: омывше же ю, положиша в горницe.

38 Близ же сущей лиддe иоппии, ученицы слышавше, яко петр есть в ней, послаша два мужа к нему, моляще его не облeнитися приити до них.

39 Востав же петр иде с нима: егоже пришедша возведоша в горницу, и предсташа ему вся вдовицы плачущя и показующя ризы и одежды, елика творяше, с ними сущи, серна.

40 Изгнав же вон вся петр, преклонь колeна помолися, и обращься к тeлу, рече: тавифо, востани. Она же отверзе очи свои, и видeвши петра, сeде.

41 Подав же ей руку, воздвиже ю, и призвав святыя и вдовицы, постави ю живу.

42 Увeдано же бысть се по всей иоппии, и мнози вeроваша в Господа.

43 Бысть же дни доволны пребыти ему во иоппии у нeкоего симона усмаря.

<55>10

1 Муж же нeкий бe в кесарии, именем корнилий, сотник от спиры нарицающияся италийския,

2 благоговeин и бояйся Бога со всeм домом своим, творяй милостыни многи людем и моляйся Богу всегда:

3 видe в видeнии явe, яко в час девятый дне, ангела Божия сшедша к нему и рекша ему: корнилие.

4 Он же воззрeв нань и пристрашен быв рече: что есть, Господи? рече же ему: молитвы твоя и милостыни твоя взыдоша на память пред Бога:

5 и нынe посли во иоппию мужей и призови симона, нарицаемаго петра:

6 сей странствует у нeкоего симона усмаря, емуже есть дом при мори: той речет тебe глаголы, в нихже спасешися ты и весь дом твой.

7 И якоже отиде ангел глаголяй корнилию, пригласив два от рабов своих и воина благочестива от служащих ему

8 и сказав им вся, посла их во иоппию.

9 Воутрие же, путьшествующым им и ко граду приближающымся, взыде петр на горницу помолитися, о часe шестeм.

10 Бысть же приалчен и хотяше вкусити: готовящым же онeм, нападе нань ужас,

11 и видe небо отверсто и сходящ нань сосуд нeкий, яко плащаницу велию, по четырем краем привязан и низу спущаемь на землю,

12 в немже бяху вся четвероногая земли и звeрие и гади и птицы небесныя.

13 И бысть глас к нему: востав, петре, заколи и яждь.

14 Петр же рече: никакоже, Господи, яко николиже ядох всяко скверно или нечисто.

15 И (се) глас паки к нему вторицею: яже Бог очестил есть, ты не скверни.

16 Сие же бысть трищи: и паки взяся сосуд на небо.

17 Якоже в себe недоумeвашеся петр, что бы было видeние, еже видe, и се, мужие посланнии от корнилиа, вопрошше и увeдeвше дом симонов, сташа пред враты

18 и возглашше вопрошаху, аще симон, нарицаемый петр, здe странствует.

19 Петру же размышляющу о видeнии, рече ему дух: се, мужие трие ищут тебе:

20 но востав сниди и иди с ними, ничтоже разсуждая: зане аз послах их.

21 Сошед же петр к мужем посланным к нему от корнилиа, рече: се, аз есмь, егоже ищете: кая есть вина, еяже ради приидосте?

22 Они же рекоша: корнилий сотник, муж првдн и бояйся Бога, свидeтелствован от всего языка иудейска, увeщен есть от ангела свята призвати тя в дом свой и слышати глаголы от тебе.

23 Призвав же их учреди: наутрие же петр востав иде с ними, и нeцыи от братий, иже от иоппии, идоша с ним:

24 и наутрие внидоша в кесарию. Корнилий же бe чая их, созвав сродники своя и любезныя други.

25 Якоже бысть внити петру, срeте его корнилий, и пад на ногу его поклонися.

26 Петр же воздвиже его, глаголя: востани: и аз сам человeк есмь.

27 И с ним бесeдуя, вниде и обрeте собравшыяся многи:

28 рече же к ним: вы вeсте, яко не лeпо есть мужу иудеанину прилeплятися или приходити ко иноплеменнику: и мнe Бог показа ни единаго скверна или нечиста глаголати человeка:

29 тeмже и без сумнeния приидох призван: вопрошаю вы убо, коея ради вины посласте по мене?

30 И корнилий рече: от четвертаго дне даже до сего часа бeх постяся и в девятый час моляся в дому моем: и се, муж ста предо мною во одежди свeтлe

31 и рече: корнилие, услышана бысть молитва твоя, и милостыни твоя помянушася пред Богом:

32 посли убо во иоппию и призови симона, иже нарицается петр: сей странствует в дому симона усмаря близ моря: иже пришед возглаголет тебe.

33 Абие убо послах к тебe, ты же добрe сотворил еси пришед: нынe убо вси мы пред Богом предстоим слышати вся повелeнная тебe от Бога.

34 Отверз же петр уста, рече: поистиннe разумeваю, яко не на лица зрит Бог,

35 но во всяцeм языцe бояйся его и дeлаяй правду приятен ему есть:

36 слово, еже посла сыном Израилевым, благовeствуя мир Иисус Христом: сей есть всeм Господь:

37 вы вeсте глагол бывший по всей иудеи, наченшийся от галилеи, по крещении, еже проповeда иоанн:

38 Иисуса, иже от назарета, яко помаза его Бог духом святым и силою, иже пройде благодателствуя и исцeляя вся насилованныя от диавола, яко Бог бяше с ним:

39 и мы есмы свидeтеле всeх, яже сотвори во странe иудейстeй и во иерусалимe: егоже и убиша, повeшше на древe.

40 Сего Бог воскрееси в третий день и даде ему явлену быти,

41 не всeм людем, но нам свидeтелем преднареченным от Бога, иже с ним ядохом и пихом, по воскресeнии его от мертвых:

42 и повелe нам проповeдати людем и засвидeтелствовати, яко той есть нарeченный от Бога судия живым и мертвым:

43 о сем вси пророцы свидeтелствуют, оставление грeхов прияти именем его всякому вeрующему в онь.

44 Еще же глаголющу петру глаголы сия, нападе дух святый на вся слышащыя слово.

45 И ужасошася иже от обрeзания вeрнии, елицы приидоша с петром, яко и на языки дар святаго духа излияся:

46 слышаху бо их глаголющих языки и величающих Бога. Тогда отвeща петр:

47 еда воду возбранити может кто, еже не креститися сим, иже дух святый прияша, якоже и мы?

48 Повелe же им креститися во имя Иисус Христово. Тогда молиша его пребыти у них дни нeкия.

<55>11

1 Слышаша же апостоли и братия сущии во иудеи, яко и языцы прияша слово Божие.

2 И егда взыде петр во иерусалим, препирахуся с ним иже от обрeзания,

3 глаголюще, яко к мужем обрeзания не имущым вшел еси и ял еси с ними.

4 Начен же петр, сказоваше им поряду, глаголя:

5 аз бeх во градe иоппийстeм моляся и видeх во ужасe видeние, сходящь сосуд нeкий, яко плащаницу велию, от четырех краев низпущаему с небесе, и прииде даже до мене:

6 в нюже воззрeв смотрях, и видeх четвероногая земная и звeри и гады и птицы небесныя.

7 Слышах же глас глаголющь мнe: востав, петре, заколи и яждь.

8 Рeх же: никакоже, Господи, яко всяко скверно или нечисто николиже вниде во уста моя.

9 Отвeща же ми глас вторицею с небесе глаголющь: яже Бог очестил есть, ты не скверни.

10 Сие же бысть трижды: и паки взяшася вся на небо.

11 И се, абие трие мужие сташа пред храминою, в нейже бeх, послани от кесарии ко мнe.

12 Рече же ми дух ити с ними, ничтоже разсуждая: приидоша же со мною и шесть братия сии, и внидохом в дом мужа.

13 И возвeсти нам, како видe ангела (свята) в дому своем, ставша и рекша ему: посли во иоппию мужы и призови симона, нарицаемаго петра,

14 иже речет глаголы к тебe, в нихже спасешися ты и весь дом твой.

15 Внегда же начах глаголати, нападе дух святый на них, якоже и на ны в началe.

16 Помянух же глагол Господень, якоже глаголаше: иоанн убо крестил есть водою, вы же имате креститися духом святым.

17 Аще убо равен дар даде им Бог, якоже и нам вeровавшым в Господа нашего Иисуса Христа, аз же кто бeх могий возбранити Бога?

18 Слышавше же сия умолкоша и славляху Бога, глаголюще: убо и языком Бог покаяние даде в живот.

19 Разсeявшиися убо от скорби, бывшия при стефанe, проидоша даже до финикии и кипра и антиохии, ни единому же глаголюще слово, токмо иудеем.

20 Бяху же нeцыи от них мужие кипрстии и киринейстии, иже, вшедше во антиохию, глаголаху к еллином, благовeствующе Господа Иисуса.

21 И бe рука Господня с ними: многое же число вeровавше обратишася ко Господу.

22 Слышано же бысть слово о них во ушию церкве сущия во иерусалимe, и послаша варнаву преити даже до антиохии:

23 иже пришед и видeв благодать Божию, возрадовася и моляше всeх изволением сердца терпeти о Господe:

24 яко бe муж благ и исполнь Духа свята и вeры. И приложися народ мног Господеви.

25 Изыде же варнава в тарс взыскати савла, и обрeт его, приведе его во антиохию:

26 бысть же им лeто цeло собиратися в церкви и учити народ мног, нарещи же прежде во антиохии ученики Христианы.

27 В тыя же дни снидоша от иерусалима пророцы во антиохию:

28 востав же един от них, именем агав, назнаменаше Духом глад велик хотящь быти по всей вселеннeй, иже и бысть при клавдии кесари:

29 от ученик же, по елику кто имeяше что, изволиша кийждо их на службу послати живущым во иудеи братиям,

30 еже и сотвориша, пославше к старцем рукою варнавлею и савлею.

<55>12

1 Во оно же время возложи ирод царь руцe озлобити нeкия иже от церкве,

2 уби же иакова, брата иоаннова, мечем:

3 и видeв, яко годe есть иудеем, приложи яти и петра: бяху же дние опрeсночнии:

4 егоже и емь всади в темницу, предав четырем четверицам воинов стрещи его, хотя по пасцe извести его к людем.

5 И убо петра стрежаху в темницe: молитва же бe прилeжна бываемая от церкве к Богу о нем.

6 Егда же хотяше его извести ирод, в нощи той бe петр спя между двeма воинома, связан (желeзнома) ужема двeма, стражие же пред дверьми стрежаху темницы.

7 И се, ангел Господень предста, и свeт возсия в храминe: толкнув же в ребра петра, воздвиже его, глаголя: востани вскорe. И спадоша ему ужя (желeзная) с руку.

8 Рече же ангел к нему: препояшися и вступи в плесницы твоя. Сотвори же тако. И глагола ему: облецыся в ризу твою и послeдствуй ми.

9 И изшед вслeд его идяше и не вeдаше, яко истина есть бывшее от ангела, мняше же видeние зрeти.

10 Прошедша же первую стражу и вторую, приидоста ко вратом желeзным, вводящым во град, яже о себe отверзошася има: и изшедша преидоста стогну едину, и абие отступи ангел от него.

11 И петр быв в себe, рече: нынe вeм воистинну, яко посла Бог ангела своего и изят мя из руки иродовы и от всего чаяния людий иудейских.

12 Смотрив же прииде в дом марии матере иоанна, нарицаемаго марка, идeже бяху мнози собрани и молящеся.

13 Толкнувшу же петру во врата двора, приступи слышати отроковица, именем роди,

14 и познавши глас петров, от радости не отверзе врат, притекши же сказа петра стояща пред враты.

15 Они же к ней рeша: бeснуешися ли? Она же крeпляшеся тако быти. Они же глаголаху: ангел его есть.

16 Петр же пребываше толкий: отверзше же видeша его и ужасошася.

17 Помаав же им рукою молчати, сказа им, како Господь его изведе из темницы: рече же: возвeстите иакову и братиям сия. И изшед иде во ино мeсто.

18 Бывшу же дню, бe молва не мала в воинeх, что убо петру бысть:

19 ирод же, поискав его и не обрeт и истязав стражы, повелe отвести их: и изшед от иудеи в кесарию, живяше.

20 Бe же ирод гнeваяся на тиряны и сидоняны: иже единодушно приидоша к нему, и умоливше власта постельника царева, прошаху мира, понеже страны их от царства его питахуся.

21 В нарeченный же день ирод, оболкся во одежду царску и сeд на судище пред народом, глаголаше к ним,

22 народ же возглашаше: глас Божий, а не человeчь.

23 Внезапу же порази его ангел Господень, зане не даде славы Богу: и быв червьми изяден, издше.

24 Слово же Божие растяше и множашеся.

25 Варнава же и савл возвратистася из иерусалима во антиохию, исполнивша службу, поемша с собою и иоанна, нарицаемаго марка.

<55>13

1 Бяху же нeцыи во церкви сущей во антиохии пророцы и учителие: варнава же и симеон нарицаемый нигер, и лукий киринеанин, и манаил со иродом четвертовластником воспитанный, и савл.

2 Служащым же им Господеви и постящымся, рече Дух святый: отдeлите ми варнаву и савла на дeло, на неже призвах их.

3 Тогда постившеся и помолившеся и возложше руки на ня, отпустиша их.

4 Сия убо, послана бывша от Духа свята, снидоста в селевкию, оттуду же отплыста в кипр,

5 и бывша в саламинe, возвeщаста слово Божие в сонмищих иудейских: имeяста же и иоанна слугу.

6 Прошедша же остров даже до пафа, обрeтоста нeкоего мужа волхва лжепророка иудеанина, емуже имя вариисус,

7 иже бe со анфипатом сергием павлом, мужем разумным. Сей призвав варнаву и савла, взыска услышати слово Божие:

8 сопротивляшеся же има елима волхв, тако бо сказуется имя его, иский развратити анфипата от вeры.

9 Савл же, иже и павел, исполнися Духа свята, и воззрeв нань,

10 рече: о!, исполненне всякия льсти и всякия злобы, сыне диаволь, враже всякия правды, не престанеши ли развращая пути Господни правыя?

11 и нынe, се, рука Господня на тя, и будеши слeп, не видя солнца до времене. Внезапу же нападе нань мрак и тма, и осязая искаше вожда.

12 Тогда видeв анфипат бывшее, вeрова, дивяся о учении Господни.

13 Отвезшеся же от пафа павел и сущии с ним, приидоша в пергию памфилийскую: иоанн же, отлучився от них, возвратися во иерусалим.

14 Они же, прошедше от пергии, приидоша во антиохию писидийскую, и вшедше в сонмище в день субботный, сeдоша.

15 По чтении же закона и пророк, послаша началницы сонмища к ним, глаголюще: мужие братие, аще есть слово в вас утeшения к людем, глаголите.

16 Востав же павел и помаав рукою, рече: мужие Израильтяне и боящиися Бога, услышите:

17 Бог людий сих избра отцы нашя и люди вознесе в пришелствии в земли египетстeй, и мышцею высокою изведе их из нея

18 и до четыредесяти лeт препита их в пустыни:

19 и низложив язык седмь в земли ханаанстeй, даде им в наслeдие землю их,

20 и по сих, яко лeт четыреста и пятьдесят, даде им судии до самуила пророка:

21 и оттуду просиша царя, и даде им Бог саула сына кисова, мужа от колeна вениаминова, лeт четыредесять:

22 и преставль его, воздвиже им давида в царя, емуже и рече свидeтелствовав: обрeтох давида сына иессеова, мужа по срдцу моему, иже сотворит вся хотeния моя.

23 От сего сeмене Бог по обeтованию воздвиже Израилю спасeние Иисуса,

24 проповeдавшу иоанну пред лицем внития его крещение покаяния всeм людем Израилевым.

25 И якоже скончаваше иоанн течение, глаголаше: кого мя непщуете быти? нeсмь аз, но се, грядет по мнe, емуже нeсмь достоин разрeшити ремень сапогу его.

26 Мужие братие, сынове рода авраамля, и иже в вас боящиися Бога, вам слово спасeния сего послася.

27 Живущии бо во иерусалимe и князи их, сего не разумeвше, и гласы пророческия по вся субботы чтомыя, осудивше (его), исполниша,

28 и ни единыя вины смертныя обрeтше, просиша у пилата убити его:

29 якоже скончаша вся, яже о нем писана, снемше с древа, положиша во гробe.

30 Бог же воскреси его от мертвых:

31 иже являшеся во дни многи совозшедшым с ним от галилеи во иерусалим, иже нынe суть свидeтелие его к людем.

32 И мы вам благовeствуем обeтование бывшее ко отцем, яко сие Бог исполнил есть нам чадом их, воздвиг Иисуса,

33 якоже и во псалмe вторeм писано есть: Сын мой еси ты, аз днесь родих тя.

34 А якоже воскреси его от мертвых, не ктому хотяща возвратитися во истлeние, сице рече: яко дам вам прпдбная давидова вeрная.

35 Тeмже и в другом глаголет: не даси прпдбному твоему видeти истлeния.

36 Давид бо, своему роду послужив Божиим совeтом, успе, и приложися ко отцем своим, и видe истлeние:

37 а егоже Бог воздвиже, не видe истлeния.

38 Вeдомо убо да будет вам, мужие братие, яко его ради вам оставление грeхов проповeдается:

39 и от всeх, от нихже не возмогосте в законe моисеовe оправдитися, о сем всяк вeруяй оправдается.

40 Блюдите убо, да не приидет на вас рeченное во пророцeх:

41 видите, нерадивии, и чудитеся, и узрите и исчезнете: яко дeло аз содeлаю во дни вашя, емуже не имате вeровати, аще кто повeсть вам.

42 Исходящым же им от сонмища иудейска, моляху языцы в другую субботу глаголатися им глаголом сим:

43 разшедшуся же собору, послeдоваша мнози от иудей и честивых пришлец павлу и варнавe, иже, глаголюща им, увeщаста их пребывати в благодати Божией.

44 Во грядущую же субботу мало не весь град собрася послушати слова Божия:

45 видeвше же иудее народы, исполнишася зависти и вопреки глаголаху глаголемым от павла, сопротив глаголюще и хуляще.

46 Дерзнувша же павел и варнава рекоста: вам бe лeпо первeе глаголати слово Божие: а понеже отвергосте е и недостойны творите сами себе вeчному животу, се, обращаемся во языки:

47 тако бо заповeда нам Господь: положих тя во свeт языком, еже быти тебe во спасeние даже до послeдних земли.

48 Слышаще же языцы радовахуся и славляху слово Господне, и вeроваша, елицы учинени бяху в жизнь вeчную:

49 проношашеся же слово Господне по всей странe.

50 Иудее же наустиша честивыя жены и благообразныя и старeйшины града, и воздвигоша гонение на павла и варнаву, и изгнаша я от предeл своих.

51 Она же, отрясша прах от ног своих на них, приидоста во иконию.

52 Ученицы же исполняхуся радости и Духа свята.

<55>14

1 Бысть же во иконии, вкупe внити има в сонмище иудейское и глаголати тако, яко вeровати иудеев и еллинов множеству многу.

2 Невeрующии же иудее воздвигоша и озлобиша (к злобe подустиша) душы языков на братию.

3 Доволно же убо время пребыста дерзающа о Господe, свидeтелствующем слову благодати своея и дающем знамения и чудеса быти рукама их.

4 Раздeлишажеся множество града, и ови убо бяху со иудеи, ови же со апостолы.

5 И егда бысть стремление языком же и иудеем с началники их досадити и камением побити их,

6 увeдeвша же прибeгоста во грады ликаонския, в листру и дервию, и во окрестныя их,

7 и тамо бeста благовeствующа.

8 И нeкто муж в листрeх немощен ногама сeдяше, хром от чрева матере своея сый, иже николиже бe ходил.

9 Сей слышаше павла глаголюща: иже воззрeв нань и видeв, яко вeру имать здрав быти,

10 рече велиим гласом: тебe глаголю во имя Господа Иисуса Христа, встани на ногу твоею прав. И абие возскочи и хождаше.

11 Народи же видeвше, еже сотвори павел, воздвигоша глас свой, ликаонски глаголюще: бози уподобльшеся человeком снидоша к нам.

12 Нарицаху же убо варнаву диа, павла же ермиа, понеже той бяше началник слова.

13 Жрец же диев, сущаго пред градом их, приведе юнцы и (принесе) вeнцы пред врата, с народы хотяше жрети.

14 Слышавша же апостола варнава и павел, растерзавша ризы своя, вскочиста в народ, зовуща и глаголюща:

15 мужие, что сия творите? и мы подобострастна есма вам человeка, благовeствующа вам от сих суетных обращатися к Богу живу, иже сотвори небо и землю и море и вся, яже в них:

16 иже в мимошедшыя роды оставил бe вся языки ходити в путех их:

17 и убо не несвидeтелствована себе остави, благотворя, с небесе нам дожди дая и времена плодоносна, исполняя пищею и веселием сердца наша.

18 И сия глаголюща, едва устависта народы не жрети има, но отити коемуждо во своя си. Пребывающема же има и учащема,

19 приидоша от антиохии и иконии нeцыи иудее, и стязающемася има с дерзновением, наустиша народы отступити от нею, глаголюще, яко ничтоже истинно глаголета, но все лжета. И наустивше народы и камением побивше павла, извлекоша внe града, мняще его умерша.

20 Окрест же ставшым его учеником, востав вниде во град и наутрие изыде с варнавою в дервию.

21 Благовeствовавша же граду тому и научивша многи, возвратистася в листру и иконию и антиохию,

22 утверждающа душы учеников, моляща пребыти в вeрe, и яко многими скорбьми подобает нам внити в царствие Божие.

23 Рукоположша же им пресвитеры на вся церкви и помолившася с постом, предаста их Господеви, в негоже увeроваша.

24 И прошедша писидию, приидоста в памфилию:

25 и глаголавша в пергии слово Господне, снидоста во атталию

26 и оттуду отплыста во антиохию, отнюдуже бeста предана благодати Божией в дeло, еже скончаста.

27 Пришедша же и собравша церковь, сказаста, елика сотвори Бог с нима и яко отверзе языком дверь вeры:

28 пребыста же тамо время не мало со ученики.

<55>15

1 И нeцыи сшедше от иудеи, учаху братию, яко аще не обрeжетеся по обычаю моисеову, не можете спастися.

2 Бывшей же распри и стязанию не малу павлу и варнавe к ним, учиниша взыти павлу и варнавe и нeким другим от них ко апостолом и старцем во иерусалим о вопрошении сем.

3 Они же убо, предпослани бывше от церкве, прохождаху финикию и самарию, повeдающе обращение языков, и творяху радость велию всей братии.

4 Пришедше же во иерусалим, прияти быша от церкве и апостол и старец, сказаша же, елика сотвори Бог с ними и яко отверзе языком дверь вeры.

5 Восташа же нeцыи от ереси фарисейския вeровавшии, глаголюще, яко подобает обрeзати их, завeщавати же блюсти закон моисеов.

6 Собрашася же апостоли и старцы вeдeти о словеси сем.

7 Многу же взысканию бывшу, востав петр рече к ним: мужие братие, вы вeсте, яко от дний первых Бог в нас избра усты моими услышати языком слово благовeстия и вeровати:

8 и срдцевeдец Бог свидeтелствова им, дав им Духа святаго, якоже и нам,

9 и ничтоже разсуди между нами же и онeми, вeрою очищь сердца их:

10 нынe убо что искушаете Бога, (хотяще) возложити иго на выи учеником, егоже ни отцы наши, ни мы возмогохом понести?

11 но благдатию Господа Иисуса Христа вeруем спастися, якоже и они.

12 Умолча же все множество и послушаху варнавы и павла повeдающею, елика сотвори Бог знамения и чудеса во языцeх има.

13 По умолчании же ею, отвeща иаков глаголя: мужие братие, послушайте мене:

14 симеон повeда, яко прежде Бог посeти прияти от язык люди о имени своем:

15 и сему согласуют словеса пророк, якоже пишет:

16 по сих обращуся и созижду кров давидов падший, и раскопаная его созижду и исправлю его,

17 яко да взыщут прочии человeцы Господа, и вси языцы, в нихже наречеся имя мое, глаголет Господь, творяй сия вся.

18 Разумна от вeка суть Богови вся дeла его.

19 Сего ради аз сужду не стужати от язык обращающымся к Богу,

20 но заповeдати им огребатися от треб идолских и от блуда и удавленины и от крове, и елика неугодна себe суть, иным не творити.

21 Моисей бо от родов древних по всeм градом проповeдающыя его имать, в сонмищих по вся субботы чтомый.

22 Тогда изволися апостолом и старцем со всею церковию, избравше мужа от них, послати во антиохию с павлом и варнавою, иуду нарицаемаго варсаву, и силу, мужа нарочита в братии,

23 написавше рукама их сия: апостоли и старцы и братия, сущым во антиохии и сирии и киликии братиям, иже от язык, (о Господe) радоватися.

24 Понеже слышахом, яко нeцыи от нас изшедше возмутиша вас словесы, развращающе душы вашя, глаголюще обрeзатися и блюсти закон, имже мы не завeщахом:

25 изволися нам собравшымся единодушно, избранныя мужы послати к вам, с возлюбленныма нашима варнавою и павлом,

26 человeкома предавшема душы своя о имени Господа нашего Иисуса Христа:

27 послахом убо иуду и силу, и тeх словом сказующих таяжде:

28 изволися бо святому Духу и нам, ничтоже множае возложити вам тяготы, развe нуждных сих:

29 огребатися от идоложертвенных и крове, и удавленины и блуда: и елика не хощете вам быти, другим не творите: от нихже соблюдающе себе, добрe сотворите. Здравствуйте.

30 Они же убо послани бывше приидоша во антиохию, и собравше народ, вдаша послание.

31 Прочетше же, возрадовашася о утeшении.

32 Иуда же и сила, и та пророка суща, словом мнозeм утeшиста братию и утвердиста.

33 Пребывша же тамо время, отпущена быста с миром от братий ко апостолом.

34 Изволися же силe пребыти тамо, иуда же возвратися во иерусалим.

35 Павел же и варнава живяста во антиохии, учаща и благовeствующа слово Господне, и со инeми многими.

36 По нeких же днех рече павел к варнавe: возвращшеся подобает посeтити братию нашу во всeх градeх, в нихже проповeдахом слово Господне, како пребывают.

37 Варнава же восхотe пояти с собою иоанна нарицаемаго марка:

38 павел же глаголаше отступльшаго от наю от памфилии и не шедшаго с нама на дeло, на неже послани быхом, не пояти сего с собою.

39 Бысть убо распря, яко отлучитися има от себе: варнава убо поемь марка отплы в кипр:

40 павел же избрав силу изыде предан благодати Божией от братий,

41 прохождаше же сирию и киликию, утверждая церкви.

<55>16

1 Прииде же в дервию и листру. И се, ученик нeкий бe ту, именем тимофей, сын жены нeкия иудеаныни вeрны, отца же еллина:

2 иже свидeтелствован бe от сущих в листрeх и иконии братии.

3 Сего восхотe павел с собою изыти: и приемь обрeза его, иудей ради сущих на мeстeх онeх: вeдяху бо вси отца его, яко еллин бяше.

4 И якоже прохождаху грады, предаяше им хранити уставы сужденныя от апостол и старец, иже во иерусалимe.

5 Церкви же утверждахуся вeрою и прибываху в число по вся дни.

6 Прошедше же фригию и галатийскую страну, возбранени (быша) от святаго Духа глаголати слово во асии.

7 Пришедше же в мисию, покушахуся в вифинию поити: и не остави их Дух.

8 Прешедше же мисию, снидоша в троаду.

9 И видeние в нощи явися павлу: муж нeкий бe македонянин стоя, моля его и глаголя: пришед в македонию, помози нам.

10 И якоже видeние видe, абие взыскахом изыти в македонию, разумeвше, яко призва ны Господь благовeстити им.

11 Отвезшеся же от троады, приидохом в самофрак, воутрие же в неаполь,

12 оттуду же в филиппы, иже есть первый град части македонии, колониа. Бeхом же в том градe пребывающе дни нeкия.

13 В день же субботный изыдохом вон из града при рeцe, идeже мняшеся молитвенница быти, и сeдше глаголахом к собравшымся женам.

14 И нeкая жена, именем лидиа, порфиропродалница от града фиатирскаго, чтущи Бога, послушаше: ейже Господь отверзе сердце внимати глаголемым от павла.

15 Якоже крестися та и дом ея, моляше ны глаголющи: аще усмотристе мя вeрну Господеви быти, вшедше в дом мой, пребудите. И принуди нас.

16 Бысть же идущым нам на молитву, отроковица нeкая имущая дух пытлив срeте нас, яже стяжание много даяше господем своим волхвующи.

17 Та послeдовавши павлу и нам, взываше глаголющи: сии человeцы раби Бога вышняго суть, иже возвeщают нам путь спасeния.

18 Се же творяше на многи дни. Стужив же си павел и обращься, духови рече: запрещаю ти именем Иисуса Христа, изыди из нея. И изыде в том часe.

19 Видeвше же господие ея, яко изыде надежда стяжания их, поемше павла и силу, влекоша на торг ко князем,

20 и приведше их к воеводам, рeша: сии человeцы возмущают град наш, иудее суще,

21 и завeщавают обычаи, яже не достоит нам приимати ни творити, римляном сущым.

22 И снидеся народ на них, и воеводы растерзавше има ризы, веляху палицами бити их:

23 многи же давше има раны, всадиша в темницу, завeщавше темничному стражу твердо стрещи их:

24 иже таково завeщание приемь, всади их во внутреннюю темницу и ноги их заби в кладe.

25 В полунощи же павел и сила молящася пояста Бога: послушаху же их юзницы.

26 Внезапу же трус бысть велий, яко поколебатися основанию темничному: отверзошася же абие двери вся, и всeм юзы ослабeша.

27 Возбуждься же темничный страж и видeв отверсты двери темницы, извлек нож, хотяше себе убити, мня избeгшя юзники.

28 Возгласи же гласом велиим павел глаголя: ничтоже сотвори себe зла, вси бо есмы здe.

29 Просив же свeщи вскочи, и трепетен быв, припаде к павлу и силe,

30 и извед их вон, рече: господие, что ми подобает творити, да спасуся?

31 Она же рекоста: вeруй в Господа Иисуса Христа, и спасешися ты и весь дом твой.

32 И глаголаста ему слово Господне, и всeм, иже в дому его.

33 И поемь я в тойже час нощи, измы от ран и крестися сам и свои ему вси абие:

34 введ же я в дом свой, постави трапезу и возрадовася со всeм домом своим, вeровав Богу.

35 Дню же бывшу, послаша воеводы паличники, глаголюще: отпусти человeка она.

36 Сказа же темничный страж словеса сия павлу, яко послаша воеводы, да отпущена будета: нынe убо изшедша, идита с миром.

37 Павел же рече к ним: бивше наю пред людьми, неосужденна человeка римлянина суща, всадиша в темницу, и нынe отай изводят наю? ни бо: но да пришедше сами изведут наю.

38 Сказаша же паличницы воеводам глаголы сия: и убояшася слышавше, яко римлянина еста.

39 И пришедше умолиша их и изведше моляху изыти из града.

40 Изшедша же из темницы приидоста к лидии, и видeвша братию, утeшиста их и изыдоста.

<55>17

1 Прешедша же амфиполь и аполлонию, внидоста в солунь, идeже бe сонмище иудейское.

2 По обычаю же своему павел вниде к ним и по субботы три стязашеся с ними от писаний,

3 сказуя и предлагая им, яко Христу подобаше пострадати и воскресeнути от мертвых, и яко сей Иисус, егоже аз проповeдую вам, есть Христос.

4 И нeцыи от них вeроваша и приложишася к павлу и силe, от честивых еллин множество много и от жен благородных не мало.

5 Возревновавше же непокоршиися иудее и приемше крамолники нeкия мужы злыя, и собравше народ, молвяху по граду: нашедше же на дом иассонов, искаху их извести к народу.

6 Не обрeтше же их, влечаху иассона и нeкия от братий ко градоначалником, вопиюще, яко, иже развратиша вселенную, сии и здe приидоша,

7 ихже прият иассон: и сии вси противно велeнием кесаревым творят, царя глаголюще иного быти, Иисуса.

8 Смятоша же народ и градоначалники слышащыя сия:

9 вземше же доволное от иассона и от прочих, отпустиша их.

10 Братия же абие в нощи отслаша павла и силу в берию: иже пришедша, идоста в собор иудейский.

11 Сии же бяху благороднeйши живущих в солуни, иже прияша слово со всeм усердием, по вся дни разсуждающе писания, аще суть сия тако.

12 Мнози убо от них вeроваша, и от еллинских жен благообразных и мужей не мало.

13 И яко увeдаша иже от солуня иудее, яко и в берии проповeдася от павла слово Божие, приидоша и тамо движуще и смущающе народы.

14 Абие же тогда братия отпустиша павла ити на поморие: остаста же сила и тимофей тамо.

15 Провождающии же павла ведоша его даже до афин, и приемше заповeдь к силe и тимофею, да яко скорeе приидут к нему, изыдоша.

16 Во афинeх же ждущу их павлу, раздражашеся дух его в нем зрящем идол полн сущь град.

17 Стязашеся же убо на сонмищи со иудеи и с честивыми, и на торжищи по вся дни с приключающимися.

18 Нeцыи же от епикур и от стоик философ стязахуся с ним: и нeцыи глаголаху: что убо хощет суесловивый сей глаголати? Инии же: чуждих богов мнится проповeдник быти: яко Иисуса и воскресeние благовeствоваше им.

19 Поемше же его, ведоша на ареопаг, глаголюще: можем ли разумeти, что новое сие глаголемое тобою учение?

20 странна бо нeкая влагаеши во ушеса наша: хощем убо разумeти, что хотят сия быти?

21 Афинее же вси и приходящии страннии ни во чтоже ино упражняхуся, развe глаголати что или слышати новое.

22 Став же павел посредe ареопага, рече: мужие афинейстии, по всему зрю вы аки благочестивыя:

23 проходя бо и соглядая чествования ваша, обрeтох и капище, на немже бe написано: невeдомому Богу. Егоже убо не вeдуще (благолeпнe) чтете, сего аз проповeдую вам.

24 Бог сотворивый мир и вся, яже в нем, сей небесе и земли Господь сый, не в рукотворенных храмeх живет,

25 ни от рук человeческих угождения приемлет, требуя что, сам дая всeм живот и дыхание и вся:

26 сотворил же есть от единыя крове весь язык человeчь, жити по всему лицу земному, уставив предучиненая времена и предeлы селения их,

27 взыскати Господа, да поне осяжут его и обрящут, яко не далече от единаго коегождо нас суща:

28 о нем бо живем и движемся и есмы, якоже и нeцыи от ваших книжник рекоша: сего бо и род есмы.

29 Род убо суще Божий, не должни есмы непщевати подобно быти бж(с)тво злату, или сребру, или каменю художнe начертану, и смышлению человeчу:

30 лeта убо невeдeния презирая Бог, нынe повелeвает человeком всeм всюду покаятися:

31 зане уставил есть день, в оньже хощет судити вселеннeй в правдe, о мужи, егоже предустави, вeру подая всeм, воскресив его от мертвых.

32 Слышавше же воскресeние мертвых, овии убо ругахуся, овии же рeша: да слышим тя паки о семe.

33 И тако павел изыде от среды их.

34 Нeцыи же мужие прилeпившеся ему, вeроваша: в нихже бe и дионисий ареопагитский, и жена именем дамарь, и друзии с ними.

<55>18

1 По сих же отлучився павел от афин, прииде в коринф:

2 и обрeт нeкоего иудеанина именем акилу, понтянина родом, ново пришедша от италии, и прискиллу жену его: зане повелeл бяше клавдий отлучитися всeм иудеем от рима: прииде к ним,

3 и зане единохудожником быти им, пребысть у них и дeлаше: бяху бо скинотворцы хитростию.

4 Стязашеся же на сонмищах по вся субботы и препираше иудеи и еллины.

5 И егда снидоста от македонии сила же и тимофей, тужаше духом павел, свидeтелствуя иудеом Иисуса быти Христа.

6 Противящымся же им и хулящым, отряс ризы своя, рече к ним: кровь ваша на главах ваших: чист аз, отнынe во языки иду.

7 И прешед оттуду, прииде в дом нeкоего именем иуста, чтуща Бога, емуже храмина бe вскрай сонмища.

8 Крисп же началник собора вeрова Господеви со всeм домом своим, и мнози от коринфян слышавше вeроваху и крещахуся.

9 Рече же Господь в видeнии нощнeм павлу: не бойся, но глаголи и да не умолкнеши,

10 зане аз есмь с тобою, и никтоже приложит озлобити тя: зане людие суть ми мнози во градe сем.

11 Пребысть же тамо лeто и мeсяц шесть, учя в них слову Божию.

12 Галлиону же анфипату сущу во ахаии, нападоша единодушно иудее на павла и приведоша его на судилище,

13 глаголюще, яко противу закону сей увeщавает человeки чтити Бога.

14 Хотящу же павлу отверсти уста, рече галлион ко иудеем: аще убо неправда была бы кая или дeло злое, о!, иудее, по слову послушал бых вас:

15 аще ли же стязания суть о словеси и о именeх и о законe вашем, вeдите сами: судия бо аз сим не хощу быти.

16 И изгна их от судилища.

17 Емше же вси еллини сосфена началника собора, бияху пред судилищем: и ни едино о сих галлиону радeние бысть.

18 Павел же, еще пребыв дни доволны и цeловав братию, отплы в сирию, и с ним акила и прискилла, остриг главу в кегхреих: обрекся бо бe.

19 Приста же во ефесe и тeх остави тамо, сам же вшед в сонмище, стязашеся со иудеи.

20 Молящым же им его на много время пребыти у них, не изволи,

21 но отречеся им, глаголя, яко подобает ми всяко праздник грядущий сотворити во иерусалимe: паки же возвращуся к вам, Богу хотящу. И отвезеся от ефеса: акила же и прискилла остаста во ефесe.

22 И сошед в кесарию, возшед и цeловав церковь, сниде во антиохию,

23 и сотворь время нeкое, изыде, проходя поряду галатийскую страну и фригию, утверждая вся ученики.

24 Иудеанин же нeкто, аполлос именем, александрянин родом, муж словесен, прииде во ефес, силен сый в книгах.

25 Сей бe оглашен пути Господню, и горя духом, глаголаше и учаше извeстно яже о Господe, вeдый токмо крещение иоанново.

26 Сей же начат дерзати на сонмищих. Слышавша же его акила и прискилла, прияста его и извeстнeе тому сказаста путь Господень.

27 Хотящу же ему преити во ахаию, предпославше братия написаша учеником прияти его: иже пришед тамо пособствова много вeровавшым благодатию:

28 твердо бо иудеи не престая обличаше пред людьми, сказуя писаньми, Иисуса быти Христа.

<55>19

1 Бысть же внегда быти аполлосу в коринфe, павел, прошед вышния страны, прииде во ефес, и обрeт нeкия ученики,

2 рече к ним: аще убо Дух свят прияли есте вeровавше? Они же рeша к нему: но ниже аще Дух святый есть, слышахом.

3 Рече же к ним: во что убо крестистеся? Они же рекоша: во иоанново крещение.

4 Рече же павел: иоанн убо крести крещением покаяния, людем глаголя, да во грядущаго по нем вeруют, сирeчь во Христа Иисуса.

5 Слышавше же крестишася во имя Господа Иисуса,

7 и возложшу павлу на ня руцe, прииде Дух святый на ня, глаголаху же языки и пророчествоваху.

7 Бяше же всeх мужей яко дванадесять.

8 Вшед же в сонмище, дерзаше, не обинуяся три мeсяцы бесeдуя и увeряя, яже о царствии Божии.

9 И егда нeцыи ожесточахуся и пряхуся, злословяще путь Господень пред народом, отступль от них отлучи ученики, по вся дни стязаяся во училищи мучителя (властителя) нeкоего.

10 Сие же бысть два лeта, яко всeм живущым во асии слышати слово Господа Иисуса, жидом же и еллином.

11 Силы же не просты творяше Бог рукама павловыма,

12 яко и на недужныя наносити от (пота) тeла его главотяжы и убрусцы, и исцeлитися им от недуг, и духом лукавым исходити от них.

13 Начаша же нeцыи от скитающихся иудей заклинателей именовати над имущими духи лукавыя имя Господа Иисуса, глаголюще: заклинаем вы Иисусом, егоже павел проповeдует.

14 Бяху же нeцыи сынове скевы иудеанина архиереа седмь, иже сие творяху.

15 Отвeщав же дух лукавый рече: Иисуса знаю и павла свeм, вы же кто есте?

16 И скачя на них человeк, в немже бe дух лукавый, и одолeв им, укрeпися на них, якоже нагим и ураненым избeжати от храма онаго.

17 Сие же бысть разумно всeм живущым во ефесe иудеем же и еллином, и нападе страх на всeх их, и величашеся имя Господа Иисуса:

18 мнози же от вeровавших прихождаху, исповeдающе и сказующе дeла своя:

19 доволни же от сотворших чародeяния, собравше книги своя, сожигаху пред всeми: и сложиша цeны их и обрeтоша сребра пять тем.

20 Сице крeпко слово Господне растяше и крeпляшеся.

21 И якоже скончашася сия, положи павел в дусe, прошед македонию и ахаию, ити во иерусалим, рек, яко бывшу ми тамо, подобает ми и рим видeти.

22 Послав же в македонию два от служащих ему, тимофеа и ераста, сам же пребысть время во асии.

23 Бысть же во время оно молва не мала о пути Господни:

24 димитрий бо нeкто именем, среброковачь, творяй храмы сребряны артемидe, подаяше хитрецем дeлание (стяжание) не мало,

25 ихже собрав и ины сицевых вещей дeлатели, рече: мужие, вeсте, яко от сего дeлания доволство житию нашему есть:

26 и видите и слышите, яко не токмо ефес, но мало не всю асию павел сей препрeв, обрати мног народ, глаголя, яко не суть бози, иже руками человeческими бывают:

27 не токмо же сия бeду приемлет наша часть, еже бы во обличение не приити, но дабы и великия богини артемиды храм ни во чтоже не вмeнился, имать же разоритися и величество ея, юже вся асиа и вселенная почитает.

28 Слышавше же и бывше исполнени ярости, вопияху глаголюще: велика артемида ефесская.

29 И исполнися град весь мятежа: устремишася же единодушно на позорище, восхищше гаиа и аристарха македоняны, други (сопутники) павловы.

30 Павлу же хотящу внити в народ, не оставляху его ученицы:

31 нeцыи же от асийских началник, суще ему друзи, пославше к нему, моляху не вдати себе в позор.

32 Друзии же убо ино нeчто вопияху: бe бо собрание смущено, и множайшии от них не вeдяху, чесо ради собрашася.

33 От народа же избраша александра, изведшым его иудеем. Александр же, помаав рукою, хотяше отвeщати народу.

34 Разумeвше же, яко иудеанин есть, глас бысть един от всeх, яко на два часа вопиющих: велика артемида ефесская.

35 Утишив же книжник народ, рече: мужие ефесстии, кто бо есть человeк, иже не вeсть, яко ефесский град служитель есть великия богини артемиды и диопета?

36 без всякаго убо прекословия сим сице сущым, потребно есть вам безмолвным быти и ничтоже безчинно творити:

37 приведосте бо мужей сих, ни храм (артемидин) окрадших, ниже богиню вашу хулящих:

38 аще убо димитрий и иже с ним художницы имут к кому слово, суды суть и анфипати суть: да поемлют друг на друга:

39 аще ли же что о иных ищете, в законнeм собрании разрeшится:

40 ибо бeдствуем порицаеми быти о крамолe днешней, ни единeй винe сущей, о нейже возможем воздати слово стремления сего. И сия рек распусти собравшийся народ.

<55>20

1 По утишении же молвы, призвав павел ученики, утeшив и цeловав их, изыде ити в македонию.

2 Прошед же страны оны и утeшив их словом многим, прииде во елладу:

3 пожив же мeсяцы три, бывшу нань навeту от иудей, хотящу отвезтися в сирию, бысть хотeние возвратитися сквозe македонию.

4 Послeдова же ему даже до асии сосипатр пирров берянин, солуняне же аристарх и секунд, и гаий дервянин и тимофей, асиане же тихик и трофим.

5 Сии предшедше ждаху нас в троадe.

6 Мы же отвезохомся по днех опрeсночных от филипп и приидохом к ним в троаду во днех пяти, идeже пребыхом дний седмь.

7 Во едину же от суббот, собравшымся учеником преломити хлeб, павел бесeдоваше к ним, хотя изыти на утрии, простре же слово до полунощи.

8 Бяху же свeщы многи в горницe, идeже бeхом собрани.

9 Сeдя же нeкто юноша, именем евтих, во окнe, отягчен сном глубоким, глаголющу павлу о мнозe, преклонься от сна, паде от трекровника долу, и взяша его мертва.

10 Сошед же павел нападе нань, и обемь его рече: не молвите, ибо душа его в нем есть.

11 Возшед же и преломль хлeб и вкушь, доволно же бесeдовав даже до зари, и тако изыде.

12 Приведоша же отрока жива и утeшишася не мало.

13 Мы же, пришедше в корабль, отвезохомся во ассон, оттуду хотяще пояти павла: тако бо нам бe повелeл, хотя сам пeшь ити.

14 И якоже снидеся с нами во ассонe, вземше его приидохом в митилин.

15 И оттуду отвезшеся, во утрие пристахом противу хию, в другий же отвезохомся в самон, и пребывше в трогиллии, в грядущий же день приидохом в милит:

16 суди бо павел мимо ити ефес, яко да не будет ему закоснeти во асии, тщашебося, аще возможно будет, в день пятьдесятный быти во иерусалимe.

17 От милита же послав во ефес, призва пресвитеры церковныя,

18 и якоже приидоша к нему, рече к ним: вы вeсте, яко от перваго дне, отнелиже приидох во асию, како с вами все время бых,

19 работая Господеви со всяким смиреномдрием и многими слезами и напастьми, прилучившимися мнe от иудейских навeт:

20 яко ни в чесом от полезных обинухся, еже сказати вам и научити вас пред людьми и по домом,

21 засвидeтелствуя иудеем же и еллином еже к Богу покаяние и вeру яже в Господа нашего Иисуса Христа.

22 И нынe, се, аз связан духом гряду во иерусалим, яже в нем хотящая приключитися мнe не вeдый:

23 точию яко Дух святый по вся грады свидeтелствует, глаголя, яко узы мене и скорби ждут.

24 Но ни едино же попечение творю, ниже имам душу мою честну себe, развe еже скончати течение мое с радостию и службу, юже приях от Господа Иисуса, засвидeтелствовати евангелие благодати Божия.

25 И нынe, се, аз вeм, яко ктому не узрите лица моего вы вси, в нихже проидох проповeдуя царствие Божие.

26 Тeмже свидeтелствую вам во днешний день, яко чист аз от крове всeх,

27 не обинухся бо сказати вам всю волю Божию.

28 Внимайте убо себe и всему стаду, в немже вас Дух святый постави епископы, пасти церковь Господа и Бога, юже стяжа кровию своею.

29 Аз бо вeм сие, яко по отшествии моем внидут волцы тяжцы в вас, не щадящии стада:

30 и от вас самeх востанут мужие глаголющии развращеная, еже отторгати ученики вслeд себе.

31 Сего ради бдите, поминающе, яко три лeта нощь и день не престаях учя со слезами единаго когождо вас.

32 И нынe предаю вас, братие, Богови и слову благодати его, могущему наздати и дати вам наслeдие во освященных всeх.

33 Сребра или злата или риз ни единаго возжелах:

34 сами вeсте, яко требованию моему и сущым со мною послужистe руцe мои сии.

35 Вся сказах вам, яко тако труждающымся подобает заступати немощныя, поминати же слово Господа Иисуса, яко сам рече: блаженнeе есть паче даяти, нежели приимати.

36 И сия рек, преклонь колeна своя, со всeми ими помолися.

37 Мног же бысть плачь всeм: и нападше на выю павлову, облобызаху его,

38 скорбяще наипаче о словеси, еже рече, яко ктому не имут лица его узрeти. Провождаху же его в корабль.

<55>21

1 И якоже бысть отвезтися нам, отторгшымся от них, прямо шедше приидохом в кон, в другий же день в родос и оттуду в патару:

2 и обрeтше корабль преходящь в финикию, возшедше отвезохомся.

3 Возникший же нам кипр оставльше ошуюю, плыхом в сирию и пристахом в тирe, тамо бо бяше кораблю изложити бремя:

4 и обрeтше ученики, пребыхом ту дний седмь: иже павлови глаголаху Духом не восходити во иерусалим.

5 Егда же бысть нам скончати дни, изшедше идохом, провождающым нас всeм с женами и дeтьми даже до внe града: и преклоньше колeна при брезe помолихомся.

6 И цeловавше друг друга внидохом в корабль, они же возвратишася во своя си.

7 Мы же, плавание наченше от тира, пристахом во птолемаидe, и цeловавше братию, пребыхом день един у них.

8 Во утрие же изшедше павел и иже с ним, приидохом в кесарию, и вшедше в дом филиппа благовeстника, суща от седми (диакон), пребыхом у него.

9 Сего же бяху дщери дeвицы четыри прорицающыя.

10 Пребывающым же нам тамо дни многи, сниде нeкто от иудеи пророк, именем агав,

11 и пришед к нам и взем пояс павлов, связав же свои руцe и нозe, рече: тако глаголет Дух святый: мужа, егоже есть пояс сей, тако свяжут (его) во иерусалимe иудее и предадят в руцe языков.

12 И якоже слышахом сия, моляхом мы же и намeстнии (тамошнии жителие), не восходити ему во иерусалим.

13 Отвeща же павел и рече: что творите, плачуще и сокрушающе ми сердце? аз бо не точию связан быти (хощу), но и умрети во иерусалимe готов есмь за имя Господа Иисуса.

14 Не повинующуся же ему, умолчахом, рекше: воля Господня да будет.

15 По днех же сих уготовльшеся взыдохом во иерусалим:

16 приидоша же с нами и нeцыи ученицы от кесарии, ведуще с собою, у негоже бы обитати нам, мнасона нeкоего кипрянина, древняго ученика.

17 Бывшым же нам во иерусалимe, любезно прияша нас братия.

18 На утрие же вниде павел с нами ко иакову, вси же приидоша старцы.

19 И цeловав их, сказаше по единому коеждо, еже сотвори Бог во языцeх служением его.

20 Они же слышавше славляху Бога и рекоша ему: видиши ли, брате, колико тем есть иудей вeровавших? и вси ревнителие закону суть:

21 увeстишася же о тебe, яко отступлению учиши от закона моисеова живущыя во языцeх вся иудеи, глаголя не обрeзовати им чад своих, ниже во обычаех отеческих ходити.

22 Что убо есть? Всяко подобает народу снитися: услышат бо, яко пришел еси.

23 Сие убо сотвори, еже ти глаголем: суть у нас мужие четыри обeщавше себе Богу:

24 сия поим очистися с ними и иждиви на них, да острижут си главы: и разумeют вси, яко возвeщенная им о тебe ничтоже суть, но пребываеши и сам закон храня.

25 А о вeровавших языцeх мы послахом, судивше ничтоже таковое соблюдати им, токмо хранити себе от идоложертвенных и крове, и удавленины и блуда.

26 Тогда павел поемь мужы оны, на утрие с ними очищься вниде во святилище, возвeщая исполнение дний очищения, дондеже принесено бысть за единаго коегождо их приношение.

27 И якоже хотяху седмь дний скончатися, иже от асии иудее, видeвше его во святилищи, навадиша весь народ и возложиша нань руцe,

28 вопиюще: мужие Израилстии, помозите: сей есть человeк, иже на люди и закон и на мeсто сие всeх всюду учит: еще же и еллины введе в церковь и оскверни святое мeсто сие.

29 Бяху бо видeли трофима ефесянина во градe с ним, егоже мняху, яко в церковь ввел есть павел.

30 Подвижеся же град весь, и бысть стечение людем: и емше павла, влечаху его вон из церкве, и абие затворишася двери.

31 Ищущым же им убити его, взыде вeсть к тысящнику спиры, яко весь возмутися иерусалим:

32 он же абие поим воины и сотники, притече на ня: они же видeвше тысящника и воины, престаша бити павла.

33 Приступль же тысящник ят его и повелe связати его веригома желeзнома двeма, и вопрошаше: кто убо есть и что есть сотворил.

34 Друзии же ино нeчто вопияху в народe: не могий же разумeти извeстное молвы ради, повелe отвести его в полк.

35 Егда же бысть на степенех, прилучися воздвижену быти ему от воин нужды ради народа,

36 послeдоваше бо множество людий зовущих: возьми его.

37 Хотя же внити в полк павел глагола тысящнику: аще лeть ми есть глаголати что тебe? Он же рече: гречески умeеши ли?

38 не ты ли еси египтянин, прежде сих дний превeщавый и изведый в пустыню четыри тысящы мужей сикарей?

39 Рече же павел: аз человeк убо есмь иудеанин, тарсянин, славнаго града в киликии житель: молю же тя, повели ми глаголати к людем.

40 Повелeвшу же ему, павел стоя на степенех помаав рукою к людем: многу же безмолвию бывшу, возгласи еврейским языком, глаголя:

<55>22

1 Мужие братие и отцы, услышите мой к вам нынe отвeт.

2 Слышавше же, яко еврейским языком возгласи к ним, паче приложиша безмолвие. И рече:

3 аз убо есмь муж иудеанин, родився в тарсe киликийстeм, воспитан же во градe сем при ногу гамалиилову, наказан извeстно отеческому закону, ревнитель сый Божий, якоже вси вы есте днесь:

4 иже сей путь гоних даже до смерти, вяжя и предая в темницу мужы же и жены,

5 якоже и архиерей свидeтелствует ми и вси старцы: от нихже и послания приемь к живущым в дамасцe братиям, идях привести сущыя тамо связаны во иерусалим, да мучатся.

6 Бысть же ми идущу и приближающуся к дамаску в полудне, внезапу с небесе облиста свeт мног окрест мене.

7 Падох же на землю и слышах глас глаголющь ми: савле, савле, что мя гониши?

8 Аз же отвeщах: кто еси, Господи? рече же ко мнe: аз есмь Иисус назорей, егоже ты гониши.

9 Со мною же сущии свeт убо видeша и пристрашни быша, гласа же не слышаша глаголющаго ко мнe.

10 Рекох же: что сотворю, Господи? Господь же рече ко мнe: востав иди в дамаск, и тамо речется ти о всeх, яже вчинено ти есть творити.

11 И якоже не видeх от славы свeта онаго, за руку ведомь от сущих со мною, внидох в дамаск.

12 Ананиа же нeкий, муж благоговeин по закону, свидeтелствован от всeх живущих в дамасцe иудей,

13 пришед ко мнe и став рече ми: савле брате, прозри. И аз в той час воззрeх нань.

14 Он же рече ми: Бог отец наших изволи (предизбра) тя разумeти хотeние его, и видeти првдника, и слышати глас от уст его:

15 яко будеши ему свидeтель у всeх человeков о сих, яже видeл еси и слышал:

16 и нынe что медлиши? востав крестися и омый грeхи твоя, призвав имя Господа Иисуса.

17 Бысть же возвратившумися во иерусалим и молящумися в церкви, быти во изступлении

18 и видeти его глаголюща ми: потщися и изыди скоро из иерусалима, зане не приимут свидeтелства твоего, еже о мнe.

19 И аз рeх: Господи, сами вeдят, яко аз бeх всаждая в темницу и бия по сонмищих вeрующыя в тя,

20 и егда изливашеся кровь стефана свидeтеля твоего, и сам бeх стоя и соизволяя убиению его и стрегий риз убивающих его.

21 И рече ко мнe: иди, яко аз во языки далече послю тя.

22 Послушаху же его даже до сего словесе и воздвигоша глас свой, глаголюще: возьми от земли таковаго, не подобает бо ему жити.

23 Вопиющым же им и мещущым ризы и прах возметающым на воздух,

24 повелe тысящник отвести его в полк, рек ранами истязати его, да разумeет, за кую вину тако вопияху нань.

25 И якоже протягоша его вервьми, рече к стоящему сотнику павел: человeка римлянина и неосуждена лeть ли есть вам бити?

26 Слышав же сотник, приступи к тысящнику, сказа, глаголя: виждь, что хощеши сотворити? человeк бо сей римлянин есть.

27 Приступль же тысящник рече ему: глаголи ми, римлянин ли еси ты? Он же рече: ей.

28 Отвeща же тысящник: аз многою цeною нарeчение жителства сего стяжах. Павел же рече: аз же и родихся в нем.

29 Абие убо отступиша от него хотящии его истязати, и тысящник же убояся, разумeв, яко римлянин есть, и яко бe его связал.

30 На утрие же, хотя разумeти истину, чесо ради оклеветается от иудей, разрeши его от уз и повелe приити архиереем и всему собору их: и свед павла, постави (его) пред ними.

<55>23

1 Воззрeв же павел на сонм, рече: мужие братие, аз всею совeстию благою жителствовах пред Богом даже до сего дне.

2 Архиерей же ананиа повелe предстоящым ему бити его уста.

3 Тогда павел рече к нему: бити тя имать Бог, стeно повапленая: и ты сeдиши судя ми по закону, преступая же закон велиши, да биют мя.

4 Предстоящии же рeша: архиерею ли Божию досаждаеши?

5 Рече же павел: не вeдах, братие, яко архиерей есть: писано бо есть: князю людий твоих да не речеши зла.

6 Разумeв же павел, яко едина часть есть саддукей, другая же фарисей, воззва в сонмищи: мужие братие, аз фарисей есмь, сын фарисеов: о уповании и о воскресeнии мертвых аз суд приемлю.

7 Се же ему рекшу, бысть распря между саддукеи и фарисеи, и раздeлися народ:

8 саддукее бо глаголют не быти воскресeния, ни ангела, ни духа: фарисее же исповeдуют обоя.

9 Бысть же кличь велик, и воставше книжницы части фарисейския пряхуся между собою, глаголюще: ни едино зло обрeтаем в человeцe сем: аще же дух глагола ему или ангел, не противимся Богу.

10 Мнозe же бывшей распри, бояся тысящник, да не растерзан будет павел от них, повелe воином снити и восхитити его от среды их и вести (его) в полк.

11 В наставшую же нощь представ ему Господь, рече: дерзай, павле: якоже бо свидeтелствовал еси яже о мнe во иерусалимe, сице ти подобает и в римe свидeтелствовати.

12 Бывшу же дню, сотворше нeцыи от иудей совeт (навeт), закляша себе, глаголюще не ясти ни пити, дондеже убиют павла:

13 бяху же множае четыредесятих сию клятву сотворшии,

14 иже приступльше ко архиереем и старцем, рeша: клятвою прокляхом себе ничтоже вкусити, дондеже убием павла:

15 нынe убо вы скажите тысящнику с собором, яко да утрe сведет его к вам, аки бы хотяще разумeти извeстнeе яже о нем: мы же, прежде даже не приближитися ему, готови есмы убити его.

16 Слышав же сын сестры павловы ков, пришед и вшед в полк, сказа павлу.

17 Призвав же павел единаго от сотник, рече: юношу сего отведи к тысящнику: имать бо нeчто сказати ему.

18 Он же убо поим его приведе к тысящнику и рече: узник павел призвав мя, умоли сего юношу привести к тебe, имуща нeчто глаголати тебe.

19 Поим же его за руку тысящник и отшед на единe, вопрошаше его: что есть, еже имаши возвeстити ми?

20 Рече же, яко иудее совeщаша умолити тя, яко да утрe сведеши павла к ним в собор, аки бы хотящым извeстнeе истязати яже о нем:

21 ты убо не послушай их: ловят бо его от них мужие множае четыредесяти, иже закляша себе ни ясти ни пити, дондеже убиют его: и нынe готови суть, чающе обeщания, еже от тебе.

22 Тысящник убо отпусти юношу, завeщав ни единому же повeдати, яко сия явил еси мнe.

23 И призвав два нeкия от сотник, рече: уготовита (ми) воинов вооруженных двeстe, яко да идут до кесарии, и конник седмьдесят, и стрeлец двeстe, от третияго часа нощи:

24 и скоты привести, да всадивше павла проводят до филикса игемона.

25 Написа же (и) послание имущее образ сей:

26 клавдий лисиа державному игемону филиксу радоватися:

27 мужа сего ята от иудей и имуща убиена быти от них, приступль с воины отях его, увeдeв, яко римлянин есть:

28 хотя же разумeти вину, еяже ради поимаху нань, сведох его в сонмище их:

29 егоже обрeтох оглаголуема о взыскании закона их, ни едино же достойно смерти или узам согрeшение имуща:

30 сказану же бывшу ми кову хотящу быти от иудей на мужа сего, абие послах (его) к тебe, завeщав и клеветником (его) глаголати пред тобою, яже нань: здрав буди.

31 Воини же убо по повелeнному им, вземше павла, ведоша об нощь во антипатриду:

32 во утрие же, оставльше конники ити с ним, возвратишася в полк.

33 Они же пришедше в кесарию и вдавше послание игемону, представиша ему и павла.

34 Прочет же игемон послание и вопрошь, от коея области есть, и увeдeв, яко от киликии, рече:

35 услышу о тебe, егда и клеветницы твои приидут. И повелe в преторe иродовe стрещи его.

<55>24

1 По пятих же днех сниде архиерей ананиа со старцы и с ритором нeкиим тертиллом, иже сказаша игемону о павлe.

2 Призвану же бывшу ему, начат клеветати тертилл, глаголя:

3 мног мир улучающе тобою, и исправления бываемая языку сему твоим промышлением, всяким же образом и вездe приемлем, державный филиксе, со всяким благодарением:

4 но да не множае стужаю тебe, молю тя послушати нас вкратцe твоею кротостию:

5 обрeтохом бо мужа сего губителя и движуща противление всeм иудеем живущым по вселеннeй и предстателя (суща) назорейстeй ереси,

6 иже и церковь покусися осквернити, егоже и яхом и по закону нашему хотeхом судити ему:

7 пришед же лисиа тысящник, многою силою от рук наших исхити его и к тебe посла,

8 повелeв (и нам) поемлющым нань ити к тебe: от негоже возможеши сам разсудив о всeх сих познати, о нихже мы поемлем нань.

9 Сложишася же и иудее, глаголюще сим тако быти.

10 Отвeща же павел, поманувшу ему игемону глаголати: от многих лeт суща тя судию праведна языку сему свeдый, благодушнeе яже о мнe отвeщаю,

11 могущу ти разумeти, яко не множае ми есть дний дванадесятих, отнелeже взыдох поклонитися во иерусалим:

12 и ни в церкви обрeтоша мя к кому глаголюща или разврат творяща народу, ни в сонмищих, ни во градe,

13 ниже довести могут, елика тебe нынe на мя глаголют:

14 исповeдую же тебe сие, яко в пути, егоже сии глаголют ересь, тако служу отеческому Богу, вeруя всeм сущым в законe и пророцeх писаным,

15 упование имый на Бога, яко воскресeние хощет быти мертвым, првдником же и грeшником, егоже и сами сии чают:

16 о сем же и аз подвизаюся, непорочну совeсть имeти всегда пред Богом же и человeки:

17 по лeтeх же многих приидох сотворити милостыни во язык мой и приношения:

18 в нихже обрeтоша мя очищенна в церкви, ни с народом, ниже с молвою,

19 нeцыи от асии иудее, имже подобаше пред тя приити и глаголати, аще имут что на мя:

20 или сами тии да глаголют, аще кую обрeтоша во мнe неправду, ставшу ми в сонмищи,

21 развe единаго сего гласа, имже возопих стоя в них, яко о воскресeнии мертвых аз суд приемлю днесь от вас.

22 Слышав же сия филикс отвeща (отрече) им, извeстнeе увeдeв яже о пути сем, глаголя: егда лисиа тысящник приидет, разсужду яже о вас.

23 Повелe же сотнику стрещи павла, и имeти ослабу, и ни единому же возбраняти от своих ему служити или приходити к нему.

24 По днех же нeкиих пришед филикс со друсиллиею женою своею сущею иудеанынею, призва павла, да слышит от него вeру, яже во Христа Иисуса.

25 Глаголющу же ему о правдe и о воздержании и о судe хотящем быти, пристрашен быв филикс отвeща: нынe убо иди, время же получив призову тя.

26 Вкупe же и надeяся, яко мзда дастся ему от павла, яко да отпустит его: тeмже и часто призывая его, бесeдоваше с ним.

27 Двeма же лeтома скончавшемася прият измeнение филикс поркиа фиста: хотя же угодное сотворити иудеем филикс, остави павла связана.

<55>25

1 Фист же убо приимь власть, по триех днех взыде во иерусалим от кесарии.

2 Сказаша же ему архиерее и первии от иудей на павла и моляху его,

3 просяще благодати нань, яко да послет его во иерусалим, ков творяще, яко да убиют его на пути.

4 Фист же повелe павла стрещи в кесарии, сам тамо хотя вскорe изыти:

5 иже убо сильнии в вас, рече, со мною шедше, аще есть кая неправда в мужи сем, да глаголют нань.

6 Пребыв же у них не множае десяти дний, сниде в кесарию: на утрие сeд на судищи, повелe павла привести.

7 Приведену же бывшу ему, окрест сташа иже от иерусалима сшедшии иудее, многи и тяжки вины приносяще на павла, ихже не можаху изявити:

8 отвeщавающу ему, яко ни на закон иудейский, ни на церковь, ни на кесаря что согрeших.

9 Фист же хотя угодное иудеем сотворити, отвeщав павлови рече: хощеши ли, во иерусалим возшед, тамо о сих суд прияти от мене?

10 Рече же павел: на судищи кесаревe стоя есмь, идeже ми достоит суд прияти: иудей ни чимже обидeх, якоже и ты добрe вeси:

11 аще бо неправдую или достойно смерти сотворих что, не отмещуся умрети: аще ли же ничтоже есть во мнe, еже сии на мя клевещут, никтоже мя может тeм выдати: кесаря нарицаю.

12 Тогда фист состязався с совeтники, отвeща: кесаря ли нарекл еси? к кесарю пойдеши.

13 Днем же минувшым нeким, агриппа царь и верникиа снидоста в кесарию цeловати фиста.

14 И якоже многи дни пребыста ту, фист сказа царю яже о павлe, глаголя: муж нeкий есть оставлен от филикса узник,

15 о немже, бывшу ми во иерусалимe, явиша архиерее и старцы иудейстии, просяще нань суда.

16 К нимже отвeщах, яко нeсть обычай римляном выдати человeка коего на погибель, прежде даже оклеветаемый не имать пред лицем клевещущих его и мeсто отвeта приимет о своем согрeшении.

17 Сшедшымся же им здe, закоснeние ни едино сотворь, на утрие сeд на судищи, повелeх привести мужа.

18 Окрест же его ставше клеветницы, ни едину вину, яже аз непщевах, нанесоша:

19 стязания же нeкая о своей различнeй вeрe имяху к нему и о нeкоем Иисусe умершем, егоже глаголаше павел жива быти.

20 Недоумeяся же аз о взыскании сих, глаголах, аще хощет ити во иерусалим и тамо суд прияти о сих.

21 Павлу же нарекшу блюдену быти ему до разсуждения августа, повелeх блюсти его, дондеже послю его к кесарю.

22 Агриппа же к фисту рече: хотeл бых и сам человeка сего слышати. Он же рече: утрe услышиши его.

23 На утрие же пришедшу агриппe и верникии со многою гордостию и вшедшым в судебную палату с тысящники и с нарочитыми мужи града, и повелeвшу фисту, приведен бысть павел.

24 И рече фист: агриппо царю и вси сущии с нами мужие, видите сего, о немже все множество иудей стужаху ми во иерусалимe же и здe, вопиюще, яко не подобает жити ему ктому:

25 аз же разумeв ничтоже достойно смерти сотворша его, и самому же сему нарекшу севаста, судих послати его:

26 о немже извeстное что писати господину не имам: тeмже и приведох его пред вас, наипаче же пред тя, агриппо царю, яко да разсуждению бывшу имам что писати:

27 безсловесно бо мнится ми, посылающу юзника, а вины, яже нань, не сказати.

<55>26

1 Агриппа же к павлу рече: повелeвается ти о себe самому глаголати. Тогда павел простер руку отвeщаваше:

2 о всeх, о нихже оклеветаемь есмь от иудей, царю агриппо, непщую себе блаженна быти, яко пред тобою отвeщати днесь имам,

3 паче же вeдца тя суща свeдый всeх иудейских обычаев и взысканий. Тeмже молюся ти долготерпeливно послушати мене.

4 Житие убо мое еже от юности, исперва бывшее во языцe моем во иерусалимe, вeдят вси иудее,

5 вeдяще мя исперва, аще хотят свидeтелствовати, яко по извeстнeй ереси нашея вeры жих фарисей.

6 И нынe о уповании обeтования, бывшаго от Бога ко отцем нашым, стою судимь,

7 в неже обанадесяте колeна наша безпрестани день и нощь служаще надeются доити: о немже уповании оклеветаемь есмь, царю агриппо, от иудей.

8 Что? Невeрно ли судится вами, яко Бог мертвыя возставляет?

9 Аз убо мнeх, яко подобает ми многа сопротивна противу имене Иисуса назореа сотворити:

10 еже и сотворих во иерусалимe, и многи от святых аз в темницах затворях, власть от архиерей приемь: убиваемым же им прилагах совeт:

11 и на всeх сонмищих множицею мучя их, принуждах хулити: преизлиха же враждуя на них, гонях даже и до внeшних градов.

12 В нихже идый в дамаск со властию и повелeнием, еже от архиерей,

13 в полудни на пути видeх, царю, с небесе паче сияния солнечнаго осиявший мя свeт и со мною идущих.

14 Всeм же падшым нам на землю, слышах глас глаголющь ко мнe и вeщающь еврейским языком: савле, савле, что мя гониши? жестоко ти есть противу рожна прати.

15 Аз же рeх: кто еси, Господи? Он же рече: аз есмь Иисус, егоже ты гониши:

16 но востани и стани на ногу твоею: на се бо явихся ти, сотворити тя слугу и свидeтеля, яже видeл еси и яже явлю тебe,

17 изимая тя от людий иудейских и от язык, к нимже аз тя послю,

18 отверсти очи их, да обратятся от тмы в свeт и от области сатанины к Богу, еже прияти им оставление грeхов и достояние во святых вeрою, яже в мя.

19 Тeмже, царю агриппо, не бых противен небесному видeнию,

20 но сущым в дамасцe прежде и во иерусалимe, и во всяцeй странe иудейстей и языком проповeдую покаятися и обратитися к Богу, достойна покаянию дeла творяще.

21 Сих ради мя иудее емше во святилищи хотяху растерзати.

22 Помощь убо улучив яже от Бога, даже до дне сего стою, свидeтелствуя малу же и велику, ничтоже вeщая, развe яже пророцы рекоша хотящая быти и моисей,

23 яко Христос имeяше пострадати, яко первый от воскресeния мертвых свeт хотяше проповeдати людем (иудейским) и языком.

24 Сия же ему отвeщавающу, фист велиим гласом рече: бeснуешися ли, павле? многия тя книги в неистовство прелагают.

25 Он же: не бeснуюся, рече, державный фисте, но истины и цeломдрия глаголы вeщаю:

26 вeсть бо о сих царь, к немуже и с дерзновением глаголю: утаитися бо ему от сих не вeрую ничесомуже, нeсть бо во углe сотворено сие:

27 вeруеши ли, царю агриппо, пророком? вeм, яко вeруеши.

28 Агриппа же к павлу рече: вмалe мя препираеши Христианина быти.

29 Павел же рече: молил убо бых Бога, и вмалe и во мнозe, не токмо тебе, но и всeх слышащих мя днесь, быти им тацeм, яков и аз есмь, кромe уз сих.

30 И сия рекшу ему, воста царь и игемон, и верникиа и сeдящии с ними,

31 и отшедше бесeдоваху друг ко другу, глаголюще, яко ничтоже смерти достойно или уз творит человeк сей.

32 Агриппа же фисту рече: отпущен быти можаше человeк сей, аще не бы кесаря нарицал. И тако суди игемон послати его к кесарю.

<55>27

1 И якоже суждено бысть отплыти нам во италию, предаху павла же и иныя нeкия юзники сотнику, именем иулию, спиры севастийския.

2 Вшедше же в корабль адрамитский, восхотeвше плыти во асийская мeста, отвезохомся, сущу с нами аристарху македонянину от солуня.

3 В другий же пристахом в сидонe: человeколюбие же иулий павлови дeя, повелe к другом шедшу прилeжание (пособие) улучити.

4 И оттуду отвезшеся приплыхом в кипр, зане вeтри бяху противни:

5 пучину же, яже противу киликии и памфилии, преплывше, приидохом в миры ликийския.

6 И тамо обрeт сотник корабль александрийский пловущь во италию, всади ны в онь.

7 Во многи же дни косно плавающе и едва бывше противу книда, не оставляющу нас вeтру, приплыхом под крит при салмонe:

8 едва же избирающе край, приидохом на мeсто нeкое, нарицаемое доброе пристанище, емуже близ бe град ласей.

9 Многу же времени минувшу и сущу уже небезбeдну плаванию, занеже и пост уже бe прешел, совeтоваше павел,

10 глаголя им: мужие, вижду, яко с досаждением и многою тщетою не токмо бремене и корабля, но и душ наших хощет быти плавание.

11 Сотник же кормчия и навклира послушаше паче, нежели павлом глаголемых.

12 Не добру же пристанищу сущу ко озимeнию, мнози совeт даяху отвезтися оттуду, аще како возмогут, достигше финикии, озимeти в пристанищи критстeм, зрящем к ливу и к хору.

13 Дхнувшу же югу, мнeвше волю свою улучити, воздвигше вeтрила, плыху вскрай крита.

14 Не по мнозe же возвeя противен ему вeтр бурен, нарицаемый евроклидон.

15 Восхищену же бывшу кораблю и не могущу сопротивитися вeтру, вдавшеся волнам носими бeхом.

16 Остров же нeкий мимотекше, нарицающься клавдий, едва возмогохом удержати ладию:

17 юже востягше, всяким образом помогаху, подтверждающе корабль: боящеся же, да не в сирть (в мелкая мeста) впадут, низпустивше парус, сице носими бeху.

18 Вельми же обуреваемым нам, на утрие изметание творяху,

19 и в третий день своими руками ядрило корабленое извергохом.

20 Ни солнцу же, ни звeздам явльшымся на многи дни, и зимe не малe належащей, прочее отимашеся надежда вся, еже спастися нам.

21 Многу же неядению сущу, тогда став павел посредe их, рече: подобаше убо, о!, мужие, послушавше мене, не отвезтися от крита и избыти досаждения сего и тщеты:

22 и се, нынe молю вы благодушствовати, погибель бо ни единeй души от вас будет, развe корабля:

23 предста бо ми в сию нощь ангел Бога, егоже аз есмь, емуже и служу,

24 глаголя: не бойся, павле, кесарю ти подобает предстати, и се, дарова тебe Бог вся плавающыя с тобою.

25 Тeмже дерзайте, мужие, вeрую бо Богови, яко тако будет, имже образом рeчено ми бысть:

26 во остров же нeкий подобает нам пристати.

27 И егда четвертаянадесять нощь бысть, носимым нам во адриатстeй (пучинe), в полунощи непщеваху корабленицы, яко приближаются к нeкоей странe,

28 и измeривше глубину обрeтоша саженей двадесять: мало же прешедше и паки измeривше, обрeтоша саженей пятьнадесять.

29 Боящеся же, да не како в прудная мeста впадут, от носа корабля вергше котвы четыри, моляхомся, да день будет.

30 Кораблеником же ищущым бeжати из корабля и низвeсившым ладию в море, извeтом аки от носа хотящым котвы простерти,

31 рече павел сотнику и воином: аще не сии пребудут в корабли, вы спастися не можете.

32 Тогда воини отрeзаша ужя ладии и оставиша ю отпасти.

33 Егда же хотяше день быти, моляше павел всeх, да приимут пищу, глаголя: четыренадесятый днесь день ждуще, не ядше пребываете, ничтоже вкусивше:

34 тeмже молю вас прияти пищу, се бо к вашему спасению есть: ни единому бо от вас влас главы отпадет.

35 Рек же сия и приемь хлeб, благодари Бога пред всeми и преломль начат ясти.

36 Благонадежни же бывше вси, и тии прияша пищу:

37 бe же в корабли всeх душ двeстe седмьдесят и шесть.

38 Насыщшеся же брашна, облегчиша корабль, изметающе пшеницу в море.

39 Егда же день бысть, земли не познаваху: нeдро же нeкое усмотрeша имущее песок (брег), в неже, аще мощно есть, совeщаша извлещи корабль.

40 И котвы собравше, везяхуся по морю: купно ослабивше ужя кормилом и воздвигше малое вeтрило к дышущему вeтрецу, везохомся на край (брег).

41 Впадше же в мeсто исопное, увязиша корабль: и нос убо увязший пребысть недвижимь, кормило же разбивашеся от нужды волн.

42 Воином же совeт бысть, да узники убиют, да не кто поплыв избeгнет.

43 Сотник же, хотя соблюсти павла, возбрани совeту их, повелe же могущым плавати, да изскочивше первeе изыдут на край,

44 а прочии, ови убо на дщицах, ови же на нeчем от корабля. И тако бысть всeм спастися на землю.

<55>28

1 Спасени же бывше иже с павлом от корабля (от плавания), тогда разумeша, яко остров мелит нарицается.

2 Варвари же творяху не малое милосердие нам: возгнeщше бо огнь, прияша всeх нас, за настоящий дождь и зиму.

3 Сгромаждшу же павлу рождия множество и возложившу на огнь, ехидна от теплоты изшедши, сeкну в руку его.

4 И егда видeша варвари висящу змию от руки его, глаголаху друг ко другу: всяко убийца есть человeк сей, егоже спасена от моря суд Божий жити не остави.

5 Той же убо, оттряс змию во огнь, ничтоже зло пострада.

6 Они же чаяху его имуща возгорeтися, или пасти внезапу мертва: на мнозe же того чающым и ничтоже зло в нем бывшее видящым, претворшеся, глаголаху Бога того быти.

7 Окрест же мeста онаго бяху села перваго во островe, именем поплиа, иже приимь нас, три дни любезнe учреди.

8 Бысть же отцу поплиеву огнем и водным (кровным) трудом одержиму лежати: к немуже павел вшед, и помолився, и возложь руцe свои нань, исцeли его.

9 Сему же бывшу, и прочии имущии недуги во островe том прихождаху и исцeлeвахуся:

10 иже и многими честьми почтоша нас, и отвозящымся нам яже на потребу вложиша.

11 По триех же мeсяцeх отвезохомся в корабли александрийстeм, подписаном диоскуры, презимeвшем во островe,

12 и доплывше в сиракусы, пребыхом дни три:

13 оттуду же отплывше, приидохом в ригию, и по единeм дни возвeявшу югу, во вторый день приидохом в потиолы,

14 идeже обрeтше братию, умолени быхом от них пребыти дний седмь: и тако в рим идохом.

15 И от тамо братия, слышавше яже о нас, изыдоша во срeтение наше даже до аппиева торга и триех корчемниц: ихже видeв павел и благодарив Бога, прият дерзновение.

16 Егда же приидохом в рим, сотник предаде узники воеводe, павлу же повелe пребывати о себe, с соблюдающим его воином.

17 Бысть же по днех триех, созва павел сущыя от иудеев первыя: сшедшымся же им, глаголаше к ним: мужие братие, аз ничтоже противно сотворив людем или обычаем отеческим, узник от иерусалимлян предан бых в руцe римляном,

18 иже разсудивше яже о мнe, хотяху пустити, зане ни едина вина смертная бысть во мнe:

19 сопротив же глаголющым иудеем, нужда ми бысть нарещи кесаря, не яко язык мой имeя в чесом оклеветати:

20 сея ради убо вины умолих вас, да вижду и бесeдую: надежды бо ради Израилевы веригами сими обложен есмь.

21 Они же к нему рeша: мы ниже писания о тебe прияхом от иудей, ниже пришед кто от братий возвeсти или глагола что о тебe зло:

22 молимся же, да слышим от тебе, яже мудрствуеши: о ереси бо сей (о учении бо сем) вeдомо есть нам, яко всюду сопротив глаголемо есть.

23 Уставивше же ему день, приидоша к нему в странноприемницу множайшии, имже сказаше свидeтелствуя царствие Божие и увeряя их, яже о Иисусe, от закона моисеова и пророк, от утра даже до вечера.

24 И ови убо вeроваху глаголемым, ови же не вeроваху.

25 Несогласни же суще друг ко другу, отхождаху, рекшу павлу глагол един, яко добрe Дух святый глагола исаием пророком ко отцем нашым,

26 глаголя: иди к людем сим и рцы: слухом услышите и не имате разумeти: и видяще узрите и не имате видeти:

27 одебелe бо сердце людий сих, и ушима тяжко слышаша, и очи свои смежиша, да не како увидят очима, и ушима услышат, и сердцем уразумeют, и обратятся, и исцeлю их.

28 Вeдомо убо да будет вам, яко языком послася спасeние Божие, сии и услышат.

29 И сия тому рекшу, отидоша иудее, многое имуще между собою состязание.

30 Пребысть же павел два лeта исполнь своею мздою (цeла два лeта на своем иждивении) и приимаше вся приходящыя к нему,

31 проповeдуя царствие Божие и учя яже о Господe нашем Иисусe Христe со всяким дерзновением невозбранно.