1 Еже бe исперва, еже слышахом, еже видeхом очима нашима, еже узрeхом, и руки нашя осязаша, о словеси животнeм:
2 и живот явися, и видeхом, и свидeтельствуем, и возвeщаем вам живот вeчныи, иже бe у Отца и явися нам:
3 еже видeхом и слышахом, повeдаем вам, да и вы общение имате с нами: общение же наше со Отцем и с Сыном его Иисусом Христом.
4 И сия пишем вам, да радость ваша будет исполнена.
5 И сие есть обeтование, еже слышахом от него и повeдаем вам, яко Бог свeт есть, и тмы в нем нeсть ни единыя.
6 Аще речем, яко общение имамы с ним, и во тмe ходим, лжем и не творим истины:
7 аще же во свeтe ходим, якоже сам той есть во свeтe, общение имамы друг ко другу, и кровь Иисуса Христа Сына его очищает нас от всякаго грeха.
8 Аще речем, яко грeха не имамы, себе прельщаем, и истины нeсть в нас.
9 Аще исповeдаем грeхи нашя, вeрен есть и праведен, да оставит нам грeхи нашя и очистит нас от всякия неправды.
10 Аще речем, яко не согрeшихом, лжа творим его, и слово его нeсть в нас.
1 Чадца моя, сия пишу вам, да не согрeшаете: и аще кто согрeшит, ходатая имамы ко Отцу, Иисуса Христа праведника:
2 и той очищение есть о грeсeх наших, не о наших же точию, но и о всeго мира.
3 И о сем разумeем, яко познахом его, аще заповeди его соблюдаем.
4 Глаголяй, яко познах его, и заповeди его не соблюдает, ложь есть, и в сем истины нeсть:
5 а иже аще соблюдает слово его, поистиннe в сем любы Божия совершенна есть: о сем разумeем, яко в нем есмы.
6 Глаголяй, в нем пребывати, должен есть, якоже он ходил есть, и сей такожде да ходит.
7 Возлюбленнии, не заповeдь нову пишу вам, но заповeдь ветху, юже имeсте исперва. Заповeдь ветха есть слово, еже слышасте исперва.
8 Паки заповeдь нову пишу вам, еже есть поистиннe в нем и в вас: яко тма мимоходит и свeт истинный сей уже сияет.
9 Глаголяй себе во свeтe быти, а брата своего ненавидяй, во тмe есть доселe.
10 Любяй брата своего во свeтe пребывает, и соблазна в нем нeсть.
11 А ненавидяй брата своего во тмe есть, и во тмe ходит, и не вeсть, камо идет, яко тма ослeпи очи ему.
12 Пишу вам, чадца, яко оставляются вам грeси имене его ради.
13 Пишу вам, отцы, яко познасте безначалнаго. Пишу вам, юноши, яко побeдисте лукаваго. Пишу вам, дeти, яко познасте Отца.
14 Писах вам, отцы, яко познасте исконнаго: писах вам, юноши, яко крeпцы есте, и слово Божие в вас пребывает, и побeдисте лукаваго.
15 Не любите мира, ни яже в мирe: аще кто любит мир, нeсть любве Отчи в нем:
16 яко все, еже в мирe, похоть плотская и похоть очима и гордость житейская, нeсть от Отца, но от мира сего есть.
17 И мир преходит, и похоть его, а творяй волю Божию пребывает во вeки.
18 Дeти, послeдняя година есть. И якоже слышасте, яко антихрист грядет, и нынe антихристи мнози быша, от сего разумeваем, яко послeдний час есть.
19 От нас изыдоша, но не бeша от нас: аще бы от нас были, пребыли убо быша с нами: но да явятся, яко не суть вси от нас.
20 И вы помазание имате от святаго, и вeсте вся.
21 Не писах вам, яко не вeсте истины, но яко вeсте ю и яко всяка лжа от истины нeсть.
22 Кто есть лживый, точию отметаяйся, яко Иисус нeсть Христос? Сей есть антихрист, отметаяйся Отца и Сына.
23 Всяк отметаяйся Сына, ни Отца имать: а исповeдаяй Сына, и Отца имать.
24 Вы убо еже слышасте исперва, в вас да пребывает: (и) аще в вас пребудет, еже исперва слышасте, и вы в Сынe и Отцe пребудете.
25 И сие есть обeтование, еже сам обeща нам, живот вeчный.
26 Сия писах вам о льстящих вас.
27 И вы еже помазание приясте от него, в вас пребывает, и не требуете, да кто учит вы: но яко то само помазание учит вы о всем, и истинно есть, и нeсть ложно: и якоже научи вас, пребывайте в нем.
28 И нынe, чадца, пребывайте в нем, да егда явится, имамы дерзновение и не посрамимся от него в пришествии его.
29 Аще вeсте, яко праведник есть, разумeйте, яко всяк творяй правду от него родися.
1 Видите, какову любовь дал есть Отецнам, да чада Божия наречемся, и будем. Сего ради мир не знает нас, зане не позна его.
2 Возлюбленнии, нынe чада Божия есмы, и не у явися, что будем: вeмы же, яко, егда явится, подобни ему будем, ибо узрим его, якоже есть.
3 И всяк имeяй надежду сию нань, очищает себе, якоже он чист есть.
4 Всяк творяй грeх, и беззаконие творит: и грeх есть беззаконие.
5 И вeсте, яко он явися, да грeхи нашя возмет, и грeха в нем нeсть.
6 Всяк, иже в нем пребывает, не согрeшает: всяк согрeшаяй не видe его, ни позна его.
7 Чадца, никтоже да льстит вас. Творяй правду праведник есть, якоже он праведен есть.
8 Творяй грeх от диавола есть, яко исперва диавол согрeшает. Сего ради явися Сын Божий да разрушит дeла диаволя.
9 Всяк рожденный от Бога грeха не творит, яко сeмя его в нем пребывает: и не может согрeшати, яко от Бога рожден есть.
10 Сего ради явлена суть чада Божия и чада диаволя: всяк не творяй правды нeсть от Бога, и не любяй брата своего.
11 Яко се есть завeщание, еже слышасте исперва, да любим друг друга,
12 не якоже каин от лукаваго бe и закла брата своего. И за кую вину закла его? Яко дeла его лукава бeша, а брата его праведна.
13 Не чудитеся, братие моя, аще ненавидит вас мир.
14 Мы вeмы, яко преидохом от смерти в живот, яко любим братию: не любяй бо брата пребывает в смерти.
15 Всяк ненавидяй брата своего человeкоубийца есть: и вeсте, яко всяк человeкоубийца не имать живота вeчнаго в себe пребывающа.
16 О сем познахом любовь, яко он по нас душу свою положи: и мы должни есмы по братии душы полагати.
17 Иже убо имать богатство мира сего, и видит брата своего требующа, и затворит утробу свою от него, како любы Божия пребывает в нем?
18 Чадца моя, не любим словом ниже языком, но дeлом и истиною.
19 И о сем разумeем, яко от истины есмы, и пред ним смиряем сердца наша:
20 зане аще зазирает нам сердце наше, яко болий есть Бог сердца нашего и вeсть вся.
21 Возлюбленнии, аще сердце наше не зазрит нам, дерзновение имамы к Богу,
22 и егоже аще просим, приемлем от него, яко заповeди его соблюдаем и угодная пред ним творим.
23 И сия есть заповeдь его, да вeруем во имя Сына его Иисуса Христа и любим друг друга, якоже дал есть заповeдь нам.
24 И соблюдаяй заповeди его в нем пребывает, и той в нем. И о сем разумeем, яко пребывает в нас, от духа, егоже дал есть нам.
1 Возлюбленнии, не всякому духу вeруйте, но искушайте духи, аще от Бога суть: яко мнози лжепророцы изыдоша в мир.
2 О сем познавайте духа Божия и духа лестча: всяк дух, иже исповeдует Иисуса Христа во Плоти пришедша, от Бога есть:
3 и всяк дух, иже не исповeдует Иисуса Христа во Плоти пришедша, от Бога нeсть: и сей есть антихристов, егоже слышасте, яко грядет, и нынe в мирe есть уже.
4 Вы от Бога есте, чадца, и побeдисте тeх: яко болий есть иже в вас, нежели иже в мирe.
5 Они от мира суть: сего ради от мира глаголют, и мир тeх послушает.
6 Мы от Бога есмы: иже знает Бога, послушает нас, и иже нeсть от Бога, не послушает нас. О сем познаваем духа истины и духа лестча.
7 Возлюбленнии, возлюбим друг друга, яко любы от Бога есть, и всяк любяй от Бога рожден есть, и знает Бога:
8 а не любяй не позна Бога, яко Бог любы есть.
9 О сем явися любы Божия в нас, яко Сына своего единороднаго посла Бог в мир, да живи будем им.
10 О сем есть любы, не яко мы возлюбихом Бога, но яко той возлюби нас, и посла Сына своего очищение о грeсeх наших.
11 Возлюбленнии, аще сице возлюбил есть нас Бог, и мы должни есмы друг друга любити.
12 Бога никтоже нигдeже видe. Аще друг друга любим, Бог в нас пребывает, и любы его совершенна есть в нас.
13 О сем разумeем, яко в нем пребываем, и той в нас, яко от духа своего дал есть нам.
14 И мы видeхом и свидeтелствуем, яко Отец посла Сына спасителя миру.
15 Иже аще исповeсть, яко Иисус есть Сын Божии, Бог в нем пребывает, и той в Бозe.
16 И мы познахом и вeровахом любовь, юже имать Бог к нам. Бог любы есть, и пребываяй в любви в Бозe пребывает, и Бог в нем пребывает.
17 О сем совершается любы с нами, да дерзновение имамы в день судный, зане, якоже он есть, и мы есмы в мирe сем.
18 Страха нeсть в любви, но совершенна любы вон изгоняет страх, яко страх муку имать: бояйся же не совершися в любви.
19 Мы любим его, яко той первeе возлюбил есть нас.
20 Аще кто речет, яко люблю Бога, а брата своего ненавидит, ложь есть: ибо не любяй брата своего, егоже видe, Бога, егоже не видe, како может любити?
21 И сию заповeдь имамы от него, да любяй Бога любит и брата своего.
1 Всяк вeруяй, яко Иисус есть Христос, от Бога рожден есть: и всяк любяй рождшаго любит и рожденнаго от него.
2 О сем вeмы, яко любим чада Божия, егда Бога любим и заповeди его соблюдаем.
3 Сия бо есть любы Божия, да заповeди его соблюдаем: и заповeди его тяжки не суть.
4 Яко всяк рожденный от Бога побeждает мир: и сия есть побeда, побeдившая мир, вeра наша.
5 Кто есть побeждаяй мир, токмо вeруяй, яко Иисус есть Сын Божий?
6 Сей есть пришедый водою и кровию и духом, Иисус Христос, не водою точию, но водою и кровию: и дух есть свидeтелствуяй, яко дух есть истина.
7 Яко трие суть свидeтелствующии на небеси, Отец, слово и святый дух: и сии три едино суть.
8 И трие суть свидeтелствующии на земли, дух и вода и кровь: и трие во едино суть.
9 Аще свидeтелство человeческое приемлем, свидeтелство Божие болeе есть: яко сие есть свидeтелство Божие, еже свидeтелствова о Сынe своем.
10 Вeруяй в Сына Божия имать свидeтелство в себe: не вeруяй Богови лжа сотворил есть его, яко не вeрова во свидeтелство, еже свидeтелствова Бог о Сынe своем.
11 И сие есть свидeтелство, яко живот вeчный дал есть нам Бог, и сей живот в Сынe его есть.
12 Имeяй Сына Божия имать живот: а не имeяй Сына Божия живота не имать.
13 Сия писах вам вeрующым во имя Сына Божия, да вeсте, яко живот вeчный имате, и да вeруете во имя Сына Божия.
14 И сие есть дерзновение, еже имамы к нему, яко аще чесо просим по воли его, послушает нас:
15 и аще вeмы, яко послушает нас, еже аще просим, вeмы, яко имамы прошения, ихже просихом от него.
16 Аще кто узрит брата своего согрeшающа грeх не к смерти, да просит, и даст ему живот, согрeшающым не к смерти. Есть грeх к смерти: не о том, глаголю, да молится.
17 Всяка неправда грeх есть, и есть грeх не к смерти.
18 Вeмы, яко всяк рожденный от Бога не согрeшает: но рожденный от Бога блюдет себе, и лукавый не прикасается ему.
19 Вeмы, яко от Бога есмы, и мир весь во злe лежит.
20 Вeмы же, яко Сын Божий прииде и дал есть нам (свeт и) разум, да познаем Бога истиннаго и да будем во истиннeм Сынe его Иисусe Христe: сей есть истинный Бог и живот вeчный.
21 Чадца, храните себе от треб идолских. Аминь.