1 Павел, раб Иисус Христов, зван апостол, избран в благовeстие Божие,
2 еже прежде обeща пророки своими в писаниих святых,
3 о сынe своем, бывшем от сeмене давидова по плоти,
4 нареченнeм сынe Божии в силe, по духу святыни, из воскресeния от мертвых, Иисуса Христа Господа нашего,
5 имже прияхом благодать и апостольство в послушание вeры во всeх языцeх, о имени его.
6 в нихже есте и вы, звани Иисусу Христу.
7 всeм сущым в римe возлюбленным Богу, званным святым. благодать вам и мир от Бога Отца нашего, и Господа Иисуса Христа.
8 Первое убо благодарю Бога моего Иисусом Христом о всeх вас, яко вeра ваша возвeщается во всем мирe.
9 свидeтель бо ми есть Бог, емуже служу духом моим во благовeствовании сына его, яко безпрестани память о вас творю,
10 всегда в молитвах моих моляся, аще убо когда поспeшен буду волею Божиею приити к вам.
11 желаю бо видeти вас, да нeкое подам вам дарование духовное, ко утверждению вашему.
12 сие же есть, соутeшитися в вас вeрою общею, вашею же и моею.
13 Не хощу же не вeдeти вам, братие, яко множицею восхотeх приити к вам, и возбранен бых доселe, да нeкии плод имeю и в вас, якоже и в прочих языцeх.
14 Еллином же и варвавом, мудрым же и неразумным должен есмь.
15 тако есть, еже по моему усердию и вам сущым в римe благовeстити.
16 Не стыжуся бо благовeствованием Христовым: сила бо Божия есть во спассение всякому вeрующему, иудеови же прежде и еллину.
17 Правда бо Божия в нем является от вeры в вeру, якоже есть писано. праведныи же от вeры жив будет.
18 Открывается бо гнeв Божии с небесе на всякое нечестие и неправду человeков, содержащих истину в неправдe.
19 зане разумное Божие (еже возможно разумeти о Бозe.) явe есть в них. Бог бо явил есть им:
20 невидимая бо его, от создания мира твореньми помышляема, видима суть, и присносущная сила его и божество, во еже быти им безотвeтным.
21 Занеже разумeвше Бога, не яко Бога прославиша или благодариша, но осуетишася помышлении своими, и омрачися неразумное их сердце.
22 глаголющеся быти мудри, обюродeша,
23 и измeниша славу нетлeннаго Бога в подобие образа тлeнна человeка и птиц и четвероног и гад.
24 тeмже и предаде их Бог в похотех сердец их в нечистоту, во еже сквернитися тeлесем их в себe самeх.
25 иже премeниша истину Божию во лжу, и почтоша и послужиша твари паче творца, иже есть благословен во вeки, аминь.
26 Сего ради предаде их Бог в страсти безчестия. и жены бо их измeниша естественную подобу в презестественную.
27 такожде и мужи, оставльше естественную подобу женска пола, разжегошася похотию своею друг на друга, мужи на мужех студ содeвающе, и возмездие, еже подобаше прелести их, в себe восприемлюще.
28 И якоже не искусиша имeти Бога в разумe, (сего ради) предаде их Бог в неискусен ум, творити неподобная,
29 исполненых всякия неправды, блужения, лукавства, лихоимания, злобы. исполненых зависти, убииства, рвения, льсти, злонравия.
30 шепотники, клеветники, богомерзки, досадители, величавы, горды, обрeтатели злых, родителем непокоривы,
31 неразумны, непримирительны, нелюбовны, неклятвохранительны, немилостивны.
32 Нeцыи же и оправдание Божие разумeвше, яко таковая творящии достойни смерти суть, не точию сами творят, но и соизволяют творящым.
1 Сего ради безотвeтен еси, о! человeче всяк судяй. имже бо судом судиши друга, себе осуждаеши. таяжде бо твориши судяй.
2 Вeмы же, яко суд Божии есть поистиннe на творящих таковая.
3 Помышляеши ли же сие, о! человeче, судяй таковая творящым и творя сам таяжде, яко ты избeжиши ли суда Божия,
4 Или о богатствe благости его и кротости и долготерпeнии нерадиши, не вeдый, яко благость Божия на покаяние тя ведет?
5 По жестокости же твоей и непокаянному сердцу, собираеши себe гнeв в день гнeва и откровения праведнаго суда Божия,
6 иже воздаст коемуждо по дeлом его.
7 овым убо, по терпeнию дeла благаго, славы и чести и нетлeния ищущым, живот вeчный.
8 а иже по рвению противляются убо истинe, повинуются же неправдe, ярость и гнeв.
9 Скорбь и тeснота на всяку душу человeка творящаго злое, иудеа же прежде и еллина.
10 Слава же и честь и мир всякому дeлающему благое, иудееви же прежде и еллину.
11 Нeсть бо на лица зрeния у Бога.
12 Елицы бо беззаконно (без закона) согрeшиша, беззаконно (без закона.) и погибнут. и елицы в законe согрeшиша, законом суд приимут.
13 не слышателие бо закона праведни пред Богом, но творцы закона, сии оправдятся.
14 егда бо языцы, не имуще закона, естеством законная творят, сии, закона не имуще, сами себe суть закон.
15 иже являют дeло законное написано в сердцах своих, спослушествующеи им совeсти, и между собою помыслом осуждающым или отвeщающым,
16 в день, егда судит Бог тайная человeком, по благовeстию моему, Иисусом Христом.
17 Се ты иудей именуешися, и почиваеши на законe, и хвалишися о Бозe,
18 и разумeеши волю, и разсуждаеши лучшая, научаемь от закона,
19 уповая же себе вожда быти слeпым, свeта сущым во тмe,
20 наказателя безумным, учителя младенцем, имуща образ разума и истины в законe.
21 научая убо инаго, себе ли не учиши,
22 проповeдая не красти, крадеши. глаголяи не прелюбы творити, прелюбы твориши. гнушаяся идол, святая крадеши.
23 иже в законe хвалишися, преступлением закона Бога безчествуеши.
24 Имя бо Божие вами хулится во языцeх, якоже есть писано.
25 Обрeзание бо пользует, аще закон твориши. аще же закона преступник еси, обрeзание твое необрeзание бысть.
26 Аще убо необрeзание оправдание закона сохранит, не необрeзание ли его во обрeзание вмeнится,
27 и осудит еже от естества необрeзание, закон совершающее, тебе, иже писанием и обрeзанием еси преступник закона.
28 Не бо иже явe, иудей есть, ни еже явe во плоти, обрeзание.
29 но иже в тайнe иудей, и обрeзание сердца духом, (а) не писанием: емуже похвала не от человeк, но от Бога.
1 Что убо лишшее иудею (кое убо преимущество иудеа), или кая польза обрeзания,
2 Много, по всякому образу. первeе (наипаче) бо, яко ввeрена быша им словеса Божия.
3 Что бо, аще не вeроваша нeцыи, еда (убо) невeрствие их вeру Божию упразднит,
4 Да не будет: да будет же Бог истинен, всяк же человeк ложь, якоже есть писано: яко да оправдишися во словесeх твоих, и побeдиши, внегда судити ти.
5 Аще ли неправда наша Божию правду составляет, что речем, еда ли неправедн Бог наносяй гнeв, по человeку глаголю.
6 Да не будет: понеже како судити имать Бог миру,
7 Аще бо истина Божия в моей лжи избыточествова в славу его, что еще и аз яко грeшник осуждаюся,
8 И не якоже хулимся, и якоже глаголют нeцыи нас глаголати, яко сотворим злая, да приидут благая: ихже суд правн есть.
9 Что убо, преимeем ли? Никакоже: предукорихом бо (прежде бо обвинени есмы) иудеи же и еллины вся (вси) под грeхом быти,
10 якоже есть писано. яко нeсть праведн никтоже:
11 нeсть разумeваяи, и нeсть взыскаяй Бога:
12 вси уклонишася, вкупe непотребни быша. нeсть творяй благостыню, нeсть даже до единаго.
13 Гроб отверст гортань их, языки своими льщаху. яд аспидов под устнами их.
14 ихже уста клятвы и горести полна суть.
15 Скоры ноги их пролияти кровь:
16 сокрушение и озлобление на путех их.
17 и пути мирнаго не познаша.
18 Нeсть страха Божия пред очима их.
19 Вeмы же, яко елика закон глаголет, сущым в законe глаголет: да всяка уста заградятся, и повинен будет весь мир Богови:
20 зане от дeл закона не оправдится всяка плоть пред ним. законом бо познание грeха.
21 Нынe же кромe закона правда Божия явися, свидeтельствуема от закона и пророк.
22 Правда же Божия вeрою Иисус Христовою во всeх и на всeх вeрующих: нeсть бо разнствия,
23 вси бо согрeшиша, и лишени суть славы Божия,
24 оправдаеми туне благодатию его, избавлением, еже о Христe Иисусe,
25 егоже предположи Бог очищение вeрою в крови его, в явление правды своея, за отпущение прежде бывших грeхов,
26 в долготерпeнии Божии, и в показание правды его в нынeшнее время, во еже быти ему праведну и оправдающу сущаго от вeры Иисусовы.
27 Гдe убо похвала, отгнася. Которым законом? дeлы ли? Ни, но законом вeры.
28 Мыслим убо вeрою оправдатися человeку, без дeл закона.
29 Или иудеев Бог токмо, а не и языков? Ей, и языков:
30 понеже един Бог, иже оправдит обрeзание от вeры и необрeзание вeрою.
31 Закон ли убо разоряем вeрою? Да не будет: но закон утверждаем.
1 Что убо речем авраама отца нашего обрeсти по плоти,
2 Аще бо авраам от дeл оправдася, имать похвалу, но не у Бога.
3 Что бо писание глаголет, вeрова же авраам Богови, и вмeнися ему в правду.
4 Дeлающему же мзда не вмeняется по благодати, но по долгу:
5 а не дeлающему, вeрующему же во оправдающаго нечестива, вмeняется вeра его в правду.
6 Якоже и давид глаголет блаженство человeка, емуже вмeняет Бог правду, без дeл закона:
7 блажени, ихже отпустишася беззакония и ихже прикрышася грeси:
8 блажен муж, емуже не вмeнит Господь грeха.
9 Блаженство убо сие на обрeзание ли, или на необрeзание? Глаголем бо, яко вмeнися аврааму вeра в правду.
10 Како убо вмeнися ему, во обрeзании ли сущу, или в необрeзании, не во обрeзании, но в необрeзании.
11 И знамение прият обрeзания, печать правды вeры, яже в необрeзании. яко быти ему отцу всeх вeрующих в необрeзании, во еже вмeнитися и тeм в правду.
12 и отцу обрeзания, не сущым точию от обрeзания, но и ходящым в стопах вeры, яже (бe) в необрeзании отца нашего авраама.
13 Не законом бо обeтование аврааму, или сeмени его, еже быти ему наслeднику мирови, но правдою вeры.
14 Аще бо сущии от закона наслeдницы, испразднися вeра, и разорися обeтование:
15 закон бо гнeв содeловает. идeже бо нeсть закона, (ту) ни преступления.
16 Сего ради от вeры, да по благодати, во еже быти извeстну обeтованию всему сeмени, не точию сущему от закона, но и сущему от вeры авраамовы, иже есть отец всeм нам,
17 якоже есть писано: яко отца многим языком положих тя, прямо Богу, емуже вeрова, животворящему мертвыя и нарицающу не сущая яко сущая.
18 Иже паче упования во упование вeрова, во еже быти ему отцу многим языком, по реченному: тако будет сeмя твое.
19 И не изнемог вeрою, ни усмотри своея плоти уже умерщвленныя, столeтен нeгдe сый, и мертвости ложесн сарриных:
20 во обeтовании же Божии не усумнeся невeрованием, но возможе вeрою, дав славу Богови
21 и извeстен быв, яко, еже обeща, силен есть и сотворити.
22 Тeмже и вмeнися ему в правду.
23 Не писано же бысть за того единаго точию, яко вмeнися ему,
24 но и за ны, имже хощет вмeнитися, вeрующым в воскресившаго Иисуса Христа Господа нашего из мертвых,
25 иже предан бысть за прегрeшения наша и воста за оправдание наше.
1 Оравдившеся убо вeрою, мир имамы к Богу Господем нашим Иисус Христом,
2 имже и приведение обрeтохом вeрою во благодать сию, в нейже стоим, и хвалимся упованием славы Божия.
3 Не точию же, но и хвалимся в скорбех, вeдяще, яко скорбь терпeние содeловает,
4 терпeние же искусство, искусство же упование:
5 упование же не посрамит. яко любы Божия излияся в сердца наша духом святым данным нам.
6 Еще бо Христос сущым нам немощным, по времени за нечестивых умре.
7 Едва бо за праведника кто умрет: за благаго бо негли кто и дерзнет умрети.
8 Составляет же свою любовь к нам Бог, яко, еще грeшником сущым нам, Христос за ны умре.
9 Много убо паче, оправдани бывше нынe кровию его, спасемся им от гнeва.
10 Аще бо врази бывше примирихомся Богу смертию сына его, множае паче примирившеся спасемся в животe его:
11 не точию же, но и хвалимся о Бозe Господем нашим Иисус Христом, имже нынe примирение прияхом.
12 Сего ради якоже единeм человeком грeх в мир вниде, и грeхом смерть, и тако смерть во вся человeки вниде, в немже вси согрeшиша.
13 До закона бо грeх бe в мирe. грeх же не вмeняшеся, не сущу закону.
14 Но царствова смерть от адама даже до моисеа и над несогрeшившими по подобию преступления адамова, иже есть образ будущаго.
15 Но не якоже прегрeшение, тако и дар. Аще бо прегрeшением единаго мнози умроша, множае паче благодать Божия и дар благодатию единаго человeка Иисуса Христа во многих преизлишествова.
16 И не якоже единeм согрeшшим, дарование. грeх бо из единаго во осуждение: дар же от многих прегрeшении во оправдание.
17 Аще бо единаго прегрeшением смерть царствова единeм, множае паче избыток благти и дар правды приемлюще, в жизни воцарятся единeм Иисус Христом.
18 Тeмже убо, якоже единаго прегрeшением во вся человeки вниде осуждение, такожде и единаго оправданием во вся человeки вниде оправдание жизни.
19 Якоже бо ослушанием единаго человeка грeшни быша мнози, сице и послушанием единаго праведни будут мнози.
20 Закон же привниде, да умножится прегрeшение. Идeже бо умножися грeх, преизбыточествова благодать:
21 да якоже царствова грeх во смерть, такожде и благть воцарится правдою в жизнь вeчную, Иисус Христом Господем нашим.
1 Что убо речем, пребудем ли во грeсe, да благодать преумножится? Да не будет.
2 Иже бо умрохом грeху, како паки оживем о нем (како еще жити будем в нем,)?
3 Или не разумeете, яко елицы во Христа ииса крестихомся, в смерть его крестихомся?
4 Спогребохомся убо ему крещением в смерть, да якоже воста Христос от мертвых славою Отчею, тако и мы во обновлении жизни ходити начнем (да ходим).
5 Аще бо (сообразни.) (снасаждени.) быхом подобию смерти его, то и воскресния будем,
6 сие вeдяще, яко ветхии наш человeк с ним распятся, да упразднится тeло грeховное, яко ктому не работати нам грeху.
7 умерый бо свободися от грeха.
8 Аще же умрохом со Христом, вeруем, яко и живи будем с ним,
9 вeдяще, яко Христос воста от мертвых, ктому уже не умирает. смерть им ктому не обладает.
10 Еже бо умре, грeху умре единою: а еже живет, Богови живет.
11 Такожде и вы помышляйте себе мертвых убо быти грeху, живых же Богови, о Христe Иисусe Господe нашем.
12 Да не царствует убо грeх в мертвеннeм вашем тeлe, во еже послушати его в похотех его:
13 ниже представляйте уды вашя оружия неправды грeху: но представляйте себе Богови яко от мертвых живых, и уды вашя оружия правды Богови.
14 Грeх бо вами да не обладает. нeсте бо под законом, но под благодатию.
15 Что убо, согрeшим ли, зане нeсмы под законом, но под благодатию, да не будет.
16 Не вeсте ли, яко емуже представляете себе рабы в послушание, раби есте, егоже послушаете, или грeха в смерть, или послушания в правду?
17 Благодарим убо Бога, яко бeсте раби грeху, послушасте же от сердца, в оньже и предастеся образ учения.
18 Свобождшеся же от грeха, поработистеся правдe.
19 Человeческо глаголю, за немощь плоти вашея. Якоже бо представисте уды вашя рабы нечистотe и беззаконию в беззаконие, тако нынe представите уды вашя рабы правдe во святыню.
20 Егда бо раби бeсте грeха, свободни бeсте от правды.
21 Кий убо тогда имeсте плод? О нихже нынe стыдитеся, кончина бо онeх, смерть.
22 Нынe же свобождшеся от грeха, порабощшеся же Богови, имате плод ваш во святыню, кончину же жизнь вeчную.
23 Оброцы бо грeха, смерть: дарование же Божие живот вeчный о Христe Иисусe Господe нашем.
1 Или не разумeете, братие. вeдущым бо закон глаголю: яко закон обладает над человeком, во елико время живет?
2 Ибо мужатая жена живу мужу привязана есть законом: аще ли же умрет муж ея, разрeшится от закона мужескаго.
3 Тeмже убо, живу сущу мужу, прелюбодeйца бывает, аще будет мужеви иному: аще ли умрет муж ея, свободна есть от закона, не быти ей прелюбодeйцe, бывшей мужу иному.
4 Тeмже, братие моя, и вы умросте закону тeлом Христовым, во еже быти вам иному, воставшему из мертвых, да плод принесем Богови.
5 Егда бо бeхом во плоти, страсти греховныя, яже законом, дeйствоваху во удeх наших, во еже плод творити смерти:
6 нынe же упразднихомся от закона, умерше, имже держими бeхом, яко работати нам (Богови) во обновлении духа, а не в ветхости писмене.
7 Что убо речем? закон ли грeх? Да не будет: но грeха не знах, точию законом: похоти же не вeдах, аще не бы закон глаголал. не похощеши.
8 Вину же прием грeх заповeдию, содeла во мнe всяку похоть: без закона бо грeх мертв есть.
9 Аз же живях кромe закона иногда: пришедшей же заповeди, грeх убо оживе,
10 аз же умрох: и обрeтеся ми заповeдь, яже в живот, сия в смерть,
11 грeх бо вину прием заповeдию, прельсти мя, и тою умертви мя.
12 Тeмже убо закон свят, и заповeдь свята и праведна и блага.
13 Благое ли убо бысть мнe смерть? Да не будет: но грeх, да явится грeх, благим ми содeвая смерть, да будет по премногу грeшен грeх заповeдию.
14 Вeмы бо, яко закон духовен есть: аз же плотян есмь, продан под грeх.
15 Еже бо содeваю, не разумeю: не еже бо хощу, сие творю, но еже ненавижду, то содeловаю.
16 Аще ли, еже не хощу, сие творю, хвалю закон яко добр,
17 нынe же не ктому аз сие содeваю, но живый во мнe грeх.
18 Вeм бо, яко не живет во мнe, сирeчь во плоти моей, доброе: еже бо хотeти прилежит ми, а еже содeяти доброе, не обрeтаю.
19 Не еже бо хощу доброе, творю, но еже не хощу злое, сие содeваю.
20 Аще ли, еже не хощу аз, сие творю, уже не аз сие творю, но живый во мнe грeх.
21 Обрeтаю убо закон, хотящу ми творити доброе, яко мнe злое прилежит.
22 Соуслаждаюся бо закону Божию по внутреннему человeку:
23 вижду же ин закон во удeх моих, противу воюющь закону ума моего и плeняющь мя законом грeховным, сущим во удeх моих.
24 Окаянен аз человeк: кто мя избавит от тeла смерти сея?
25 Благодарю Бога моего Иисус Христом Господем нашим. Тeмже убо сам аз умом моим работаю закону Божию, плотию же закону грeховному.
1 Ни едино убо нынe осуждение сущым о Христe Иисусe, не по плоти ходящым, но по духу:
2 закон бо духа жизни о Христe Иисусe свободил мя есть от закона грeховнаго и смерти.
3 Немощное бо закона, в немже немоществоваше плотию, Бог сына своего посла в подобии плоти грeха, и о грeсe осуди грeх во плоти,
4 да оправдание закона исполнится в нас, не по плоти ходящих, но по духу.
5 Сущии бо по плоти, плотская мудрствуют. а иже по духу, духовная.
6 Мудрование бо плотское смерть есть, а мудрование духовное живот и мир,
7 зане мудрование плотское вражда на Бога: закону бо Божию не покаряется, ниже бо может.
8 Сущии же во плоти, Богу угодити не могут.
9 Вы же нeсте во плоти, но в дусe, понеже дух Божии живет в вас. Аще же кто духа Христова не имать, сей нeсть егов.
10 Аще же Христос в вас, плоть убо мертва грeха ради, дух же живет правды ради.
11 Аще ли же дух воскресившаго Иисуса от мертвых живет в вас, воздвигии Христа из мертвых оживотворит и мертвенная тeлеса ваша, живущим духом его в вас.
12 Тeмже убо, братие, должни есмы не плоти, еже по плоти жити.
13 Аще бо по плоти живете, имате умрети, аще ли духом дeяния плотская умерщвляете, живи будете:
14 елицы бо духом Божиим водятся, сии суть сынове Божии:
15 не приясте бо духа работы паки в боязнь, но приясте духа сыноположения, о немже вопием: Авва Отче.
16 Самый дух спослушествует духови нашему, яко есмы чада Божия.
17 Аще же чада, и наслeдницы: наслeдницы убо Богу, снаслeдницы же Христу, понеже с ним страждем, да и с ним прославимся.
18 Непщую бо, яко недостойны страсти нынeшняго времене к хотящей славe явитися в нас.
19 Чаяние бо твари, откровения сынов Божиих чает:
20 суетe бо тварь повинуся не волею, но за повинувшаго ю, на уповании,
21 яко и сама тварь свободится от работы истлeния в свободу славы чад Божиих.
22 Вeмы бо, яко вся тварь с нами совоздыхает и сболeзнует даже донынe:
23 не точию же, но и сами начаток духа имуще, и мы сами в себe воздыхаем, всыновления чающе, избавления тeлу нашему.
24 Упованием бо спасохомся. упование же видимое, нeсть упование: еже бо видит кто, что и уповает?
25 Аще ли, егоже не видим, надeемся, терпeнием ждем.
26 Сице же и дух способствует нам в немощех наших: о чесом бо помолимся, якоже подобает, не вeмы, но сам дух ходатайствует о нас воздыхании неизглаголанными.
27 Испытаяй же сердца вeсть, что есть мудрование духа, яко по Богу приповeдует (ходатайствует) о святых.
28 Вeмы же, яко любящым Бога вся поспeшествуют во благое, сущым по предувeдeнию званным:
29 ихже бо предувeдe, (тeх) и предустави сообразных быти образу сына своего, яко быти ему первородну во многих братиях:
30 а ихже предустави, тeх и призва: а ихже призва, сих и оправда: а ихже оправда, сих и прослави.
31 Что убо речем к сим, аще Бог по нас, кто на ны,
32 Иже убо своего сына не пощадe, но за нас всeх предал есть его, како убо не и с ним вся нам дарствует?
33 Кто поемлет на избранныя Божия, Бог оправдаяй.
34 Кто осуждаяй? Христос Иисус умерый, паче же и воскресый, иже и есть о десную Бога, иже и ходатайствует о нас.
35 Кто ны разлучит от любве Божия, скорбь ли, или тeснота, или гонение, или глад, или нагота, или бeда, или мечь? якоже есть писано:
36 яко тебе ради умерщвляеми есмы весь день: вмeнихомся якоже овцы заколения.
37 Но во всeх сих препобeждаем за возлюбльшаго ны.
38 Извeстихся бо, яко ни смерть, ни живот, ни ангели, ни начала, ниже силы, ни настоящая, ни грядущая,
39 ни высота, ни глубина, ни ина тварь кая возможет нас разлучити от любве Божия, яже о Христe Иисусe Господe нашем.
1 Истину глаголю о Христe, не лгу, послушествующей ми совeсти моей духом святым,
2 яко скорбь ми есть велия и непрестающая болeзнь сердцу моему:
3 молил бых ся бо сам аз отлучен быти от Христа по братии моей, сродницeх моих по плоти,
4 иже суть Израилите, ихже всыновление и слава, и завeти и законоположение, и служение и обeтования:
5 ихже отцы, и от нихже Христос по плоти, сый над всeми Бог благословен во вeки, аминь.
6 Не такоже, яко отпаде слово Божие: не вси бо сущии от Израиля, сии Израиль,
7 ни зане суть сeмя авраамле, вси чада: но во исаацe, рече, наречется ти сeмя.
8 Сирeчь, не чада плотская, сия чада Божия: но чада обeтования причитаются в сeмя.
9 Обeтования бо слово сие: на сие время прииду, и будет саррe Сын.
10 Не точию же, но и ревекка от единаго ложа исаака отца нашего имущи:
11 еще бо не рождшымся, ни сотворившым что благо или зло, да по избранию предложение Божие пребудет
12 не от дeл, но от призывающаго, речеся ей, яко болий поработает меншему,
13 якоже есть писано: иакова возлюбих, исава же возненавидeх.
14 Что убо речем? Еда неправда у Бога? Да не будет.
15 Моисеови бо глаголт: помилую, егоже аще помилую, и ущедрю, егоже аще ущедрю.
16 Тeмже убо ни хотящаго, ни текущаго, но милующаго Бога.
17 Глаголт бо писание фараонови: яко на истое сие воздвигох тя, яко да покажу тобою силу мою и да возвeстится имя мое по всей земли.
18 Тeмже убо, егоже хощет, милует: а егоже хощет, ожесточает.
19 Речеши убо ми: чесо ради еще укоряет, воли бо его кто противитися может?
20 Тeмже убо, о, человeче, ты кто еси, против отвeщаяй Богови? еда речет здание создавшему е: почто мя сотворил еси тако?
21 Или не имать власти скудельник на брении, от тогожде смeшения сотворити ов убо сосуд в честь, ов же не в честь?
22 Аще же хотя Бог показати гнeв свой и явити силу свою, пренесе во мнозe долготерпeнии сосуды гнeва совершены в погибель:
23 и да скажет богатство славы своея на сосудeх милости, яже предуготова в славу,
24 ихже и призва нас не точию от иудей, но и от язык:
25 якоже и во осии глаголт: нареку не люди моя люди моя, и невозлюбленую возлюблену:
26 и будет, на мeстe, идeже речеся им: не людие мои есте вы, тамо нарекутся сынове Бога живаго.
27 Исаиа же вопиет о Израили: аще будет число сынов Израилевых яко песок морский, останок спасется:
28 слово бо скончавая и сокращая в правдe, яко слово сокращено сотворит Господь на земли,
29 и якоже прорече исаиа: аще не бы Господь саваоф оставил нам сeмене, якоже содом убо были быхом, и якоже гоморру уподобилися быхом.
30 Что убо речем, яко языцы, не гонящии правду, постигоша правду, правду же, яже от вeры:
31 Израиль же, гоня закон правды, в закон правды не постиже.
32 Чесо ради? Зане не от вeры, но от дeл закона: преткнушася бо о камень претыкания,
33 якоже есть писано: се, полагаю в сионe камень претыкания и камень соблазна: и всяк вeруяй в онь не постыдится.
1 Братие, благоволение убо моего сердца и молитва, яже к Богу по Израили, есть во спасeние.
2 Свидeтельствую бо им, яко ревность Божию имут, но не по разуму.
3 Не разумeюще бо Божия правды и свою правду ищуще поставити, правдe Божией не повинушася:
4 кончина бо закона Христос, в правду всякому вeрующему.
5 Моисей бо пишет правду юже от закона: яко сотворивый та человeк жив будет в них.
6 А яже от вeры правда сице глаголет: да не речеши в сердцы твоем: кто взыдет на небо, сирeчь Христа свести:
7 или кто снидет в бездну, сирeчь Христа от мертвых возвести.
8 Но что глаголет писание? Близ ти глагол есть, во устeх твоих и в сердцы твоем, сирeчь глагол вeры, егоже проповeдаем:
9 яко аще исповeси усты твоими Господа Иисуса, и вeруеши в сердцы твоем, яко Бог того воздвиже из мертвых, спасешися:
10 сердцем бо вeруется в правду, усты же исповeдуется во спасeние.
11 Глаголет бо писание: всяк вeруяй в онь не постыдится.
12 Нeсть бо разнствия иудееви же и еллину: той бо Бог всeх, богатяй (богат сый) во всeх призывающих его.
13 Всяк бо, иже аще призовет имя Господне, спасется.
14 Како убо призовут, в негоже не вeроваша? Како же увeруют, егоже не услышаша? како же услышат без проповeдающаго?
15 Како же проповeдят, аще не послани будут? Якоже есть писано: коль красны ноги благовeствующих мир, благовeствующих благая.
16 Но не вси послушаша благовeствования. Исаиа бо глаголет: Господи, кто вeрова слуху нашему?
17 Тeмже убо вeра от слуха, слух же глаголом Божиим.
18 Но глаголю: еда не слышаша, Тeмже убо (но паче), во всю землю изыде вeщание их, и в концы вселенныя глаголы их.
19 Но глаголю: еда не разумe Израиль? Первый моисей глаголет: аз раздражу вы не о языцe, но о языцe неразумнe (о не языцe, о языцe неразумнe) прогнeваю вас.
20 Исаиа же дерзает и глаголет: обрeтохся не ищущым мене, явлен бых не вопрошающым о мнe.
21 Ко Израилю же глаголет: весь день воздeх руцe мои к людем непокоривым и пререкающым.
1 Глаголю убо: еда отрину Бог люди своя? Да не будет. Ибо и аз Израильтянин есмь, от сeмене авраамля, колeна вениаминова.
2 Не отрину Бог людей своих, ихже прежде разумe. Или не вeсте, о илии что глаголет писание, яко приповeдует Богови на Израиля (вопиет к Богу на ииля.), глаголя:
3 Господи, пророки твоя избиша и олтари твоя раскопаша: и аз остах един, и ищут души моея, изяти ю.
4 Но что глаголет ему Божественный отвeт? Оставих себe седмь тысящ мужей, иже не преклониша колeна пред ваалом.
5 Тако убо и в нынeшнее время останок по избранию благодати бысть.
6 Аще ли по благодати, то не от дeл: зане блть уже не бывает благодать. Аще ли от дeл, ктому нeсть блть: зане дeло уже нeсть дeло.
7 Что убо? Егоже искаше Израиль, сего не получи, а избрание получи. прочии же ослeпишася,
8 якоже есть писано: даде им Бог дух умиления (даде им Бог духа нечувствия.), очи не видeти и ушы не слышати, даже до днешняго дне.
9 И давид глаголет: да будет трапеза их в сeть и в лов, и в соблазн и в воздаяние им:
10 да помрачатся очи их еже не видeти, и хребет их выну сляцай.
11 Глаголю убо: еда согрeшиша, да отпадут? Да не будет. Но тeх падением спассение языком, во еже раздражити их.
12 Аще ли же прегрeшение их богатство мира, и отпадение их богатство языков: кольми паче исполнение их?
13 Вам бо глаголю языком: понеже убо есмь аз языком апостол, службу мою прославляю.
14 Аще како раздражу мою плоть, и спасу нeкия от них?
15 Аще бо отложение их, примирение миру, что приятие, развe жизнь из мертвых?
16 Аще ли начаток свят, то и примeшение: и аще корень свят, то и вeтви.
17 Аще ли нeкия от вeтвей отломишася, ты же, дивия маслина сый, прицeпился еси в них, и причастник корене и масти маслинныя сотворился еси,
18 не хвалися на вeтви: аще ли же хвалишися, не ты корень носиши, но корень тебе.
19 Речеши убо. отломишася вeтви, да аз прицeплюся.
20 Добрe: невeрием отломишася, ты же вeрою стоиши: не высокомудрствуй, но бойся.
21 Аще бо Бог естественных вeтвей не пощадe, да не како и тебе не пощадит.
22 Виждь убо благость и непощадeние Божие: на отпадших убо непощадeние, а на тебe благость Божия, аще пребудеши в благости: аще ли же ни, то и ты отсeчен будеши.
23 И они же, аще не пребудут в невeрствии, прицeпятся: силен бо есть Бог паки прицeпити их.
24 Аще бо ты от естественныя отсeчен дивия маслины, и чрез естество прицeпился еси к добрeй маслинe: кольми паче сии, иже по естеству, прицeпятся своей маслинe?
25 Не бо хощу вас не вeдeти тайны сея, братие, да не будете о себe мудри, яко ослeпление от части Израилеви бысть, дондеже исполнение языков внидет,
26 и тако весь Израиль спасется, якоже есть писано: приидет от сиона избавляяй, и отвратит нечестие от иакова:
27 и сей им от мене завeт, егда отиму грeхи их.
28 По благовeствованию убо, врази вас ради: по избранию же, возлюблени отец ради.
29 Нераскаянна бо дарования и звание Божие.
30 Якоже бо и вы иногда противистеся Богови, нынe же помиловани бысте сих противлением (сих ради противления.):
31 такожде и сии нынe противишася вашей милости (вашего ради помилования.), да и тии помиловани будут.
32 Затвори бо Бог всeх в противление, да всeх помилует.
33 о, глубина богатства и премудрости и разума Божия! яко неиспытани судове его, и неизслeдовани путие его.
34 Кто бо разумe ум Господень, или кто совeтник ему бысть?
35 Или кто прежде даде ему, и воздастся ему,
36 Яко из того и тeм и в нем всяческая. Тому слава во вeки. Аминь.
1 Молю убо вас, братие, щедротами Божиими, представите тeлеса ваша жертву живу, святу, благоугодну Богови, словесное служение ваше,
2 и не сообразуйтеся вeку сему, но преобразуйтеся обновлением ума вашего, во еже искушати вам, что есть воля Божия благая и угодная и совершенная.
3 Глаголю бо благодатию давшеюся мнe, всякому сущему в вас не мудрствовати паче, еже подобает мудрствовати: но мудрствовати в цeломудрии, коемуждо якоже Бог раздeлил есть мeру вeры.
4 Якоже бо во едином тeлеси многи уды имамы, уды же вси не тожде имут дeлание,
5 такожде мнози едино тeло есмы о Христe, а по единому друг другу уди.
6 Имуще же дарования по благодати даннeй нам различна: аще пророчество, по мeрe вeры:
7 аще ли служение, в служении: аще учяй, во учении:
8 аще утeшаяй, во утeшении. подаваяй, в простотe: предстояй (начальствуяй), со тщанием. милуяй, с добрым изволением.
9 Любы нелицемeрна: ненавидяще злаго, прилeпляйтеся благому:
10 братолюбием друг ко другу любезни: честию друг друга болша творяще:
11 тщанием не лeниви, духом горяще, Господви работающе.
12 упованием радующеся, скобри терпяще, в молитвe пребывающе:
13 требованием святых приобщающеся, страннолюбия держащеся:
14 благословляйте гонящыя вы: благословите, а не клените.
15 Радоватися с радующимися, и плакати с плачущими.
16 Тожде друг ко другу мудрствующе. не высокая мудрствующе, но смиренными ведущеся: не бывайте мудри о себe:
17 ни единому же зла за зло воздающе, промышляюще добрая пред всeми человeки.
18 Аще возможно, еже от вас, со всeми человeки мир имeйте.
19 Не себе отмщающе, возлюблении, но дадите мeсто гнeву. Писано бо есть: мнe отмщение, аз воздам, глаголет Господь.
20 Аще убо алчет враг твой, ухлeби его: аще ли жаждет, напой его: сие бо творя, углие огнено собираеши на главу его.
21 Не побeжден бывай от зла, но побeждай благим злое.
1 Всяка душа властем предержащым да повинуется: нeсть бо власть аще не от Бога, сущыя же власти от Бога учинены суть.
2 Тeмже противляяйся власти, Божию повелeнию противляется: противляющиися же себe грeх приемлют.
3 Князи бо не суть боязнь добрым дeлом, но злым. Хощеши же ли не боятися власти? Благое твори, и имeти будеши похвалу от него:
4 Божий бо слуга есть, тебe во благое. Аще ли злое твориши, бойся, не бо без ума (всуе) мечь носит: Божий бо слуга есть, отмститель в гнeв злое творящему.
5 Тeмже потреба повиноватися не токмо за гнeв, но и за совeсть.
6 Сего бо ради и дани даете: служители бо Божии суть, во истое сие пребывающе.
7 Воздадите убо всeм должная: емуже убо урок, урок: а емуже дань, дань: а емуже страх, страх: и емуже честь, честь.
8 Ни единому же ничимже должни бывайте, точию еже любити друг друга: любяй бо друга, закон исполни.
9 Еже бо: не прелюбы сотвориши, не убиеши, не украдеши, не лжесвидeтелствуеши, не похощеши, и аще кая ина заповeдь, в сем словеси совершается, во еже: возлюбиши искренняго твоего, якоже сам себе.
10 Любы искреннему зла не творит. исполнение убо закона любы есть.
11 И сие, вeдяще время, яко час уже нам от сна востати. Нынe бо ближайшее нам спассение, нежели егда вeровахом.
12 Нощь убо прейде, а день приближися: отложим убо дeла темная, и облечемся во оружие свeта.
13 Яко во дни, благообразно да ходим, не козлогласовании и пиянствы, не любодeянии и студодeянии, не рвением и завистию:
14 но облецытеся Господем нашим Иисус Христом, и плоти угодия не творите в похоти.
1 Изнемогающаго же в вeрe приемлите, не в сомнeние помышлении.
2 Ов бо вeрует ясти вся, а изнемогаяй зелия да яст.
3 Ядый не ядущаго да не укоряет: и не ядый ядущаго да не осуждает: Бог бо его прият.
4 Ты кто еси судяй чуждему рабу? Своему Господви стоит, или падает. Станет же, силен бо есть Бог поставити его.
5 Ов убо разсуждает день чрез день, ов же судит на всяк день. Кииждо своею мыслию да извeствуется.
6 Мудрствуяи день, Господеви мудрствует: и не мудрствуяй день, Господеви не мудрствует. Ядый, Господеви яст. благодарит бо Бога: и не ядый, Господеви не яст, и благодарит Бога.
7 Никтоже бо нас себe живет, и никтоже себe умирает:
8 аще бо живем, Господеви живем, аще же умираем, Господеви умираем: аще убо живем, аще умираем, Господни есмы.
9 На сие бо Христос и умре и воскресе и оживе, да и мертвыми и живыми обладает.
10 Ты же почто осуждаеши брата твоего, или ты что уничижаеши брата твоего? Вси бо предстанем судищу Христову.
11 Писано бо есть: живу аз, глаголет Господь, яко мнe поклонится всяко колeно, и всяк язык исповeстся Богови.
12 Тeмже убо кийждо нас о себe слово даст Богу.
13 Не ктому убо друг друга осуждаем, но сие паче судите, еже не полагати претыкания брату или соблазна.
14 Вeм и извeщен есмь о Христe Иисусe, яко ничтоже скверно само собою: точию помышляющему что скверно быти, оному скверно есть.
15 Аще же брашна ради брат твой скорбит, уже не по любви ходиши: не брашном твоим того погубляй, за негоже Христос умре.
16 Да не хулится убо ваше благое.
17 Нeсть бо царство Божие брашно и питие, но правда и мир и радость о дусe святe.
18 Иже бо сими служит Христови, благоугоден есть Богови и искусен человeком.
19 Тeмже убо мир возлюбим и яже к созиданию друг ко другу.
20 Не брашна ради разоряй дeло Божие. Вся бо чиста, но зло человeку претыканием ядущему.
21 Добро не ясти мяс, ниже пити вина, ни о немже брат твой претыкается или соблазняется или изнемогает.
22 Ты вeру имаши? о себe сам имeй пред Богом. Блажен не осуждаяй себе, о немже искушается.
23 А сомняяйся, аще яст, осуждается, зане не от вeры: всяко же, еже не от вeры, грeх есть.
24 Могущему же вас утвердити по благовeствованию моему и проповeданию Иисус Христову, по откровению тайны, лeты вeчными умолчанныя,
25 явльшияся же нынe, писании пророческими, по повелeнию вeчнаго Бога, в послушание вeры во всeх языцех познавшияся,
26 единому премудрому Богу, Иисусом Христом, емуже слава во вeки. Аминь.
1 Должни есмы мы сильнии немощи немощных носити, и не себe угождати:
2 кииждо же вас ближнему да угождает во благое к созиданию.
3 Ибо и Христос не себe угоди, но якоже есть писано: поношения поносящих тебe нападоша на мя.
4 Елика бо преднаписана быша, в наше наказание преднаписашася, да терпeнием и утeшением писаний упование имамы.
5 Бог же терпeния и утeшения да даст вам тожде мудрствовати друг ко другу о Христe Иисусe,
6 да единодушно едиными усты славите Бога и Отца Господа нашего Иисуса Христа.
7 Тeмже приемлите друг друга, якоже и Христос прият вас во славу Божию.
8 Глаголю же Христа Иисуса служителя бывша обрeзания по истинe Божией, во еже утвердити обeтования отцев.
9 а языком по милости, прославити Бога, якоже есть писано: сего ради исповeмся тебe во языцeх, Господи, и имени твоему пою.
10 И паки глаголет: возвеселитеся, языцы, с людьми его.
11 И паки: хвалите Господа, вси языцы, и похвалите его, вси людие.
12 И паки исаиа глаголет: будет корень иессеов, и востаяй владeти над языки: на того языцы уповают.
13 Бог же упования да исполнит вас всякия радости и мира в вeрe, избыточествовати вам во уповании, силою духа святаго.
14 Извeщен же есмь, братие моя, и сам аз о вас, яко и сами вы полни есте благости, исполнени всякаго разума, могуще и иныя научити:
15 дерзeе же писах вам, братие моя, от части, яко воспоминая вам, за блть данную ми от Бога,
16 во еже быти ми служителю Иисус Христову во языцeх, священнодeйствующу благовeствование Божие, да будет приношение еже от язык благоприятно и освященно духом святым.
17 Имам убо похвалу о Христe Иисусe в тeх, яже к Богу:
18 не смeю бо глаголати что, ихже не содeя Христос мною, в послушание языков, словом и дeлом,
19 в силe знамений и чудес, силою духа Божия, якоже ми от иерусалима и окрест даже до иллирика исполнити благовeствование Христово.
20 Сице же потщахся благовeстити, не идeже именовася Христос, да не на чужем основании созижду,
21 но якоже есть писано: имже не возвeстися о нем, узрят, и иже не слышаша, уразумeют.
22 Тeмже и возбранен бых многажды приити к вам.
23 Нынe же ктому мeста не имыи в странах сих, желание же имый приити к вам от многих лeт,
24 яко аще поиду во испанию, прииду к вам. Уповаю бо мимогрядый видeти вас и вами проводитися тамо, аще вас прежде от части насыщуся.
25 Нынe же гряду во иерусалим, служяй святым,
26 благоволиша бо македониа и ахаиа общение нeкое сотворити к нищым святым живущым во иерусалимe.
27 Благоволиша бо, и должни им суть. Аще бо в духовных их причастницы быша языцы, должни суть и в плотских послужити им.
28 Сие убо скончав, и запечатлeв им плод сей, поиду вами во испанию:
29 вeм же, яко грядый к вам, во исполнении благословения благовeстия Христова прииду.
30 Молю же вы, братие, Господем нашим Иисус Христом и любовию духа, споспeшствуите ми в молитвах о мнe к Богу,
31 да избавлюся от противляющихся во иудеи, и да служба моя, яже во иерусалимe, благоприятна будет святым.
32 да с радостию прииду к вам волею Божиею и упокоюся с вами.
33 Бог же мира со всeми вами. Аминь.
1 Вручаю же вам фиву сестру нашу, сущу служительницу церкве яже в кегхреех:
2 да приимете ю о Господe достойнe святым, и споспeшствуите ей, о нейже аще от вас потребует вещи: ибо сия заступница многим бысть, и самому мнe.
3 Цeлуйте прискиллу и акилу, споспeшника моя о Христe Иисусe,
4 иже по души моей своя выя положиста, ихже не аз един благодарю, но и вся церкви языческия: и домашнюю их церковь.
5 Цeлуйте епенета возлюбленнаго ми, иже есть начаток ахаии во Христа.
6 Цeлуйте мариамь, яже много трудися о нас.
7 Цeлуйте андроника и иунию, сродники моя и сплeнники моя, иже суть нарочиты во апостолeх, иже и прежде мене вeроваста во Христа.
8 Цeлуйте амплиа возлюбленнаго ми о Господe.
9 Цeлуйте урвана споспeшника нашего о Христe, и стахиа возлюбленнаго ми.
10 Цeлуйте апеллиа искусна о Христe. Цeлуйте сущыя от аристовула.
11 Цeлуйте иродиона сродника моего. Цeлуйте иже от наркисса сущыя о Господe.
12 Цeлуйте трифену и трифосу труждающыяся о Господe. Цeлуйте персиду возлюбленную, яже много трудися о Господe.
13 Цeлуйте руфа избраннаго о Господe, и матерь его и мою.
14 Цeлуйте асигкрита, флегонта, ерма, патрова, ермиа, и сущую с ними братию.
15 Цeлуйте филолога и иулию, ниреа и сестру его, и олимпана, и сущыя с ними вся святыя.
16 Цeлуйте друг друга лобзанием святым. Цeлуют вы вся церкви Христовы.
17 Молю же вы, братие, блюдитеся от творящих распри и раздоры, кромe учения, емуже вы научистеся, и уклонитеся от них:
18 таковии бо Господеви нашему Иисусу Христу не работают, но своему чреву: иже благими словесы и благословением прельщают сердца незлобивых.
19 Ваше бо послушание ко всeм достиже. Радуюся же еже о вас. хощу же вас мудрых убо быти во благое, простых же в злое.
20 Бог же мира да сокрушит сатану под ноги вашя вскорe. Благодать Господа нашего Иисуса Христа с вами. Аминь.
21 Цeлует вас тимофей споспeшник мой, и лукий и иасон и сосипатр, сродницы мои.
22 Цeлую вы и аз тертий, написавый послание сие, о Господe.
23 Цeлует вы гаие странноприимец мой и церкве всея. Цeлует вы ераст строитель градский, и куарт брат.
24 Благодать Господа нашего Иисуса Христа со всeми вами. Аминь.