1 Павел и силуан и тимофей церкви солунстeй о Бозe Отцe и Господe Иисусe Христe: благодать вам и мир от Бога Отца нашего и Господа Иисуса Христа.
2 Благодарим Бога всегда о всeх вас, поминание о вас творяще в молитвах наших,
3 непрестанно поминающе ваше дeло вeры, и труд любве, и терпeние упования Господа нашего Иисуса Христа, пред Богом и Отцем нашим,
4 вeдяще, братие возлюбленная, от Бога избрание ваше:
5 яко благовeствование наше не бысть к вам в словe точию, но и в силe, и в дусe святe, и во извeщении мнозe, якоже и вeсте, какови быхом в вас ради вас.
6 И вы подобницы бысте нам и Господу, приемше слово в скорби мнозe с радостию духа святаго,
7 яко быти вам образ всeм вeрующым в македонии и ахаии.
8 От вас бо промчеся слово Господне не токмо в македонии и ахаии, но и во всяко мeсто вeра ваша, яже к Богу, изыде, яко не требовати нам глаголати что.
9 Тии бо о нас возвeщают, каков вход имeхом к вам, и како обратистеся к Богу от идол, работати Богу живу и истинну
10 и ждати Сына его с небес, егоже воскреси из мертвых, Иисуса, избавляющаго нас от гнeва грядущаго.
1 Сами бо вeсте, братие, вход наш иже к вам, яко не вотще бысть:
2 но предпострадавше и досаждени бывше, якоже вeсте, в филиппeх, дерзнухом о Бозe нашем глаголати к вам благовeствование Божие со многим подвигом.
3 Утeшение бо наше не от прелести, ни от нечистоты, ни лестию:
4 но якоже искусихомся от Бога вeрни быти прияти благовeствование, тако глаголем, не аки человeком угождающе, но Богу искушающему сердца наша.
5 Никогдаже бо в словеси ласкания быхом к вам, якоже вeсте, ниже в винe лихоимания: Бог свидeтель!
6 Ни ищуще от человeк славы, ни от вас, ни от инeх:
7 могуще в тяготe быти, якоже Христовы апостоли, но быхом тиси посредe вас, якоже доилица грeет своя чада.
8 Тако желающе вас, благоволихом подати вам не точию благовeствование Божие, но и душы своя, занеже возлюблени бысте нам.
9 Помните бо, братие, труд наш и подвиг: нощь бо и день дeлающе, да не отяготим ни единаго от вас, проповeдахом вам благовeствование Божие.
10 Вы свидeтеле и Бог, яко прпбно и првно и непорочно вам вeрующым быхом,
11 якоже вeсте, зане единаго когождо вас, якоже отец чада своя,
12 моляще и утeшающе вас, и свидeтельствующе вам ходити достойно Богу, призвавшему вы во свое царство и славу.
13 Сего ради и мы благодарим Бога непрестанно, яко приемше слово слышания Божия от нас, приясте не аки слово человeческо, но, якоже есть воистинну, слово Божие, еже и дeйствуется в вас вeрующих.
14 Вы бо подобницы бысте, братие, церквам Божиим сущым во иудеи о Христe Иисусe, зане таяжде и вы пострадасте от своих сплеменник, якоже и тии от иудей,
15 убивших и Господа Иисуса и его пророки, и нас изгнавших, и Богу не угодивших, и всeм человeком противящихся,
16 и возбраняющих нам глаголати языком, да спасутся, во еже исполнити им грeхи своя всегда: постиже же на них гнeв до конца.
17 Мы же, братие, осиротeвше от вас ко времени часа лицем, а не сердцем, лишше тщахомся лице ваше видeти многим желанием.
18 Тeмже хотeхом приити к вам, аз убо павел, единою и дважды: и возбрани нам сатана.
19 Кто бо нам упование или радость или вeнец похваления? Не и вы ли пред Господем нашим Иисус Христом во пришествии его?
20 Вы бо есте слава наша и радость.
1 Тeмже уже не терпяще, благоволихом остатися во афинeх едини,
2 и послахом тимофеа, брата нашего и служителя Божия и споспeшника нашего во благовeстии Христовe, утвердити вас и утeшити о вeрe вашей,
3 яко ни единому смущатися в скорбех сих: сами бо вeсте, яко на сие истое лежим (учинени есмы).
4 Ибо егда у вас бeхом, предрекохом вам, яко имамы скорбeти, еже и бысть, и вeсте.
5 Сего ради и аз ктому не терпя, послах разумeти вeру вашу, да не како искусил вы искушаяй, и вотще будет труд наш.
6 Нынe же пришедшу тимофею к нам от вас и благовeстившу нам вeру вашу и любовь, и яко имате память о нас благу, всегда желающе нас видeти, якоже и мы вас:
7 сего ради утeшихомся, братие, о вас, во всякой скорби и нуждe нашей, вашею вeрою:
8 яко мы нынe живи есмы, аще вы стоите о Господe.
9 Кое бо благодарение Богу можем воздати о вас, о всякой радости, еюже радуемся вас ради пред Богом нашим,
10 нощь и день преизлиха молящеся видeти лице ваше и совершити лишение вeры вашея?
11 Сам же Бог и Отец наш и Господь наш Иисус Христос да исправит путь наш к вам.
12 Вас же Господь да умножит и да избыточествит любовию друг ко другу и ко всeм, якоже и мы к вам,
13 во еже утвердити сердца ваша непорочна в святыни пред Богом и Отцем нашим, в пришествие Господа нашего Иисуса Христа со всeми святыми его. Аминь.
1 Тeмже убо, братие, просим вы и молим о Христe Иисусe, якоже приясте от нас, како подобает вам ходити и угождати Богови, якоже и ходите, да избыточествуете паче:
2 вeсте бо, какова повелeния дахом вам Господем Иисусом.
3 Сия бо есть воля Божия, святость ваша, хранити себе самeх от блуда,
4 и вeдeти комуждо от вас свой сосуд стяжавати во святыни и чести,
5 а не в страсти похотнeй, якоже и языцы не вeдящии Бога,
6 и еже не преступати и лихоимствовати в вещи брата своего: зане мститель есть Господь о всeх сих, якоже и прежде рекохом к вам и засвидeтельствовахом.
7 Не призва бо нас Бог на нечистоту, но во святость.
8 Тeмже убо отметаяй не человeка отметает, но Бога, давшаго духа своего святаго в нас.
9 О братолюбии же, не требуете, да пишется к вам, сами бо вы Богом учени есте, еже любити друг друга:
10 ибо творите то ко всей братии, сущей во всей македонии. Молим же вы, братие, избыточествовати паче,
11 и любезно прилeжати, еже безмолвствовати и дeяти своя и дeлати своима рукама, якоже повелeхом вам:
12 да ходите благообразно ко внeшним и ни чесогоже требуете.
13 Не хощу же вас, братие, не вeдeти о умерших, да не скорбите, якоже и прочии не имущии упования.
14 Аще бо вeруем, яко Иисус умре и воскресе, тако и Бог умершыя во Иисусe приведет с ним.
15 Сие бо вам глаголем словом Господним, яко мы живущии, оставшии в пришествие Господне, не имамы предварити умерших:
16 яко сам Господь в повелeнии, во гласe архангеловe и в трубe Божии снидет с небесе, и мертвии о Христe воскреснут первeе:
17 потом же мы, живущии оставшии, купно с ними восхищени будем на облацeх в срeтение Господне на воздусe, и тако всегда с Господем будем.
18 Тeмже утeшайте друг друга в словесeх сих.
1 А о лeтeх и о временeх, братие, не требe есть вам писати,
2 сами бо вы извeстно вeсте, яко день Господень, якоже тать в нощи, тако приидет.
3 Егда бо рекут: мир и утверждение, тогда внезапу нападет на них всегубительство, якоже болeзнь во чревe имущей, и не имут избeжати.
4 Вы же, братие, нeсте во тмe, да день вас якоже тать постигнет:
5 вси бо вы сынове свeта есте: и сынове дне: нeсмы нощи, ниже тьмы.
6 Тeмже убо да не спим, якоже и прочии, но да бодрствуим и трезвимся.
7 Спящии бо, в нощи спят, и упивающиися в нощи упиваются.
8 Мы же, сынове суще дне, да трезвимся, оболкшеся в броню вeры и любве и шлем упования спасeния,
9 яко не положи нас Бог в гнeв, но в получение спасeния Господем нашим Иисус Христом,
10 умершим за нас, да, аще бдим, аще ли спим, купно с ним живем.
11 Сего ради утeшайте друг друга, и созидайте кийждо ближняго, якоже и творите.
12 Молим же вы, братие, знайте труждающихся у вас, и настоятелей ваших о Господe, и наказующих вы,
13 и имeйте их по преизлиха в любви за дeло их: мирствуйте в себe.
14 Молим же вы, братие, вразумляйте безчинныя, утeшайте малодушныя, заступайте немощныя, долготерпите ко всeм.
15 Блюдите, да никтоже зла за зло кому воздаст: но всегда доброе гоните и друг ко другу и ко всeм.
16 Всегда радуйтеся.
17 Непрестанно молитеся.
18 О всем благодарите: сия бо есть воля Божия о Христe Иисусe в вас.
19 Духа не угашайте.
20 Пророчествия не уничижайте.
21 Вся же искушающе, добрая держите.
22 От всякия вещи злыя (от всякаго вида злаго) огребайтеся.
23 Сам же Бог мира да освятит вас всесовершенных во всем: и всесовершен ваш дух и душа и тeло непорочно в пришествие Господа нашего Иисуса Христа да сохранится.
24 Вeрен призвавый вас, иже и сотворит.
25 Братие, молитеся о нас.
26 Цeлуйте братию всю лобзанием святым.
27 Заклинаю вы Господем, прочести послание сие пред всею святою братиею.
28 Благодать Господа нашего Иисуса Христа с вами. Аминь.