1 Павел, посланник Иисус Христов волею Божиею, святым сущым во ефесe и вeрным о Христe Иисусe:
2 благодать вам и мир от Бога Отца нашего и Господа Иисуса Христа.
3 Благословен Бог и Отец Господа нашего Иисуса Христа, благословивый нас всяцeм благословением духовным в небeсных о Христe.
4 якоже избра нас в нем прежде сложения мира, быти нам святым и непорочным пред ним в любви,
5 прежде нарек нас во усыновление Иисус Христом в него, по благоволению хотeния своего,
6 в похвалу славы благодати своея, еюже облагодати нас о Возлюбленнeм:
7 о немже имамы избавление кровию его, и оставление прегрeшении, по богатству благодати его,
8 юже преумножил есть в нас во всяцeй премудрости и разумe,
9 сказав нам тайну воли своея по благоволению своему, еже прежде положи в нем,
10 в смотрение исполнения времен, возглавити всяческая о Христe, яже на небесeх и яже на земли в нем:
11 в немже и наслeдницы сотворихомся, прежде наречени бывше по прозрeнию Божию вся дeйствующаго по совeту воли своея,
12 яко быти нам в похваление славы его, прежде уповавшым во Христа:
13 в немже и вы, слышавше слово истины, благовeствование спасeния нашего, в немже и вeровавше знаменастеся духом обeтования святым,
14 иже есть обручение наслeдия нашего, во избавление снабдeния, в похвалу славы его.
15 Сего ради и аз слышав вашу вeру о Христe Иисусe и любовь, яже ко всeм святым,
16 не престаю благодаря о вас, поминание о вас творя в молитвах моих,
17 да Бог Господа нашего Иисуса Христа, Отец славы, даст вам духа премудрости и откровения, в познание его,
18 просвeщенна очеса сердца вашего, яко увeдeти вам, кое есть упование звания его, и кое богатство славы достояния его во святых,
19 и кое преспeющее величество силы его в нас вeрующих по дeйству державы крeпости его,
20 юже содeя о Христe, воскресив его от мертвых и посадив одесную себе на небeсных,
21 превыше всякаго началства и власти и силы и господства, и всякаго имене именуемаго не точию в вeцe сем, но и во грядущем:
22 и вся покори под нозe его, и того даде главу выше всeх церкви,
23 яже есть тeло его, исполнение исполняющаго всяческая во всeх.
1 И вас сущих прегрeшеньми мертвых и грeхи вашими,
2 в нихже иногда ходисте по вeку мира сего, по князю власти воздушныя, духа, иже нынe дeйствует в сынeх противления,
3 в нихже и мы вси жихом иногда в похотех плоти нашея, творяще волю плоти и помышлений, и бeхом естеством чада гнeва, якоже и прочии:
4 Бог же, богат сый в милости, за премногую любовь свою, еюже возлюби нас,
5 и сущих нас мертвых прегрeшеньми, сооживи Христом: благодатию есте спасени:
6 и с ним воскреси, и спосади на небeсных во Христe Иисусe,
7 да явит в вeцeх грядущих презeлное богатство благодати своея благостынею на нас о Христe Иисусe.
8 Благодатию бо есте спасени чрез вeру: и сие не от вас, Божии дар:
9 не от дeл, да никтоже похвалится.
10 Того бо есмы творение, создани во Христe Иисусe на дeла благая, яже прежде уготова Бог, да в них ходим.
11 Тeмже поминайте, яко вы, иже иногда языцы во плоти, глаголемии необрeзание от рекомаго обрeзания во плоти, рукотвореннаго,
12 яко бeсте во время оно без Христа, отчуждени жития израилева и чужди от завeт обeтования, упования не имуще и безбожни в мирe:
13 нынe же о Христe Иисусe вы, бывшии иногда далече, близ бысте кровию Христовою.
14 Той бо есть мир наш, сотворивый обоя едино, и средостeние ограды разоривый,
15 вражду плотию своею, закон заповeдий ученьми упразднив, да оба созиждет собою во единаго новаго человeка, творя мир,
16 и примирит обоих во единeм тeлe Богови крестом, убив вражду на нем:
17 и пришед благовeсти мир вам, дальним и ближним,
18 зане тeм имамы приведение обои во единeм дусe ко Отцу.
19 Тeмже убо ктому нeсте странни и пришелцы, но сожителе святым и приснии Богу,
20 наздани бывше на основании апостол и пророк, сущу краеугольну самому Иисусу Христу,
21 о немже всяко создание составляемо растет в церковь святую о Господe:
22 о немже и вы созидаетеся в жилище Божие духом.
1 Сего ради аз павел юзник Иисус Христов о вас языцeх.
2 Аще убо (понеже) слышасте смотрение благодати Божия данныя мнe в вас,
3 яко по откровению сказася мнe тайна, якоже преднаписах вмалe:
4 о немже (поелику) можете чтуще разумeти разум мой в тайнe Христовe,
5 яже во инeх родeх не сказася сыном человeческим, якоже нынe открыся святым его апостолом и пророком духом святым:
6 яко быти языком снаслeдником и стeлесником и спричастником обeтования его о Христe Иисусe, благовeствованием,
7 емуже бых служитель по дару благодати Божия, данныя мнe по дeйству силы его.
8 Мнe меншему всeх святых дана бысть благодать сия, во языцeх благовeстити неизслeдованное богатство Христово
9 и просвeтити всeх, что есть смотрение тайны сокровенныя от вeков в Бозe, создавшем всяческая Иисус Христом,
10 да скажется нынe началом и властем на небeсных церковию многоразличная премдрость Божия,
11 по предложению вeк, еже сотвори о Христe Иисусe Господe нашем,
12 о немже имамы дерзновение и приведение в надeянии вeрою его.
13 Тeмже молю вы не стужати си в скорбех моих о вас, яже есть слава ваша.
14 Сего ради преклоняю колeна моя ко Отцу Господа нашего Иисуса Христа,
15 из негоже всяко отечество на небесeх и на земли именуется:
16 да даст вам по богатству славы своея, силою утвердитися духом его во внутреннем человeцe,
17 вселитися Христу вeрою в сердца ваша: в любви вкоренени и основани,
18 да возможете разумeти со всeми святыми, что широта и долгота и глубина и высота,
19 разумeти же преспeющую разум любовь Христову, да исполнитеся во всяко исполнение Божие.
20 Могущему же паче вся творити по преизбыточествию, ихже просим или разумeем, по силe дeйствуемeй в нас,
21 тому слава в церкви о Христe Иисусe во вся роды вeка вeков. Аминь.
1 Молю убо вас аз юзник о Господe, достойно ходити звания, в неже звани бысте,
2 со всяким смиреномудрием и кротостию, с долготерпeнием, терпяще друг другу любовию,
3 тщащеся блюсти единение духа в союзe мира.
4 Едино тeло, един дух, якоже и звани бысте во единeм уповании звания вашего:
5 един Господь, едина вeра, едино крещение,
6 един Бог и Отец всeх, иже над всeми и чрез всeх и во всeх нас.
7 Единому же комуждо нас дадеся благодать по мeрe дарования Христова.
8 Тeмже глаголет: возшед на высоту, плeнил еси плeн, и даде даяния человeком.
9 А еже, взыде, что есть, точию яко и сниде прежде в долнeйшыя страны земли?
10 Сшедый, той есть и возшедый превыше всeх небес, да исполнит всяческая.
11 И той дал есть овы убо апостолы, овы же пророки, овы же благовeстники, овы же пастыри и учители,
12 к совершению святых, в дeло служения, в созидание тeла Христова,
13 дондеже достигнем вси в соединение вeры и познания Сына Божия, в мужа совершенна, в мeру возраста исполнения Христова:
14 да не бываем ктому младенцы, влающеся и скитающеся всяким вeтром учения, во лжи человeчестeй, в коварствe козней льщения:
15 истинствующе же в любви, да возрастим в него всяческая, иже есть Глава Христос,
16 из негоже все тeло, составляемо и счинeваемо приличнe всяцeм осязанием подаяния, по дeйству в мeрe единыя коеяждо части, возращение тeла творит в создание самаго себе любовию.
17 Сие убо глаголю и послушествую о Господe, ктому не ходити вам, якоже и прочии языцы ходят в суетe ума их,
18 помрачени смыслом, суще отчуждени от жизни Божия, за невeжество сущее в них, за окаменение сердец их:
19 иже в нечаяние вложшеся, предаша себе студодeянию, в дeлание всякия нечистоты в лихоимании.
20 Вы же не тако познасте Христа:
21 аще убо (понеже) слышасте его и о нем научистеся, якоже есть истина о Иисусe:
22 отложити вам, по первому житию, ветхаго человeка, тлeющаго в похотех прелестных,
23 обновлятися же духом ума вашего,
24 и облещися в новаго человeка, созданнаго по Богу в правдe и в преподобии истины.
25 Тeмже отложше лжу, глаголите истину кийждо ко искреннему своему. зане есмы друг другу удове.
26 Гнeвайтеся и не согрeшайте: солнце да не зайдет в гнeвe вашем:
27 ниже дадите мeста диаволу.
28 Крадый ктому да не крадет, но паче да труждается, дeлая своима рукама благое, да имать подаяти требующему.
29 Всяко слово гнило да не исходит из уст ваших, но точию еже есть благо к созданию вeры, да даст благодать слышащым.
30 И не оскорбляйте духа святаго Божия, имже знаменастеся в день избавления.
31 Всяка горесть, и гнeв, и ярость, и кличь, и хула да возмется от вас, со всякою злобою:
32 бывайте же друг ко другу блази, милосерди, прощающе друг другу, якоже и Бог во Христe простил есть вам.
1 Бывайте убо подражатели Богу, якоже чада возлюбленная,
2 и ходите в любви, якоже и Христос возлюбил есть нас, и предаде себе за ны приношение и жертву Богу в воню благоухания.
3 Блуд же и всяка нечистота и лихоимство ниже да именуется в вас, якоже подобает святым:
4 и сквернословие, и буесловие, или кощуны, яже неподобная, но паче благодарение:
5 сие бо да вeсте, яко всяк блудник, или нечист, или лихоимец, иже есть идолослужитель, не имать достояния в царствии Христа и Бога.
6 Никтоже вас да льстит суетными словесы, сих бо ради грядет гнeв Божий на сыны непокоривыя.
7 Не бывайте убо сопричастницы сим.
8 Бeсте бо иногда тма, нынe же свeт о Господe: якоже чада свeта ходите:
9 плод бо духовный есть во всяцeй благостыни и правдe и истинe:
10 искушающе, что есть благоугодно Богови:
11 и не приобщайтеся к дeлом неплодным тмы, паче же и обличайте.
12 Бываемая бо отай от них, срамно есть и глаголати.
13 Вся же обличаемая от свeта являются, все бо являемое свeт есть:
14 сего ради глаголет: востани, спяй, и воскресни от мертвых, и освeтит тя Христос.
15 Блюдите убо, како опасно ходите, не якоже немудри, но якоже премудри,
16 искупующе время, яко дние лукави суть.
17 Сего ради не бывайте несмысленни, но разумeвайте, что есть воля Божия.
18 И не упивайтеся вином, в немже есть блуд: но паче исполняйтеся духом,
19 глаголюще себe во псалмeх и пeниих и пeснех духовных, воспeвающе и поюще в сердцах ваших Господеви,
20 благодаряще всегда о всeх о имени Господа нашего Иисуса Христа Богу и Отцу,
21 повинующеся друг другу в страсe Божии.
22 Жены, своим мужем повинуйтеся, якоже Господу,
23 зане муж глава есть жены, якоже и Христос глава церкве, и той есть спаситель тeла:
24 но якоже церковь повинуется Христу, такожде и жены своим мужем во всем.
25 Мужие, любите своя жены, якоже и Христос возлюби церковь, и себе предаде за ню,
26 да освятит ю, очистив банею водною в глаголe:
27 да представит ю себe славну церковь, не имущу скверны, или порока, или нeчто от таковых, но да будет свята и непорочна.
28 Тако должни суть мужие любити своя жены, яко своя тeлеса: любяй бо свою жену, себе самаго любит.
29 Никтоже бо когда свою плоть возненавидe, но питает и грeет ю, якоже и Господь церковь:
30 зане уди есмы тeла его, от плоти его и от костей его.
31 Сего ради оставит человeк отца своего и матерь, и прилeпится к женe своей, и будета два в плоть едину.
32 Тайна сия велика есть: аз же глаголю во Христа и во церковь.
33 Обаче и вы, по единому кийждо свою жену сице да любит, якоже и себе: а жена да боится своего мужа.
1 Чада, послушайте своих родителей о Господe: сие бо есть праведно.
2 Чти отца твоего и матерь: яже есть заповeдь первая во обeтовании:
3 да благо ти будет, и будеши долголeтен на земли.
4 И отцы, не раздражайте чад своих, но воспитовайте их в наказании и учении Господни.
5 Раби, послушайте господий своих по плоти со страхом и трепетом, в простотe сердца вашего, якоже и Христа,
6 не пред очима точию работающе яко человeкоугодницы, но якоже раби Христовы, творяще волю Божию от души,
7 со благоразумием служаще якоже Господу, а не яко человeком,
8 вeдяще, яко кийждо, еже аще сотворит благое, сие приимет от Господа, аще раб, аще свободь.
9 И господие, таяжде творите к ним, послабляюще им прещения, вeдуще, яко и вам самeм и тeм Господь есть на небесeх, и обиновения лица нeсть у него.
10 Прочее же, братие моя, возмогайте во Господe и в державe крeпости его:
11 облецытеся во вся оружия Божия, яко возмощи вам стати противу кознем диаволским,
12 яко нeсть наша брань к (противу) крови и плоти, но к началом, и ко властем, и к миродержителем тмы вeка сего, к духовом злобы поднебесным.
13 Сего ради приимите вся оружия Божия, да возможете противитися в день лют и вся содeявше стати.
14 Станите убо препоясани чресла ваша истиною, и оболкшеся в броня правды,
15 и обувше нозe во уготование благовeствования мира:
16 над всeми же восприимше щит вeры, в немже возможете вся стрeлы лукаваго разжженныя угасити:
17 и шлем спасeния восприимите, и мечь духовныи, иже есть глагол Божий:
18 всякою молитвою и молением молящеся на всяко время духом, и в сие истое бдяще во всяком терпeнии и молитвe о всeх святых
19 и о мнe, да дастся ми слово во отверзение уст моих, с дерзновением сказати тайну благовeствования,
20 о немже посолствую во узах, да в нем дерзаю, якоже подобает ми глаголати.
21 Да увeсте же и вы, яже о мнe, что дeлаю, вся скажет вам тихик, возлюбленныи брат и вeрен служитель о Господe,
22 егоже послах к вам на сие истое, да увeсте, яже о нас, и да утeшит сердца ваша.
23 Мир братии и любовь с вeрою от Бога Отца и Господа Иисуса Христа.
24 Благодать со всeми любящими Господа нашего Иисуса Христа в неистлeнии. Аминь.