1 Многочастнe и многообразнe древле Бог глаголавый отцем во пророцeх,
2 в послeдок дний сих глагола нам в Сынe, егоже положи наслeдника всeм, имже и вeки сотвори.
3 Иже сый сияние славы и образ ипостаси его, нося же всяческая глаголом силы своея, собою очищение сотворив грeхов наших, сeде о десную престола величествия на высоких,
4 толико лучший быв ангелов, елико преславнeе паче их наслeдствова имя.
5 Кому бо рече когда от ангел: Сын мой еси ты, аз днесь родих тя? И паки: аз буду ему во Отца, и той будет мнe в сына?
6 Егда же паки вводит первороднаго во вселенную, глаголет: и да поклонятся ему вси ангели Божии.
7 И ко ангелом убо глаголет: творяй ангелы своя духи и слуги своя огнь палящь.
8 К Сыну же: престол твой, Боже, в вeк вeка: жезл правости жезл царствия твоего:
9 возлюбил еси правду и возненавидeл еси беззаконие: сего ради помаза тя, Боже, Бог твой елеем радости паче причастник твоих.
10 И (паки): в началe ты, Господи, землю основал еси, и дeла руку твоею суть небеса:
11 та погибнут, ты же пребываеши: и вся, якоже риза, обетшают,
12 и яко одежду свиеши их, и измeнятся: ты же тойжде еси, и лeта твоя не оскудeют.
13 Кому же от ангел рече когда: сeди о десную мене, дондеже положу враги твоя подножие ног твоих?
14 Не вси ли суть служебнии дуси, в служение посылаеми за хотящих наслeдовати спсние?
1 Сего ради подобает нам лишше внимати слышанным, да не когда отпадем.
2 Аще бо глаголанное ангелы слово бысть извeстно, и всяко преступление и ослушание првдное прият мздовоздаяние:
3 како мы убeжим, о толицeм нерадивше спснии, еже зачало приемь глаголатися от Господа, слышавшими в нас извeстися,
4 сосвидeтелствующу Богу знаменьми же и чудесы, и различными силами, и духа святаго раздeленьми, по своей ему воли?
5 Не ангелом бо покори Бог вселенную грядущую, о нейже глаголем:
6 засвидeтелствова же нeгдe нeкто, глаголя: что есть человeк, яко помниши его? или сын человeческий, яко посeщаеши и?
7 умалил еси его малым нeчим от ангел: славою и честию вeнчал еси его и поставил еси его над дeлы руку твоею,
8 вся покорил еси под нозe его. Внегда же покорити ему всяческая, ничтоже остави ему непокорено. Нынe же не у видим ему всяческая покорена:
9 а умаленаго малым чим от ангел видим Иисуса, за приятие смерти славою и чт(с)ию вeнчанна, яко да благодатию Божиею за всeх вкусит смерти.
10 Подобаше бо ему, егоже ради всяческая и имже всяческая, приведшу многи сыны в славу, началника спсния их страданьми совершити.
11 И святяй бо и освящаемии, от единаго вси: еяже ради вины не стыдится братию нарицати их, глаголя:
12 возвeщу имя твое братии моей, посредe церкве воспою тя.
13 И паки: аз буду надeяся нань. И паки: се, аз и дeти, яже ми дал есть Бог.
14 Понеже убо дeти приобщишася плоти и крови, и той приискреннe приобщися тeхже, да смертию упразднит имущаго державу смерти, сирeчь диавола,
15 и избавит сих, елицы страхом смерти чрез все житие повинни бeша работe.
16 Не от ангел бо когда (воистинну) приемлет, но от сeмене авраамова приемлет:
17 отнюдуже должен бe по всему подобитися братии, да млстив будет и вeрен первосвященник в тeх, яже к Богу, во еже очистити грeхи людския.
18 В немже бо пострада, сам искушен быв, может и искушаемым помощи.
1 Тeмже, братие святая, звания небeснаго причастницы, разумeйте посланника и святителя исповeдания нашего Иисуса Христа,
2 вeрна суща сотворшему его, якоже и моисей во всем дому его.
3 Множайшей бо славe сей паче моисеа сподобися, елико множайшую честь имать паче дому сотворивый его:
4 всяк бо дом созидается от нeкоего: а сотворивый всяческая Бог.
5 И моисей убо вeрен бe во всем дому его, якоже слуга, во свидeтелство глаголатися имeвшым:
6 Христос же якоже Сын в дому своем: егоже дом мы есмы, аще дерзновение и похвалу упования даже до конца извeстно удержим.
7 Тeмже, якоже глаголет дух святый, днесь, аще глас его услышите,
8 не ожесточите сердец ваших, якоже в прогнeвании, во дни искушения в пустыни,
9 идeже искусиша мя отцы ваши, искусиша мя и видeша дeла моя четыредесять лeт.
10 Сего ради негодовах рода того и рeх: прсно заблуждают сердцем, тии же не познаша путий моих:
11 яко кляхся во гнeвe моем, аще внидут в покой мой.
12 Блюдите, братие, да не когда будет в нeкоем от вас сердце лукаво, (исполнено) невeрия, во еже отступити от Бога жива.
13 Но утeшайте себе на всяк день дондеже днесь нарицается, да не ожесточится нeкто от вас лестию грeховною:
14 причастницы бо быхом Христу, аще точию начаток состава даже до конца извeстен удержим:
15 внегда глаголет: днесь, аще глас его услышите, не ожесточите сердец ваших, якоже в прогнeвании.
16 Нeцыи бо слышавше прогнeваша, но не вси изшедшии из египта с моисеом.
17 Коих же негодова четыредесять лeт? Не согрeшивших ли, ихже кости падоша в пустыни?
18 Которым же клялся не внити в покоище его? Явe, яко противльшымся.
19 И видим, яко не возмогоша внити за невeрствие.
1 Да убоимся убо, да не когда оставлену обeтованию внити в покой его, явится кто от вас лишився.
2 Ибо нам благовeствовано есть, якоже и онeм: но не пользова онeх слово слуха, не растворенное вeрою слышавших.
3 Входим бо в покой вeровавшии, якоже рече: яко кляхся во гнeвe моем, аще внидут в покой мой: аще и дeлом от сложения мира бывшым.
4 Рече бо нeгдe о седмeм сице: и почи Бог в день седмый от всeх дeл своих.
5 И в сем паки: аще внидут в покой мой.
6 Понеже убо лишени нeцыи (остается нeкиим) внити в него, и имже прежде благовeствовано бe, не внидоша за непослушание:
7 паки нeкий уставляет день, днесь, в давидe глаголя, по толицeх лeтeх, якоже прежде глаголася: днесь, аще глас его услышите, не ожесточите сердец ваших.
8 Аще бо бы онeх Иисус упокоил, не бы о инeм дни глаголал по сих.
9 Убо оставлено есть (и еще) субботство людем Божиим:
10 вшедый бо в покой его, и той почи от дeл своих, якоже от своих Бог.
11 Потщимся убо внити во оный покой, да не кто в ту же притчу противления впадет.
12 Живо бо слово Божие и дeйственно, и острeйше паче всякаго меча обоюду остра, и проходящее даже до раздeления души же и духа, членов же и мозгов, и судително помышлением и мыслем сердечным.
13 И нeсть тварь неявлена пред ним, вся же нага и обявлена пред очима его, к немуже нам слово.
14 Имуще убо архиереа велика, прошедшаго небеса, Иисуса Сына Божия, да держимся исповeдания.
15 Не имамы бо архиереа не могуща спострадати немощем нашым, но искушена по всяческим по подобию, развe грeха.
16 Да приступаем убо с дерзновением к престолу благодати, да приимем милость и благодать обрящем во благовременну помощь.
1 Всяк бо первосвященник, от человeк приемлемь, за человeки поставляется на службы яже к Богу, да приносит дары же и жертвы о грeсeх,
2 спострадати могий невeжствующым и заблуждающым, понеже и той немощию обложен есть:
3 и сего ради должен есть якоже о людех, такожде и о себe приносити за грeхи.
4 И никтоже сам себe приемлет честь, но званный от Бога, якоже и аарон.
5 Тако и Христос не себе прослави быти первосвященника, но глаголавый к нему: Сын мой еси ты, аз днесь родих тя:
6 якоже и индe глаголет: ты еси священник во вeк по чину мелхиседекову.
7 Иже во днех плоти своея моления же и молитвы к могущему спсти его от смерти с воплем крeпким и со слезами принес, и услышан быв от благоговeинства,
8 аще и Сын бяше, обаче навыче от сих, яже пострада, послушанию,
9 и совершився бысть всeм послушающым его виновен спсния вeчнаго,
10 нарeчен от Бога первосвященник по чину мелхиседекову.
11 О немже многое нам слово и неудобь сказаемое глаголати, понеже немощни бысте слухи.
12 Ибо, должни суще быти учителие лeт ради, паки требуете учитися, кая писмена начала словес Божиих: и бысте требующе млека, а не крeпкия пищи.
13 Всяк бо причащаяйся млека неискусен слова правды, младенец бо есть:
14 совершенных же есть твердая пища, имущих чувствия обучена долгим учением в разсуждение добра же и зла.
1 Тeмже оставльше начала Христова слово, на совершение да ведемся, не паки основание покаяния полагающе от мертвых дeл, и вeры в Бога,
2 крещений учения, возложения же рук, воскресния же мертвых и суда вeчнаго.
3 И сие сотворим, аще Бог повелит.
4 Невозможно бо просвeщенных единою и вкусивших дара небeснаго, и причастников бывших духа святаго,
5 и добраго вкусивших Божия глагола и силы грядущаго вeка,
6 и отпадших, паки обновляти в покаяние, второе распинающих Сына Божия себe и обличающих.
7 Земля бо пившая сходящий на ню множицею дождь и раждающая былия добрая оным, имиже и дeлаема бывает, приемлет благословение от Бога:
8 а износящая терния и волчец непотребна есть и клятвы близ, еяже кончина в пожжение.
9 Надeемся же о вас, возлюбленнии, лучших и придержащихся спсния, аще и тако глаголем.
10 Не обидлив бо Бог, забыти дeла вашего и труда любве, юже показасте во имя его, послуживше святым и служаще.
11 Желаем же, да кийждо вас являет тожде тщание ко извeщению упования даже до конца,
12 да не лeниви будете, но подражателе наслeдствующих обeтования вeрою и долготерпeнием.
13 Аврааму бо обeтовая Бог, понеже ни единeм имяше болшим клятися, клятся собою,
14 глаголя: воистинну благословя благословлю тя и умножая умножу тя.
15 И тако долготерпeв, получи обeтование.
16 Человeцы бо болшим кленутся, и всякому их прекословию кончина во извeщение клятва (есть).
17 В немже лишше хотя Бог показати наслeдником обeтования непреложное совeта своего, ходатайствова клятвою:
18 да двeма вещьми непреложными, в нихже невозможно солгати Богу, крeпкое утeшение имамы прибeгшии ятися за предлежащее упование,
19 еже аки котву имамы души, тверду же и извeстну, и входящую во внутреннeйшее завeсы,
20 идeже прдтеча о нас вниде Иисус, по чину мелхиседекову первосвященник быв во вeки.
1 Сей бо мелхиседек, царь салимский, священник Бога вышняго, иже срeте авраама возвращшася от сeча царей и благсви его,
2 емуже и десятину от всeх отдeли авраам, первeе убо сказуется царь правды, потом же царь салимский, еже есть, царь мира,
3 без отца, без матере, без причта рода, ни начала днем, ни животу конца имeя, уподоблен же Сыну Божию, пребывает священник выну.
4 Видите же, елик сей, емуже и десятину дал есть авраам патриарх от избранных.
5 И приемлющии убо священство от сынов левиин заповeдь имут одесятствовати люди по закону, сирeчь, братию свою, аще и от чресл авраамовых изшедшую:
6 не причитаемый же родом к ним, одесятствова авраама и имущаго обeтования благсви:
7 без всякаго же прекословия меншее от болшаго благословляется.
8 И здe убо десятины человeцы умирающии приемлют: тамо же свидeтелствуемый, яко жив есть.
9 И да сице реку, авраамом и левий, приемляй десятины, десятины дал есть:
10 еще бо в чреслeх отчиих бяше, егда срeте его мелхиседек.
11 Аще убо совершенство левитским священством было, людие бо на нем взаконени быша: кая еще потреба по чину мелхиседекову иному востати священнику, а не по чину ааронову глаголатися?
12 прелагаему бо священству, по нужди и закону премeнение бывает.
13 О немже бо глаголются сия, колeну иному причастися, от негоже никтоже приступи ко олтарю:
14 явe бо, яко от колeна иудова возсия Господь наш, о немже колeнe моисей о священствe ничесоже глагола.
15 И лишше еще явe есть, яко по подобию мелхиседекову востает священник ин,
16 иже не по закону заповeди плотския бысть, но по силe живота неразрушаемаго.
17 Свидeтелствует бо, яко ты еси священник во вeк по чину мелхиседекову.
18 Отлагание убо бывает прежде бывшия заповeди за немощное ея и неполезное:
19 ничтоже бо совершил закон: привведение же есть лучшему упованию, имже приближаемся к Богу.
20 И по елику не без клятвы:
21 они бо без клятвы священницы быша, сей же с клятвою чрез глаголющаго к нему: клятся Господь и не раскается: ты еси священник во вeк по чину мелхиседекову:
22 по толику лучшаго завeта бысть испоручник Иисус.
23 И они множайши священницы быша, зане смертию возбранени суть пребывати:
24 сей же, занеже пребывает во вeки, непреступное имать священство,
25 тeмже и спсти до конца может приходящих чрез него к Богу, всегда жив сый, во еже ходатайствовати о них.
26 Таков бо нам подобаше архиерей: прпдбен, незлобив, безсквернен, отлучен от грeшник и вышше небес бывый,
27 иже не имать по вся дни нужды, якоже первосвященницы, прежде о своих грeсeх жертвы приносити, потом же о людских: сие бо сотвори единою, себе принес.
28 Закон бо человeки поставляет первосвященники, имущыя немощь: слово же клятвенное, еже по законe, Сына во вeки совершенна.
1 Глава же о глаголемых: такова имамы первосвященника, иже сeде о десную прстола величествия на небесeх,
2 святым служитель и скинии истиннeй, юже водрузи Господь, а не человeк.
3 Всяк бо первосвященник, во еже приносити дары же и жертвы, поставляемь бывает: тeмже потреба имeти что и сему, еже принесет.
4 Аще бы бо был на земли, не бы был священник, сущым священником приносящым по закону дары,
5 иже образу и стeни служат небeсных, якоже глаголано бысть моисею, хотящу сотворити скинию: виждь бо, рече, сотвориши вся по образу показанному ти на горe.
6 Нынe же лучшее улучи служение, по елику и лучшаго завeта есть ходатай, иже на лучших обeтованиих узаконися.
7 Аще бо бы первый он непорочен был, не бы второму искалося мeсто.
8 Укоряя бо их глаголет: се, дние грядут, глаголет Господь, и совершу на дом израилев и на дом иудов завeт нов,
9 не по завeту, егоже сотворих отцем их в день, в оньже емшу ми их за руку, извести их от земли египетския: зане тии не пребыша в завeтe моем, и аз нерадих о них, глаголет Господь.
10 Яко сей завeт, егоже завeщаю дому израилеву по онeх днех, глаголет Господь, дая законы моя в мысли их, и на сердцах их напишу их, и буду им Бог, и тии будут мнe людие.
11 И не имать научити кийждо искренняго своего и кийждо брата своего, глаголя: познай Господа: яко вси увeдят мя от мала даже и до велика их,
12 зане млстив буду неправдам их и грeхов их и беззаконий их не имам помянути ктому.
13 Внегда же глаголет нов, обветши перваго: а обветшавающее и состарeвающееся близ есть истлeния.
1 Имeяше убо первая скиния (первый завeт) оправдания службы, святое же людское:
2 скиния бо сооружена бысть первая, в нейже свeтилник и трапеза и предложение хлeбов, яже глаголется святая.
3 По вторeй же завeсe скиния глаголемая святая святых,
4 злату имущи кадилницу и ковчег завeта окован всюду златом, в немже стамна злата имущая манну, и жезл ааронов прозябший, и скрижали завeта:
5 превышше же его херувими славы, осeняющии олтарь (очистилище): о нихже не лeть нынe глаголати подробну.
6 Сим же тако устроеным, в первую убо скинию выну вхождаху священницы, службы совершающе:
7 во вторую же единою в лeто един архиерей, не без крове, юже приносит за себе и о людских невeжествиих.
8 Сие являющу духу святому, яко не у явися святых путь, еще первeй скинии имущей стояние.
9 Яже притча во время настоящее утвердися, в неже дарове и жертвы приносятся, не могущыя по совeсти совершити служащаго,
10 точию в брашнах и питиях, и различных омовениих, и оправданиих плоти, даже до времене исправления належащая.
11 Христос же пришед архиерей грядущих благ, болшею и совершеннeйшею скиниею, нерукотворенною, сирeчь, не сея твари,
12 ни кровию козлею ниже телчею, но своею кровию, вниде единою во святая, вeчное искупление обрeтый.
13 Аще бо кровь козляя и телчая и пепел юнчий кропящий оскверненыя освящает к плотстeй чистотe:
14 кольми паче кровь Христова, иже духом святым себе принесе непорочна Богу, очстит совeсть нашу от мертвых дeл, во еже служити нам Богу живу и истинну?
15 И сего ради новому завeту ходатай есть, да смерти бывшей, во искупление преступлений бывших в первeм завeтe, обeтование вeчнаго наслeдия приимут званнии.
16 Идeже бо завeт, смерти нужно есть вноситися завeщающаго,
17 завeт бо в мертвых извeстен есть: понеже ничесоже может, егда жив есть завeщаваяй.
18 Тeмже ни первый без крове обновлен (утвержден) бысть.
19 Реченнeй бо бывшей всяцeй заповeди по закону от моисеа всeм людем, приемь кровь козлюю и телчую, с водою и волною червленою и иссопом, самыя же тыя книги и вся люди покропи,
20 глаголя: сия кровь завeта, егоже завeща к вам Бог.
21 И скинию же и вся сосуды служебныя кровию такожде покропи.
22 И отнюд кровию вся (и едва не вся кровию) очищаются по закону, и без кровопролития не бывает оставление.
23 Нужда убо бяше образом небeсных сими очищатися: самeм же небeсным лучшими жертвами, паче сих.
24 Не в рукотворенная бо святая вниде Христос, противообразная истинных, но в самое небо, нынe да явится лицу Божию о нас,
25 ниже да многажды приносит себе, якоже первосвященник входит во святая (святых) по вся лeта с кровию чуждею:
26 понеже подобаше бы ему множицею страдати от сложения мира: нынe же единою в кончину вeков, во отметание грeха, жертвою своею явися.
27 И якоже лежит (опредeлено есть) человeком единою умрети, потом же суд,
28 тако и Христос единою принесеся, во еже вознести многих грeхи, второе без грeха явится, ждущым его во спсние.
1 Сeнь бо имый закон грядущих благ, (а) не самый образ вещей, на всякое лeто тeмиже жертвами, ихже приносят выну, никогдаже может приступающих совершити.
2 Понеже престали бы быти приносимы, ни едину ктому имущым совeсть о грeсeх служащым, единою очищенным.
3 Но в них воспоминание грeхов на коеждо лeто бывает,
4 невозможно бо крови юнчей и козлей отпущати грeхи.
5 Тeмже входя в мир, глаголет: жертвы и приношения не восхотeл еси, тeло же совершил ми еси:
6 всесожжений и (такожде) о грeсe не благоволил еси.
7 Тогда рeх: се, иду: в главизнe книжнeй написася о мнe, еже сотворити волю твою, Боже.
8 Выше глаголя: яко жертвы и приношения и всесожжений и (такожде) о грeсeх не восхотeл еси, ниже благоволил еси: яже по закону приносятся:
9 тогда рече: се, иду сотворити волю твою, Боже. Отемлет первое, да второе поставит.
10 О нейже воли освящени есмы принесением тeла Иисус Христова единою.
11 И всяк убо священник стоит на всяк день служя и тыяжде множицею принося жертвы, яже никогдаже могут отяти грeхов.
12 Он же едину о грeсeх принес жертву, всегда сeдит о десную Бога,
13 прочее ожидая, дондеже положатся врази его подножие ног его:
14 единeм бо приношением совершил есть во вeки освящаемых.
15 Свидeтелствует же нам и дух святый, по рeченному бо прежде:
16 сей завeт, егоже завeщаю к ним по днех онeх, глаголет Господь, дая законы моя на сердца их, и в помышлениих их напишу их:
17 (таже глаголет Господь:) и грeхов их и беззаконий их не имам помянути ктому.
18 А идeже отпущение сих, ктому нeсть приношения о грeсeх.
19 Имуще убо дерзновение, братие, входити во святая кровию Иисус Христовою, путем новым и живым,
20 егоже обновил есть нам завeсою, сирeчь плотию своею,
21 и иереа велика над домом Божиим,
22 да приступаем со истинным сердцем во извeщении вeры, окроплени сердцы от совeсти лукавыя и измовени тeлесы водою чистою:
23 да держим исповeдание упования неуклонное, вeрен бо есть обeщавый:
24 и да разумeеваем друг друга в поощрении любве и добрых дeл,
25 не оставляюще собрания своего, якоже есть нeким обычай, но (друг друга) подвизающе, и толико паче, елико видите приближающийся день (судный).
26 Волею бо согрeшающым нам по приятии разума истины, ктому о грeсeх не обрeтается жертва,
27 страшно же нeкое чаяние суда и огня ревность, поясти хотящаго сопротивныя.
28 Отверглся кто закона моисеова, без милосердия при двоих или триех свидeтелех умирает:
29 колико мните горшия сподобится муки, иже Сына Божия поправый, и кровь завeтную скверну возмнив, еюже освятися, и духа благодати укоривый?
30 Вeмы бо рекшаго: мнe отмщение, аз воздам, глаголет Господь. И паки: яко судит Господь людем своим.
31 Страшно (есть) еже впасти в руцe Бога живаго.
32 Воспоминайте же первыя дни вашя, в нихже просвeтившеся, многия страсти претерпeсте (мног подвиг подясте) страданий,
33 ово убо, поношеньми и скорбьми позор бывше, ово же, общницы бывше живущым тако:
34 ибо узам моим спострадасте и разграбление имeний ваших с радостию приясте, вeдяще имeти себe имeние на небесeх пребывающее и лучшее.
35 Не отлагайте убо дерзновения вашего, еже имать мздовоздаяние велико.
36 Терпeния бо имате потребу, да волю Божию сотворше, приимете обeтование:
37 еще бо мало елико елико, грядый приидет и не укоснит.
38 А првдный от вeры жив будет: и аще обинется, не благоволит душа моя о нем.
39 Мы же (братие) нeсмы обиновения в погибель, но вeры в снабдeние души.
1 Есть же вeра уповаемых извeщение, вещей обличение невидимых.
2 В сей бо свидeтелствовани быша древнии.
3 Вeрою разумeваем совершитися вeком глаголом Божиим, во еже от неявляемых видимым быти.
4 Вeрою множайшую жертву авель паче каина принесе Богу, еюже свидeтелствован бысть быти првдник, свидeтелствующу о дарeх его Богу: и тою умерый еще глаголет.
5 Вeрою енох преложен бысть не видeти смерти: и не обрeташеся, зане преложи его Бог: прежде бо преложения его свидeтелствован бысть, яко угоди Богу.
6 Без вeры же невозможно угодити (Богу): вeровати же подобает приходящему к Богу, яко есть, и взыскающым его мздовоздатель бывает.
7 Вeрою отвeт приим ное о сих, яже не у видe, убоявся сотвори ковчег во спасение дому своего: еюже осуди (весь) мир, и правды, яже по вeрe, бысть наслeдник.
8 Вeрою зовом авраам послуша изыти на мeсто, еже хотяше прияти в наслeдие, и изыде не вeдый, камо грядет.
9 Вeрою прииде авраам на землю обeтования, якоже на чужду, в кровы вселися со исааком и иаковом снаслeдникома обeтования тогожде:
10 ждаше бо основания имущаго града, емуже художник и содeтель Бог.
11 Вeрою и сама сарра неплоды силу во удержание сeмене прият и паче времене возраста роди, понеже вeрна непщева обeтовавшаго.
12 Тeмже и от единаго родишася, да еще умерщвленнаго, якоже звeзды небесныя множеством и яко песок вскрай моря безчисленный.
13 По вeрe умроша сии вси, не приемше обeтований, но издалеча видeвше я, и цeловавше, и исповeдавше, яко страннии и пришелцы суть на земли:
14 ибо таковая глаголющии являются, яко отечествия взыскуют.
15 И аще бы убо оно помнили, из негоже изыдоша, имeли бы время возвратитися:
16 нынe же лучшаго желают, сирeчь небeснаго: тeмже не стыдится сими Бог, Бог нарицатися их: уготова бо им град.
17 Вeрою приведе авраам исаака искушаемь, и единороднаго приношаше, обeтования приемый,
18 к немуже глаголано бысть: яко о исаацe наречется тебe сeмя:
19 помыслив, яко и из мертвых воскресити силен (есть) Бог, тeмже того и в притчe прият.
20 Вeрою о грядущих благослови исаак иакова и исава.
21 Вeрою иаков умирая коегождо сына иосифова благослови и поклонися на верх жезла его.
22 Вeрою иосиф умирая о исхождении сынов израилевых памятствова и о костех своих заповeда.
23 Вeрою моисей родився сокровен бысть три мeсяцы от отец своих, зане видeша красно отроча и не убояшася повелeния царева.
24 Вeрою моисей, велик быв, отвержеся нарицатися сын дщере фараоновы:
25 паче (же) изволи страдати с людьми Божиими, нежели имeти временную грeха сладость,
26 болшее богатство вмeнив египетских сокровищ поношение Христово: взираше бо на мздовоздаяние.
27 Вeрою остави египет, не убоявся ярости царевы: невидимаго бо яко видя, терпяше.
28 Вeрою сотвори пасху и пролитие крове, да не погубляяй перворожденная коснется их.
29 Вeрою преидоша чермное море аки по сусe земли: егоже искушение приемше египтяне истопишася.
30 Вeрою стeны иерихонския падоша обхождением седмих дний.
31 Вeрою раав блудница не погибе с сопротивльшимися, приимши сходники (соглядатели) с миром (и иным путем изведши).
32 И что еще глаголю? Не достанет бо ми повeствующу времене о гедеонe, варацe же и сампсонe и иеффаи, о давидe же и самуилe, и о (других) пророцeх,
33 иже вeрою побeдиша царствия, содeяша правду, получиша обeтования, заградиша уста львов,
34 угасиша силу огненную, избeгоша острея меча, возмогоша от немощи, быша крeпцы во бранех, обратиша в бeгство полки чуждих:
35 прияша жены от воскресения мертвых своих: инии же избиени быша, не приемше избавления, да лучшее воскресние улучат:
36 друзии же руганием и ранами искушение прияша, еще же и узами и темницею,
37 камением побиени быша, претрени быша, искушени быша, убийством меча умроша, проидоша в милотех (и) в козиях кожах, лишени, скорбяще, озлоблени:
38 ихже не бe достоин (весь) мир, в пустынех скитающеся и в горах и в вертепах и в пропастех земных.
39 И сии вси послушествани бывше вeрою, не прияша обeтования,
40 Богу лучшее что о нас предзрeвшу, да не без нас совершенство приимут.
1 Тeмже убо и мы, толик имуще облежащь нас облак свидeтелей, гордость всяку (бремя всяко) отложше и удобь обстоятелный грeх, терпeнием да течем на предлежащий нам подвиг,
2 взирающе на началника вeры и совершителя Иисуса, иже вмeсто предлежащия ему радости претерпe крест, о срамотe нерадив, о десную же прстола Божия сeде.
3 Помыслите убо таковое пострадавшаго от грeшник на себе прекословие, да не стужаете, душами своими ослабляеми.
4 Не у до крове стасте, противу грeха подвизающеся,
5 и забысте утeшение, еже вам яко сыном глаголет: сыне мой, не пренемогай наказанием Господним, ниже ослабeй, от него обличаемь.
6 Егоже бо любит Господь, наказует: биет же всякаго сына, егоже приемлет.
7 Аще наказание терпите, якоже сыновом обрeтается вам Бог. Который бо есть сын, егоже не наказует отец?
8 Аще же без наказания есте, емуже причастницы быша вси, убо прелюбодeйчищи есте, а не сынове.
9 К сим, плоти нашей отцы имeхом наказатели, и срамляхомся: не много ли паче повинемся Отцу духовом, и живи будем?
10 Они бо в мало дний, якоже годe им бe, наказоваху нас: а сей на пользу, да причастимся святыни его.
11 Всякое бо наказание в настоящее время не мнится радость быти, но печаль: послeди же плод мирен наученым тeм воздает правды.
12 Тeмже ослабленныя руки и ослабленная колeна исправите
13 и стези правы сотворите ногами вашими, да не хромое совратится, но паче да изцeлeет.
14 Мир имeйте и святыню со всeми, ихже кромe никтоже узрит Господа:
15 смотряюще, да не кто лишится благодати Божия: да не кий корень горести, выспрь прозябаяй, пакость сотворит, и тeм осквернятся мнози:
16 да не кто блудодeй, или сквернитель, якоже исав, иже за ядь едину отдал есть первородство свое.
17 Вeсте бо, яко и потом похотeв наслeдовати благсвение, отвержен бысть: покаяния бо мeста не обрeте, аще и со слезами поискал его.
18 Не приступисте бо к горe осязаемeй и разгорeвшемуся огню, и облаку и сумраку, и бурe
19 и трубному звуку, и гласу глагол, егоже слышавшии отрекошася, да не приложится им слово,
20 не терпяху бо повелeвающаго: аще и звeрь прикоснется горe, камением побиен будет:
21 и тако страшно бe видимое, моисей рече: пристрашен есмь и трепетен.
22 Но приступисте к сионстeй горe и ко граду Бога живаго, иерусалиму небeсному и тмам ангелов,
23 торжеству и церкви первородных на небесeх написанных, и судии всeх Богу и духом првдник совершенных,
24 и к ходатаю завeта новаго Иисусу и крови кропления, лучше глаголющей, нежели авелева.
25 Блюдите (же), да не отречетеся глаголющаго. Аще бо не избeжаша они отрекшиися пророчествующаго на земли, множае паче мы отрицающиися небeснаго,
26 егоже глас землю тогда поколеба, нынe же обeтова, глаголя: еще единою аз потрясу не токмо землею, но и небом.
27 А еже еще единою, сказует колеблемых преложение, аки сотворенных, да пребудут, яже суть неподвижимая.
28 Тeмже царство непоколебимо приемлюще, да имамы благодать, еюже служим благоугодно Богу с благоговeнием и страхом,
29 ибо Бог наш огнь поядаяй (есть).
1 Братолюбие да пребывает:
2 страннолюбия не забывайте, тeм бо не вeдяще нeцыи странноприяша ангелы.
3 Поминайте юзники, аки с ними связани: озлобляемыя, аки и сами суще в тeлe.
4 Честна женитва во всeх и ложе нескверно: блудником же и прелюбодeем судит Бог.
5 Не сребролюбцы нравом, доволни сущими. Той бо рече: не имам тебе оставити, ниже имам от тебе отступити:
6 яко дерзающым нам глаголати: Господь мнe помощник, и не убоюся: что сотворит мнe человeк?
7 Поминайте наставники вашя, иже глаголаша вам слово Божие: ихже взирающе на скончание жителства, подражайте вeрe (их).
8 Иисус Христос вчера и днесь тойже, и во вeки.
9 В научения странна и различна не прилагайтеся: добро бо благодатию утверждати сердца, (а) не брашны, от нихже не прияша пользы ходившии в них.
10 Имамы (же) олтарь, от негоже не имут власти ясти служащии сeни.
11 Ихже бо кровь животных вносится во святая за грeхи первосвященником, сих тeлеса сжигаются внe стана:
12 тeмже Иисус, да освятит люди своею кровию, внe врат пострадати изволил.
13 Тeмже убо да исходим к нему внe стана, поношение его носяще:
14 не имамы бо здe пребывающаго града, но грядущаго взыскуем.
15 Тeм убо приносим жертву хваления выну Богу, сирeчь плод устен исповeдающихся имени его.
16 Благотворения же и общения не забывайте: таковыми бо жертвами благоугождается Бог.
17 Повинуйтеся наставником вашым и покаряйтеся: тии бо бдят о душах ваших, яко слово воздати хотяще: да с радостию сие творят, а не воздыхающе, нeсть бо полезно вам сие.
18 Молитеся о нас: уповаем бо, яко добру совeсть имамы, во всeх добрe хотяще жити.
19 Лишше же молю, сие творите, да вскорe устроюся вам (возвращуся к вам).
20 Бог же мира, возведый из мертвых пастыря овцам великаго кровию завeта вeчнаго, Господа нашего Иисуса Христа,
21 да совершит вы во всяцeм дeлe блазe, сотворити волю его, творя в вас благоугодное пред ним Иисус Христом: емуже слава во вeки вeков. Аминь.
22 Молю же вы, братие, приимите слово утeшения: ибо вмалe написав послах вам.
23 Знайте брата нашего отпущена тимофеа, с нимже, аще скорeе приидет, узрю вас.
24 Цeлуйте вся наставники вашя и вся святыя. Цeлуют вы иже от италии сущии.
25 Благодать со всeми вами. Аминь.