1 Апокалипсис (откровение) Иисуса Христа, егоже (еже) даде ему Бог, показати рабом своим, имже подобает быти вскорe. И сказа, послав чрез ангела своего рабу своему иоанну,
2 иже свидeтелствова слово Божие и свидeтелство Иисус Христово, и елика видe.
3 Блаажен чтый, и слышащии словеса пророчествия, и соблюдающии писаная в нем: время бо близ.
4 Иоанн седмим церквам, яже суть во асии: благодать вам и мир от сущаго, и иже бe, и грядущаго, и от седми духов, иже пред престолом его суть,
5 и от Иисуса Христа, иже есть свидeтель вeрный, первенец из мертвых и князь царей земных: любящу ны и омывшу нас от грeх наших кровию своею,
6 и сотворил есть нас цари и иереи Богу и Отцу своему, тому слава и держава во вeки вeков. Аминь.
7 Се, грядет со облаки, и узрит его всяко око и иже его прободоша, и плачь сотворят о нем вся колeна земная. Ей, аминь.
8 Аз есмь алфа и омега, начаток и конец, глаголет Господь, сый, и иже бe, и грядый, вседержитель.
9 Аз иоанн, иже и брат ваш и общник в печали и во царствии и в терпeнии Иисус Христовe, бых во островe нарицаемeм патмос за слово Божие и за свидeтелство Иисус Христово.
10 Бых в дусe в день недeлный, и слышах за собою глас велий яко трубы глаголющия: аз есмь алфа и омега, первый и послeдний:
11 и: яже видиши, напиши в книгу, и посли церквам, яже суть во асии: во ефес и в смирну, в пергам и в фиатир, и в сардис и в филаделфию и в лаодикию.
12 И обратихся видeти глас, иже глаголаше со мною: и обратився видeх седмь свeтилник златых,
13 и посредe седми свeтилников подобна Сыну человeчу, облечена в подир и препоясана при сосцу поясом златым:
14 Глава же его и власи бeлы аки ярина бeлая, якоже снeг: и очи его яко пламень огнен:
15 и нозe его подобнe халколивану, якоже в пещи разжженнe: и глас его яко глас вод мног:
16 и держя в руцe своей деснeй седмь звeзд: и из уст его мечь обоюду остр изострен исходяй: и лице его якоже солнце сияет в силe своей.
17 И егда видeх его, падох к ногама его яко мертв. И положи десницу свою на мнe, глаголя ми: не бойся: аз есмь первый и послeдний
18 и живый: и бых мертв, и се, жив есмь во вeки вeков, аминь: и имам ключи ада и смерти.
19 Напиши убо, яже видeл еси, и яже суть, и имже подобает быти по сем.
20 Таинство седми звeзд, яже видeл еси на десницe моей, и седмь свeтилник златых: седмь звeзд ангели седми церквей суть: и седмь свeтилников, яже видeл еси, седмь церквей суть.
1 Ангелу ефесския церкве напиши: тако глаголет держяй седмь звeзд в десницe своей, ходяй посредe седми свeтилников златых:
2 вeм твоя дeла, и труд твой, и терпeние твое, и яко не можеши носити злых, и искусил еси глаголющыяся быти апостолы, и не суть, и обрeл еси их ложных:
3 и понесл еси, и терпeние имаши, и за имя мое трудился еси и не изнемогл еси.
4 Но имам на тя, яко любовь твою первую оставил еси.
5 Помяни убо, откуду спал еси, и покайся, и первая дeла сотвори: аще же ни, гряду тебe скоро и двигну свeтилник твой от мeста своего, аще не покаешися.
6 Но се имаши, яко ненавидиши дeл николаитских, ихже и аз ненавижду.
7 Имeяй ухо да слышит, что дух глаголет церквам: побeждающему дам ясти от древа животнаго, еже есть посредe рая Божия.
8 И ангелу церкве смирнския напиши: тако глаголет первый и послeдний, иже бысть мертв, и (се,) жив есть:
9 вeм твоя дeла и скорбь и нищету, но богат еси, и хулы глаголющихся быти иудей, и не суть, но сонмище сатанино.
10 Не бойся ничесоже, яже имаши пострадати. Се, имать диавол всаждати от вас в темницы, да искуситеся: и имeти будете скорбь до десяти дний. Буди вeрен даже до смерти, и дам ти вeнец живота.
11 Имeяй ухо слышати да слышит, что дух глаголет церквам: побeждаяй не имать вредитися от смерти вторыя.
12 И ангелу пергамския церкве напиши: тако глаголет имeяй мечь обоюду изощрен:
13 вeм дeла твоя, и гдe живеши, идeже престол сатанин: и держиши имя мое, и не отверглся еси вeры моея и в (моя) дни, в няже антипас свидeтель мой вeрный, иже убиен бысть в вас, идeже живет сатана.
14 Но имам на тя мало, яко имаши ту держащих учение валаамово, иже учаше валака положити соблазн пред сынми Израилевыми, ясти жертвы идолския и любы творити.
15 Тако имаши и ты держащыя учение николаитско, егоже ненавижду.
16 Покайся: аще ли ни, прииду тебe скоро и брань сотворю с ними мечем уст моих.
17 Имeяй ухо слышати да слышит, что дух глаголет церквам: побeждающему дам ясти от манны сокровенныя, и дам ему камень бeл и на камени имя ново написано, егоже никтоже вeсть, токмо приемляй.
18 И ангелу фиатирския церкве напиши: тако глаголет Сын Божий, имeяй очи свои яко пламень огнен, и нозe его подобнe халколивану:
19 вeм твоя дeла и любовь, и службу и вeру, и терпeние твое и дeла твоя, и послeдняя болша первых.
20 Но имам на тя мало, яко оставляеши женe иезавели, глаголющей себе быти пророчицу, учити и льстити моя рабы, любодeйствовати и снeсти жертву идолскую.
21 И дах ей время, да покается от любодeйства своего, и не покаяся.
22 Се, аз полагаю ю на одрe и любодeющыя с нею в скорбь велию, аще не покаются от дeл своих:
23 и чада их умрут смертию (и чада ея убию смертию): и уразумeют вся церкви, яко аз есмь испытаяй сердца и утробы: и дам вам комуждо по дeлом вашым.
24 Вам же глаголю и прочым сущым в фиатирe, иже не имут учения сего и иже не разумeют глубин сатаниных, якоже глаголют: не возложу на вы тяготы иныя:
25 токмо, еже имате, держите, дондеже прииду.
26 И побeждающему и соблюдающему дeла моя до конца, дам ему власть на языцeх,
27 и упасет я жезлом желeзным, яко сосуды скудельничи сокрушатся, якоже и аз приях от Отца моего:
28 и дам ему звeзду утреннюю.
29 Имeяй ухо слышати да слышит, что дух глаголет церквам.
1 И ангелу сардийския церкве напиши: тако глаголет имeяй седмь духов Божиих и седмь звeзд: вeм твоя дeла, яко имя имаши яко жив, а мертв еси.
2 Буди бдя и утверждая прочая, имже умрети: не обрeтох бо дeл твоих скончаных пред Богом твоим (моим).
3 Поминай убо, како приял еси и слышал еси, и соблюдай и покайся. Аще убо не бдиши, прииду на тя яко тать, и не имаши почути, в кий час прииду на тя.
4 Но имаши мало имен и в сардии, иже не оскверниша риз своих, и ходити имут со мною в бeлых, яко достойни суть.
5 Побeждаяй, той облечется в ризы бeлыя, и не имам отмыти (изгладити) имене его от книг животных, и исповeм имя его пред Отцем моим и пред ангелы его.
6 Имeяй ухо да слышит, что дух глаголет церквам.
7 И ангелу филаделфийския церкве напиши: тако глаголет святый истинный, имeяй ключь давидов, отверзаяй, и никтоже затворит, затворяяй, и никтоже отверзет:
8 вeм твоя дeла: се, дах пред тобою двери отверсты, и никтоже может затворити их: яко малу имаши силу, и соблюл еси мое слово, и не отверглся еси имене моего.
9 Се, даю от сонмища сатанина глаголющыяся быти иудеи, и не суть, но лгут: се, сотворю их, да приидут и поклонятся пред ногама твоима, и уразумeют, яко аз возлюбих тя.
10 Яко соблюл еси слово терпeния моего, и аз тя соблюду от годины искушения, хотящия приити на всю вселенную искусити живущыя на земли.
11 Се, гряду скоро: держи, еже имаши, да никтоже приимет вeнца твоего.
12 Побeждающаго сотворю столпа в церкви Бога моего, и болe (вон) не имать изыти ктому: и напишу на нем имя Бога моего и имя града Бога моего, новаго иерусалима, сходящаго с небес от Бога моего, и имя мое новое.
13 Имeяй ухо да слышит, что дух глаголет церквам.
14 И ангелу лаодикийския церкве напиши: тако глаголет аминь (иже есть аминь), свидeтель вeрный и истинный, начаток создания Божия:
15 вeм твоя дeла, яко ни студен еси ни тепл: не да студен бы был ни тепл (о!, дабы студен был еси или горящь)
16 Тако, яко обуморен еси, и ни тепл ни студен, изблевати тя от уст моих имам (тако, понеже тепл еси, и ни студен еси ниже горящь, имам тя изблевати из уст моих)
17 Зане глаголеши, яко богат есмь и обогатихся и ничтоже требую: и не вeси, яко ты еси окаянен и бeден, и нищь и слeп и наг.
18 Совeщаю тебe купити от мене злато разжжено огнем, да обогатишися, и одeяние бeло, да облечешися, и да не явится срамота наготы твоея: и коллурием помажи очи твои, да видиши.
19 Аз, ихже аще люблю, обличаю и наказую. Ревнуй убо и покайся.
20 Се, стою при дверех и толку: аще кто услышит глас мой и отверзет двери, вниду к нему и вечеряю с ним, и той со мною.
21 Побeждающему дам сeсти со мною на престолe моем, якоже и аз побeдих и сeдох со Отцем моим на престолe его.
22 Имeяй ухо да слышит, что дух глаголет церквам.
1 По сих видeх: и се, двери отверсты на небеси, и глас первый, егоже слышах яко трубу глаголющь со мною, глаголя: взыди сeмо, и покажу ти, емуже подобает быти по сих.
2 И абие бых в дусe: и се, престол стояше на небеси, и на престолe сeдящь:
3 и сeдяй бe подобен видeнием камени иаспису и сардинови: и (бe) дуга окрест престола подобна видeнием смарагдови.
4 И окрест престола престоли двадесять и четыри: и на престолeх видeх двадесять и четыри старцы сeдящыя, облечены в бeлыя ризы, и имяху вeнцы златы на главах своих.
5 И от престола исхождаху молния и громи и гласи: и седмь свeщников огненных горящих пред престолом, иже суть седмь духов Божиих:
6 и пред престолом море сткляно, подобно кристаллу: и посредe престола и окрест престола четыри животна исполнена очес спреди и созади.
7 И животно первое подобно льву, и второе животно подобно телцу, и третие животно имущее лице яко человeк, и четвертое животно подобно орлу летящу.
8 И животна четыри, едино коеждо их имeяху по шесть крил окрест, и внутрьуду исполнена очес: и покоя не имут день и нощь, глаголюще: свят, свят, свят Господь Бог вседержитель, иже бe и сый и грядый.
9 И егда даша животная славу и честь и благодарение сeдящему на престолe, живущему во вeки вeков,
10 падоша двадесять и четыри старцы пред сeдящим на престолe, и поклонишася живущему во вeки вeков, и положиша вeнцы своя пред престолом, глаголюще:
11 достоин еси, Господи, прияти славу и честь и силу, яко ты еси создал всяческая, и волею твоею суть, и сотворена.
1 И видeх в десницe сeдящаго на престолe книгу написану внутрьуду и внeуду, запечатану седмию печатию.
2 И видeх ангела крeпка проповeдающа гласом великим: кто есть достоин разгнути книгу и разрeшити печати ея?
3 И никтоже можаше ни на небеси, ни на земли, ниже под землею, разгнути книгу, ниже зрeти ю.
4 И аз плакахся много, яко ни един обрeтеся достоин разгнути и прочести книгу, ниже зрeти ю.
5 И един от старец глагола ми: не плачися: се, побeдил есть лев, иже сый от колeна иудова, корень давидов, разгнути книгу и разрeшити седмь печатей ея.
6 И видeх, и се, посредe престола и четырех животных и посредe старец агнец стоящь яко заколен, имущь рогов седмь и очес седмь, еже есть седмь духов Божиих, посланных во всю землю.
7 И прииде и прият книгу от десницы сeдящаго на престолe.
8 И егда прият книгу, четыри животна и двадесять и четыри старцы падоша пред агнцем, имуще кийждо гусли и фиалы златы полны фимиама, иже суть молитвы святых:
9 и поют пeснь нову, глаголюще: достоин еси прияти книгу и отверзти печати ея, яко заклался и искупил еси Богови нас кровию своею от всякаго колeна и языка и людий и племен,
10 и сотворил еси нас Богови нашему цари и иереи: и воцаримся на земли.
11 И видeх, и слышах глас ангелов многих окрест престола и животных и старец, и бe число их тысяща тысящами (тмы тем и тысящы тысящей),
12 глаголюще гласом великим: достоин есть агнец заколенный прияти силу и богатство, и премдрость и крeпость, и честь и славу и благословение.
13 И всяко создание, еже есть на небеси и на земли, и под землею и на мори яже суть, и сущая в них, вся слышах глаголющыя: сeдящему на престолe и агнцу благословение и честь, и слава и держава во вeки вeков.
14 И четыри животна глаголаху: аминь. И двадесять и четыри старцы падоша и поклонишася живущему во вeки вeков.
1 И видeх, егда отверзе агнец едину от седми печатей, и слышах единаго от четырех животных глаголюща якоже глас громный: гряди и виждь.
2 И видeх, и се, конь бeл, и сeдяй на нем имeяше лук, и дан бысть ему вeнец: и изыде побeждаяй, и да побeдит.
3 И егда отверзе печать вторую, слышах второе животно глаголющее: гряди и виждь.
4 И изыде другий конь рыжь: и сeдящему на нем дано бысть взяти мир от земли, и да убиют друг друга: и дан бысть ему мечь великий.
5 И егда отверзе третию печать, слышах третие животно глаголющее: гряди и виждь. И видeх, и се, конь ворон, и сeдяй на нем имeяше мeрило в руцe своей.
6 И слышах глас посредe четырех животных глаголющий: мeра пшеницы за динарь и три мeры ячменя за динарь: и елеа и вина не вреди.
7 И егда отверзе четвертую печать, слышах глас четвертаго животна глаголющий: гряди и виждь.
8 И видeх, и се, конь блeд, и сeдяй на нем, имя ему смерть: и ад идяше вслeд его: и дана бысть ему область на четвертeй части земли убити оружием и гладом, и смертию и звeрьми земными.
9 И егда отверзе пятую печать, видeх под олтарем душы избиенных за слово Божие и за свидeтелство, еже имeяху.
10 И возопиша гласом великим, глаголюще: доколe, влдко святый и истинный, не судиши и не мстиши крове нашея от живущих на земли?
11 И даны быша коемуждо их ризы бeлы, и рeчено бысть им, да почиют еще время мало, дондеже скончаются и клеврети их и братия их, имущии избиени быти, якоже и тии.
12 И видeх, егда отверзе шестую печать, и се, бысть трус велий, и солнце мрачно бысть яко вретище власяно, и луна бысть яко кровь:
13 и звeзды небесныя падоша на землю, якоже смоковница отметает пупы своя, от вeтра велика движима:
14 и небо отлучися яко свиток свиваемо, и всяка гора и остров от мeст своих двигнушася:
15 и царие земстии и вельможи, и богатии и тысящницы и сильнии, и всяк раб и всяк свободь скрышася в пещерах и камении горстeм,
16 и глаголаша горам и камению: падите на ны и покрыйте ны от лица сeдящаго на престолe и от гнeва агнча:
17 яко прииде день великий гнeва его, и кто может стати?
1 И по сем видeх четыри ангелы стоящыя на четырех углeх земли, держащыя четыри вeтры земския, да не дышет вeтр на землю, ни на море, ни на всяко древо.
2 И видeх инаго ангела восходяща от восхода солнца, имуща печать Бога живаго. И возопи гласом велиим к четырем ангелом, имже дано бысть вредити землю и море, глаголя:
3 не вредите ни земли, ни моря, ни древес, дондеже запечатлeем рабы Бога нашего на челeх их.
4 И слышах число запечатлeнных: сто четыредесять четыри тысящи запечатлeнных от всякаго колeна сынов Израилевых.
5 От колeна иудова дванадесять тысящ запечатлeнных: от колeна рувимова дванадесять тысящ запечатлeнных: от колeна гадова дванадесять тысящ запечатлeнных:
6 от колeна асирова дванадесять тысящ запечатлeнных: от колeна неффалимля дванадесять тысящ запечатлeнных: от колeна манассиина дванадесять тысящ запечатлeнных:
7 от колeна симеонова дванадесять тысящ запечатлeнных: от колeна левиина дванадесять тысящ запечатлeнных: от колeна иссахарова дванадесять тысящ запечатлeнных:
8 от колeна завулоня дванадесять тысящ запечатлeнных: от колeна иосифова дванадесять тысящ запечатлeнных: от колeна вениаминова дванадесять тысящ запечатлeнных.
9 По сих видeх, и се, народ мног, егоже изчести никтоже может, от всякаго языка и колeна, и людий и племен, стояще пред престолом и пред агнцем, облечены в ризы бeлы, и финицы в руках их.
10 И возопиша гласом велиим, глаголюще: спасeние сeдящему на престолe Богу нашему и агнцу.
11 И вси ангели стояху окрест престола и старец и четырех животных: и падоша на лицы пред престолом и поклонишася Богу,
12 глаголюще: аминь: благословение и слава, и премдрость и хвала, и честь и сила и крeпость Богу нашему во вeки вeков. Аминь.
13 И отвeща един от старец, глаголя ми: сии облеченнии в ризы бeлыя кто суть и откуду приидоша?
14 И рeх ему: господи, ты вeси. И рече ми: сии суть, иже приидоша от скорби великия, и испраша ризы своя, и убeлиша ризы своя в крови агнчи:
15 сего ради суть пред престолом Божиим и служат ему день и нощь в церкви его, и сeдяй на престолe вселится в них:
16 не взалчут ктому, ниже вжаждут, не имать же пасти на них солнце, ниже всяк зной:
17 яко агнец, иже посредe престола, упасет я и наставит их на животныя источники вод, и отимет Бог всяку слезу от очию их.
1 И егда отверзе седмую печать, бысть безмолвие на небеси яко пол часа.
2 И видeх седмь ангелов, иже пред Богом стояху: и дано бысть им седмь труб.
3 И другий ангел прииде и ста пред олтарем, имeяй кадилницу злату: и даны быша ему фимиами мнози, да даст молитвам святых всeх на олтарь златый сущий пред престолом.
4 И изыде дым кадилный молитвами святых от руки ангела пред Бога.
5 И взят ангел кадилницу, и наполни ю от огня сущаго на олтари, и положи на земли (поверже на землю): и быша гласи и громи и блистания и трус.
6 И седмь ангел, иже имeяху седмь труб, уготовашася, да вострубят.
7 И первому ангелу вострубившу, бысть град и огнь, смeшены с кровию, и падоша на землю: и третия часть древа погорe, и всяка трава злачная погорe.
8 И вторый ангел воструби, и яко гора велика огнем жегома ввержена бысть в море: и бысть третия часть моря кровь,
9 и умре третия часть созданий сущих в мори, имущих душы, и третия часть кораблей погибе.
10 И третий ангел воструби, и паде с небесе звeзда велика, горящи яко свeща, и паде на третию часть рeк и на источники водныя:
11 и имя звeздe глаголется апсинфос: и бысть третия часть вод яко пелынь, и мнози от человeк умроша от вод, яко горьки бeша.
12 И четвертый ангел воструби, и уязвена бысть третия часть солнца и третия часть луны и третия часть звeзд, да затмится третия часть их, и дне третия часть да не свeтит, и нощь такожде.
13 И видeх и слышах единаго ангела паряща посредe небесе, глаголюща гласом великим: горе, горе, горе живущым на земли от прочих гласов трубных триех ангел хотящих трубити.
1 И пятый ангел воструби, и видeх звeзду с небесе спадшу на землю: и дан бысть ей ключь студенца бездны:
2 и отверзе студенца бездны, и взыде дым от студенца яко дым пещи велики, и омерче солнце и воздух от дыма студеничнаго.
3 И от дыма изыдоша прузи на землю, и дана бысть им область, якоже имут область скорпии земныя.
4 И рeчено бысть им, да не вредят травы земныя, ни всякаго злака, ни всякаго древа, но человeки точию, иже не имут печати Божия на челeх своих.
5 И дано бысть им, да не убиют их, но да муку приимут пять мeсяцей: и мучение их яко мучение скорпиево, егда усeкнет человeка.
6 И в тыя дни взыщут человeцы смерти, и не обрящут ея: и вожделeют умрети, и убeжит от них смерть.
7 И уподобления пругов подобна конем уготовленым на брань: и на главах их яко вeнцы уподоблени злату, и лица их яко лица человeческа:
8 и имeяху власы, яко власы женския, и зубы их, яко львов бeша:
9 и имeяху броня, яко броня желeзны, и глас крил их, яко глас колесниц, егда кони мнози текут на брань:
10 и имeяху ошибы подобны скорпииным, и жала бяху во ошибeх их: и дана бe область им вредити человeки пять мeсяц.
11 И имeли над собою царя аггела бездны, емуже имя еврейски аваддон, а еллински аполлион.
12 Горе едино отиде: се, грядут еще два горя по сих.
13 И шестый ангел воструби, и слышах глас един от четырех рогов олтаря златаго сущаго пред Богом,
14 глаголющий шестому ангелу имeющу трубу: разрeши четыри ангелы связаны при рeцe велицeй евфрат.
15 И разрeшени быша четыри ангели уготовани на час и день, и мeсяц и лeто, да избиют третию часть человeк.
16 И число воинов конных двe тмe тем: и слышах число их.
17 И тако видeх в видeнии кони, и сeдящыя на них имущыя броня огненны и иакинфовы и жупелны: и главы конем (их) яко главы львом, и из уст их исхождаше огнь и дым и жупел.
18 И от триех язв сих погибе третия часть человeков, от огня и от дыма и от жупела, исходящих из уст их:
19 область бо коней во устeх их бe (и во ошибeх их), и (ибо) ошиби их подобни змием, имуще главы и тeми пакости дeюще.
20 И прочии от человeк, иже не вреждени быша (не избиени быша) язывами сими, ниже покаяшася от дeл рук своих, да не поклонятся демоном, ни идолом златым и сребряным, и мeдяным и каменным и древяным, иже ни видeти могут, ни слышати, ни ходити:
21 и не покаяшася от убийств своих, ни от волхвований своих, ниже от блуда своего, ниже от татьб своих.
1 И видeх инаго ангела крeпка сходяща с небесе, оболчена во облак, и дуга над главою (его), и лице его яко солнце, и нозe его яко столпи огнени,
2 и имeяше в руцe своей книгу разгибену: и постави ногу свою десную на мори, а шуюю на земли,
3 и возопи гласом великим, яко лев рыкая: и егда возгласи, глаголаша седмь громов гласы своя.
4 И егда возгласиша (глаголаша) седмь громов гласы своя, хотeх писати: и слышах глас с небесе глаголющ ми: запечатлeй, яже глаголаша седмь громов, и сего не пиши.
5 И ангел, егоже видeх стояща на мори и на земли, воздвиже руку свою на небо
6 и клятся живущим во вeки вeков, иже созда небо и яже на нем, и землю и яже на ней, и море и яже в нем, яко лeта уже не будет:
7 но во дни гласа седмаго ангела, егда имать вострубити, тогда скончается тайна Божия, якоже благовeсти своими рабы пророки.
8 И глас его слышах с небесе паки глаголющ со мною, и глагола: иди и приими книжицу разгнутую в руцe ангела стоящаго на мори и на земли.
9 И идох ко ангелу, глаголя ему: даждь ми книжицу. И рече ми: приими и снeждь ю: и горька будет во чревe твоем, но во устeх ти сладка будет яко мед.
10 И приях книгу от руки ангела и снeдох ю: и бe во устeх моих яко мед сладка: и егда снeдох ю, горька бяше во чревe моем.
11 И рече ми: подобает ти паки пророчествовати в людех и во племенeх, и во языцeх и в царех мнозeх.
1 И дана ми бысть трость подобна жезлу, глаголя: востани и измeри церковь Божию и олтарь, и кланяющыяся в ней:
2 а двор сущий внутрь (внe) церкве изнеси (исключи) внeуду, ниже измeри его, зане дан бысть языком: и град святый поперут четыредесять и два мeсяцы.
3 И дам обeма свидeтелема моима, и прорицати будут дний тысящу двeстe и шестьдесят, оболчена во вретище.
4 Сии суть двe маслицы и два свeщника пред Богом земли стояща.
5 И иже им неправду сотворит, огнь исходит из уст их и пояст враги их: и иже восхощет обидeти их, сему подобает убиену быти.
6 И сии имут область затворити небо, да не снидет дождь (на землю) во дни прорицания их, и область имут на водах, обращати я в кровь и поразити землю всякою язвою, елижды аще восхощут.
7 И егда скончают свидeтелство свое, звeрь, иже исходит от бездны, сотворит с ними брань и побeдит их и убиет я,
8 и трупы их оставит на стогнах града великаго, иже нарицается духовнe содом и египет, идeже и Господь наш распят бысть.
9 И зрeти имут от людий и племен, и от язык и колeн, тeлеса их дни три и пол, и трупы их не оставят положити во гробeх.
10 И живущии на земли возрадуются и возвеселятся о них, и дары послют друг ко другу, яко оба сия пророка мучиста живущыя на земли.
11 И по триех днех и пол, дух животен внидет в ня от Бога, и станут (оба) на ногах своих: и страх велий нападет на зрящих их.
12 И услышат глас велий с небесе, глаголющ им: взыдита сeмо. И взыдоста на небо на облацeх, и видeша я врази их.
13 И в час той трус бысть велий, и десятая часть града паде, и погибе трусом имен человeческих седмь тысящ: и прочии пристрашни быша и даша славу Богу небeсному.
14 Горе второе отиде: се, горе третие грядет скоро.
15 И седмый ангел воструби, и быша гласи велицы на нб(с)сeх, глаголюще: бысть царство мира Господа нашего и Христа его, и воцарится во вeки вeков.
16 И двадесять и четыри старцы, пред Богом сeдящии на престолeх своих, падоша на лица своя и поклонишася Богу,
17 глаголюще: хвалим тя, Господи Боже вседержителю, иже сый и бe и грядый, яко приял еси силу твою великую и воцарился еси:
18 и языцы прогнeвашася: и прииде гнeв твой, и время мертвым суд прияти, и дати мзду рабом твоим пророком и святым и боящымся имене твоего, малым и великим, и растлити посмраждшыя (растлившыя) землю.
19 И отверзеся храм Божии на небеси, и явися кивот завeта его в храмe его: и быша блистания и гласи, и громи и трус, и град велик.
1 И знамение велие явися на небеси: жена облечена в солнце, и луна под ногама ея, и на главe ея вeнец от звeзд двоюнадесяте:
2 и во чревe имущи, вопиет болящи и страждущи родити.
3 И явися ино знамение на небеси: и се, змий велик чермен, имeя глав седмь и рогов десять, и на главах его седмь вeнец:
4 и хобот его отторже третию часть звeзд небесных и положи я в землю (поверже я на землю). И змий стояше пред женою хотящею родити, да, егда родит, снeсть чадо ея.
5 И роди сына мужеска, иже имать упасти вся языки жезлом желeзным: и восхищено бысть чадо ея к Богу и престолу его.
6 А жена бeжа в пустыню, идeже имe мeсто уготовано от Бога, да тамо питается дний тысящу двeстe шестьдесят.
7 И бысть брань на небеси: михаил и ангели его брань сотвориша со змием, и змий брася и аггели его,
8 и не возмогоша, и мeста не обрeтеся им ктому на небеси.
9 И вложен (повержен) бысть змий великий, змий древний, нарицаемый диавол и сатана, льстяй вселенную всю, и вложен (повержен) бысть на землю, и аггели его с ним низвержени быша.
10 И слышах глас велий на небеси, глаголющь: нынe бысть спасeние и сила и царство Бога нашего и область Христа его, яко низложен бысть клеветник братии нашея, оклевещая их пред Богом нашим день и нощь.
11 И тии побeдиша его кровию агнчею и словом свидeтелства своего, и не возлюбиша душ своих даже до смерти.
12 Сего ради веселитеся, небеса и живущии на них. Горе живущым на земли и мори, яко сниде диавол к вам, имeя ярость великую, вeдый, яко время мало имать.
13 И егда видe змий, яко низложен бысть на землю, гоняше жену, яже роди мужеска.
14 И дана быша женe два крила орла великаго, да парит в пустыню в мeсто свое, идeже препитана бяше ту время и времен и пол времене, от лица змиина.
15 И испусти змий за женою из уст своих воду яко рeку, да ю в рeцe потопит.
16 И поможе земля женe, и отверзе земля уста своя, и пожре рeку, юже изведе змий от уст своих.
17 И разгнeвася змий на жену и иде сотворити брань со оставшим сeменем ея, иже соблюдают заповeди Божия и имeют свидeтелство Иисус Христово.
1 И стах на песцe морстeм: и видeх из моря звeря исходяща, имуща глав седмь и рогов десять, и на розeх его вeнец десять, а на главах его имена хулна.
2 Звeрь, егоже видeх, бe подобен рыси, и нозe ему яко медвeди, и уста его яко уста львова: и даде ему змий силу свою и престол свой и область великую.
3 И видeх едину от глав его яко заколену в смерть, и язва смерти его исцeлe. И чудися вся земля вслeд звeря, и поклонишася змию, иже даде область звeрю,
4 и поклонишася звeрю, глаголюще: кто подобен звeрю и кто может ратоватися с ним?
5 И дана быша ему уста глаголюща велика и хулна, и дана бысть ему область творити мeсяц четыредесять два.
6 И отверзе уста своя в хуление к Богу, хулити имя его и селение его и живущыя на небеси.
7 И дано бысть ему брань творити со святыми и побeдити я: и дана бысть ему область на всяцeм колeнe (людий) и на языцeх и племенeх.
8 И поклонятся ему вси живущии на земли, имже не написана суть имена в книгах животных агнца заколенаго от сложения мира.
9 Аще кто имать ухо, да слышит.
10 Иже аще в плeнение ведет, в плeнение пойдет: аще кто оружием убиет, подобает ему оружием убиену быти. Здe есть терпeние и вeра святых.
11 И видeх инаго звeря восходящаго от земли, и имeяше рога два, подобна агнчым, и глаголаше яко змий.
12 И власть перваго звeря всю творяше пред ним: и творяше землю и вся живущыя на ней поклонитися первому звeрю, емуже исцeлена бысть язва смертная:
13 и сотвори чудеса велика, да и огнь сотворит сходити с небесе на землю пред человeки.
14 И льстит живущыя на земли, ради знамений, яже дана быша ему пред звeрем творити, глаголя живущым на земли, сотворити образ звeрю, иже имать язву оружную и жив бысть.
15 И дано бысть ему дати дух образу звeрину, да проглаголет икона звeрина и сотворит, да иже аще не поклонятся образу звeриному, убиени будут.
16 И сотворит вся малыя и великия, богатыя и убогия, свободныя и работныя, да даст им начертание на деснeй руцe их или на челeх их,
17 да никтоже возможет ни купити, ни продати, токмо кто имать начертание, или имя звeря, или число имене его.
18 Здe мудрость есть. Иже имать ум, да почтет число звeрино: число бо человeческо есть, и число его шесть сот шестьдесят шесть.
1 И видeх, и се, агнец стояше на горe сионстeй, и с ним сто и четыредесять и четыри тысящы, имуще имя Отца его написано на челeх своих.
2 И слышах глас с небесе, яко глас вод многих и яко глас грома велика: и глас слышах гудец гудущих в гусли своя
3 и поющих яко пeснь нову пред престолом и пред четыри животными и старцы: и никтоже можаше навыкнути пeсни, токмо сии сто и четыредесять и четыри тысящы искуплени от земли.
4 Сии суть, иже с женами не осквернишася, зане дeвственницы суть: сии послeдуют агнцу, аможе аще пойдет. Сии суть куплени от людий первенцы Богу и агнцу,
5 и во устeх их не обрeтеся лесть: без порока бо суть пред престолом Божиим.
6 И видeх инаго ангела паряща посредe небесе, имущаго евангелие вeчно благовeстити живущым на земли и всякому племени и языку, и колeну и людем,
7 глаголюща гласом великим: убойтеся Бога и дадите ему славу, яко прииде час суда его, и поклонитеся сотворшему небо и землю, и море и источники водныя.
8 И ин ангел вслeд иде, глаголя: паде, паде вавилон град великий, зане от вина ярости любодeяния своего напои вся языки.
9 И третий ангел вслeд его иде, глаголя гласом великим: иже аще кто покланяется звeрю и иконe его и приемлет начертание на челe своем или на руцe своей,
10 и той имать пити от вина ярости Божия, вина нерастворена (влиянна нерастворена) в чаши гнeва его, и будет мучен огнем и жупелом пред ангелы святыми и пред агнцем:
11 и дым мучения их во вeки вeков восходит, и не имут покоя день и нощь покланяющиися звeрю и образу его и приемлющии начертание имене его.
12 Здe есть терпeние святых, иже соблюдают заповeди Божия и вeру Иисусову.
13 И слышах глас с небесе, глаголющь ми: напиши: блажени мертвии, умирающии о Господe отнынe. Ей, глаголет дух, да почиют от трудов своих: дeла бо их ходят вслeд с ними.
14 И видeх, и се, облак свeтел, и на облацe сeдяй подобен Сыну человeческому, имeя на главe своей вeнец злат, и в руцe его серп остр.
15 И ин ангел изыде из храма, вопия велиим гласом сeдящему на облацe: посли серп твой и жни, яко прииде час пожати, зане изсше трава (жатва) земная.
16 И положи (поверже) сeдяй на облацe серп свой на землю, и пожата бысть земля.
17 И ин ангел изыде из церкве сущия на небеси, имый и той серп остр.
18 И ин ангел изыде от олтаря, имый область на огни, и возопи кличем великим ко имущему серп острый, глаголя: посли серп твой острый и обемли грозды винограда земнаго, яко созрeша уже гроздие ея.
19 И положи (верже) ангел серп свой на земли (на землю), и обере виноград земский и вложи в точило великия ярости Божия.
20 И испрано бысть точило внe града, и изыде кровь от точила даже до узд конских, от стадий тысяща и шесть сот.
1 И видeх ино знамение на небеси велие и чудно, седмь ангел имущих седмь язв послeдних, зане в тeх скончается ярость Божия.
2 И видeх яко море сткляно смeшено со огнем, и побeдившыя звeря и образ его, и начертание его и число имене его, стоящыя на мори стклянeм, имущыя гусли Божия:
3 и пояху пeснь моисеа раба Божия и пeснь агнчу, глаголюще: велия и дивна дeла твоя, Господи Боже вседержителю: праведни и истинни путие твои, царю святых:
4 кто не убоится тебе, Господи, и прославит имя твое? яко един прпдбен еси, яко вси языцы приидут и поклонятся пред тобою: яко оправдания твоя явишася.
5 И по сих видeх, и се, отверзеся храм скинии свидeния на небеси:
6 и изыдоша седмь ангел из храма, иже имeяху седмь язв, облечени в ризы льняны чисты и свeтлы, и препоясани на персех поясы златыми.
7 И едино от четырех животных даде седмим ангелом седмь фиал златых, исполненых ярости Бога живущаго во вeки вeков.
8 И наполнися храм дыма от славы Божия и от силы его, и никтоже можаше внити во храм, дондеже скончаются седмь язв седмих ангел.
1 И слышах глас велий от храма глаголющь седмим ангелом: идите и излийте седмь фиал ярости Божия на землю.
2 И иде первый ангел и излия фиал свой на землю: и бысть гной зол и лют на человeцeх имущих начертание звeрино и кланяющихся иконe его.
3 И вторый ангел излия фиал свой в море: и бысть кровь яко мертвеца, и всяка душа жива умре в мори.
4 И третий ангел излия фиал свой на рeки и на источники водныя: и бысть кровь.
5 И слышах ангела воднаго глаголюща: праведн еси, Господи, сый и иже бe, и прпдбн, яко сия судил еси:
6 зане кровь святых и пророк излияша, и кровь им дал еси пити: достойни бо суть.
7 И слышах другаго от олтаря глаголюща: ей, Господи Боже вседержителю, истинни и прави суди твои.
8 И четвертый ангел излия фиал свой на солнце: и дано бысть ему опаляти человeки огнем.
9 И опалишася человeцы зноем великим, и хулиша имя Божие, иже имать область на язвах сих, и не покаяшася дати ему славы.
10 И пятый ангел излия фиал свой на престол звeрин: и бысть царство его омрачено, и жваху языки своя от болeзни,
11 и хулиша Бога небeснаго от болeзни и от язв своих, и не покаяшася от дeл своих.
12 И шестый ангел излия фиал свой на рeку велику евфрат: и изсяче вода ея, да уготовится путь царем сущым от восток солнечных.
13 И видeх из уст змия и из уст звeря и из уст лжаго пророка духи три нечистыя, яко жабы исходящыя:
14 суть бо дуси демонстии творяще знамения, иже исходят к царем всея вселенныя, собрати я на брань в день той великий Бога вседержителя.
15 Се, гряду яко тать: блажен бдяй и блюдый ризы своя, да не наг ходит и узрят срамоту его.
16 И собра их на мeсто нарицаемое еврейски армагеддон.
17 И седмый ангел излия фиал свой на воздух: и изыде глас велий от храма небесе от престола, глаголя: бысть.
18 И быша блистания и громи и гласи, и бысть трус велик, яков николиже бысть, отнелeже быша человeцы на земли, толик трус, тако велий.
19 И бысть град велик в три части, и гради язычестии падоша, и вавилон великий помяновен бысть пред Богом, дати ему чашу вина ярости гнeва своего.
20 И всяк остров бeжа, и горы не обрeтошася:
21 и град велик, яко талантес, сниде с небесе на человeки: и хулиша человeцы Бога от язвы градныя, яко велия есть язва его зeло.
1 И прииде един от седми ангел имущих седмь фиал, и глагола со мною, глаголя ми: прииди, да покажу ти суд любодeйцы великия, сeдящия на водах многих:
2 с неюже любодeяша царие земстии, и упишася живущии на земли от вина любодeяния ея.
3 И веде мя в пусто мeсто духом: и видeх жену сeдящу на звeри червленe, исполненeм имен хулных, иже имeяше глав седмь и рогов десять.
4 И жена бe облечена в порфиру и червленицу, и позлащена златом и камением драгим и бисером, имущи чашу злату в руцe своей полну мерзости и скверн любодeяния ея:
5 и на челe ея написано имя: тайна, вавилон великий, мати любодeйцам и мерзостем земским.
6 И видeх жену пияну кровьми святых и кровьми свидeтелей Иисусовых, и дивихся, видeв ю, дивом великим.
7 И рече ми ангел: что дивишися? аз ти реку тайну жены (сея) и звeря носящаго ю, седмь глав имуща и рогов десять.
8 Звeрь, егоже видeл еси, бe, и нeсть, и имать взыти от бездны, и в пагубу пойдет: и удивятся живущии на земли, имже имена не написана суть в книгу животную от сложения мира, видяще, яко звeрь бe, и нeсть, и преста (видяще звeря, иже бe, и нeсть, и предстанет).
9 Здe ум, иже имать мудрость. Седмь глав горы суть седмь, идeже жена сeдит на них,
10 и царие седмь суть: пять их пало, и един есть, (а) другий еще не прииде: и егда приидет, мало ему есть пребыти (подобает быти).
11 И звeрь, иже бe и нeсть, и той осмый есть, и от седмих есть, и в пагубу идет.
12 И десять рогов, яже видeл еси, десять царей суть, иже царства еще не прияша, но область яко царие на един час приимут со звeрем.
13 Сии едину волю имут, и силу и область свою звeрю дадут:
14 сии со агнцем брань сотворят, и агнец побeдит я, яко Господь господем есть и царь царем: и сущии с ним званнии и избраннии и вeрни.
15 И глагола ми: воды, яже еси видeл, идeже любодeйца сeдит, людие и народи суть, и племена и языцы.
16 И десять рогов, яже видeл еси на звeри, сии любодeйцу возненавидят, и запустeвшу сотворят ю и нагу, и плоть ея снeдят, и сожгут ю огнем:
17 Бог бо дал есть в сердца их, сотворити волю его, и сотворити едину волю, и дати царство свое звeрю, дондеже скончаются глаголы Божии.
18 И жена, юже видeл еси, град есть великий, иже имать царство над цари земными.
1 И по сих видeх ина ангела сходяща с небесе, имуща область велию: и земля просвeтися от славы его.
2 И возопи в крeпости, гласом велиим глаголя: паде, паде вавилон великий, и бысть жилище бeсом и хранитель всякому духу нечисту, и хранилище всeх птиц нечистых и ненавидимых: яко от вина ярости любодeяния своего напои вся языки,
3 и царие земстии с нею любы дeяша, и купцы земстии от силы пищи ея (от богатства сластей его) разбогатeша.
4 И слышах глас ин с небесе, глаголющь: изыдите из нея, людие мои, да не причаститеся грeхом ея и от язв ея да не вредитеся:
5 яко прилeпишася (взыдоша) грeси ея даже до небесе, и помяну Бог неправды ея.
6 Воздадите ей, яко и та воздаде вам, и усугубите ей сугубо по дeлом ея: чашею, еюже черпа (вам), черплите ей сугубо.
7 Елико прославися и разсвирeпe (насладися), толико дадите ей мук и рыданий: яко в сердцы своем глаголет, (яко) сeжу царицею, и вдова нeсмь, и рыдания не имам видeти.
8 Сего ради во един день приидут язвы ей, смерть и плачь и глад, и огнем сожжена будет, яко крeпок Господь Бог судяй ей.
9 И возрыдают и восплачутся ея царие земстии, любы дeявшии с нею и разсвирeпeвшии, егда узрят дым запаления ея,
10 издалеча стояще за страх мук ея, глаголюще: горе, горе, град великий вавилон, град крeпкий, яко во един час прииде суд твой.
11 И купцы земстии возрыдают и восплачутся о нем, яко бремен их никтоже купует ктому,
12 бремен злата и сребра, и камения драгаго и бисера, и висса и порфиры, и шелка и червени, и всякаго древа фиинна, и всякаго сосуда из кости слоновыя, и всякаго сосуда от древа честнаго, и мeдяна и желeзна и мраморна,
13 и корицы и фимиама, и мира и ливана, и вина и елеа, и семидала и пшеницы, и скота и овец, и коней и колесниц, и тeлес и душ человeческих.
14 И овощи похотей души твоея отидоша от тебе, и вся тучная и свeтлая отидоша от тебе, и ктому не имаши обрeсти их.
15 Купцы сими обогащшеся от нея, издалеча станут за страх мучения ея, рыдающе и плачущеся,
16 и глаголюще: горе, горе, град великий, облеченный виссом и порфирою и червленицею, и позлащеный златом и камением драгим и бисером
17 яко во един час погибе толико богатство. И всяк кормчий, и всяк плаваяй в кораблех, и всяк елик в мори дeлаяй (и весь в кораблех народ, и корабелницы, и елицы в мори дeлают), издалеча сташа,
18 и вопияху, видяще дым раждежения его, глаголюще: кий подобен граду великому?
19 И положиша персть на главах своих, и возопиша плачущеся и рыдающе, глаголюще: горе, горе, град великий, в немже обогатишася вси имущии корабли в мори, от чести (богатства) его: яко единeм часом запустe.
20 Веселися о сем, небо, и святии апостоли и пророцы, яко суди Бог суд ваш от него.
21 И взят един ангел крeпок камень велик яко жернов и верже в море, глаголя: тако стремлением ввержен будет вавилон град великий, и не имать обрeстися ктому:
22 и глас гудец и мусикий, и пискателей и труб не имать слышатися ктому в тебe: и всяк хитрец всякия хитрости не обрящется ктому в тебe, и шум жерновный не будет слышан в тебe:
23 и свeт свeтилника не имать свeтити в тебe ктому, и глас жениха и невeсты не имать слышан быти в тебe ктому: яко купцы твои бeша вельможи земстии, яко волхвовании твоими прельщени быша вси языцы.
24 И в нем кровь пророческа и святых обрeтеся и всeх избиенных на земли.
1 И по сих слышах глас велий народа многа на небеси, глаголющаго: аллилуиа: спасeние и слава, и честь и сила Господу нашему,
2 яко истинни и прави суди его: яко судил есть любодeйцу велику, яже посмради (растли) землю любодeянием своим, и отмстил кровь рабов своих от руки ея.
3 И второе рeша: аллилуиа. И дым ея восхождаше во вeки вeков.
4 И падоша двадесять и четыри старцы и четыри животна и поклонишася Богови сeдящему на престолe, глаголюще: аминь, аллилуиа.
5 И глас изыде от престола глаголющь: пойте Богу нашему, вси раби его и боящиися его, и малии и велицыи.
6 И слышах яко глас народа многа, и яко глас вод многих, и яко глас громов крeпких, глаголющих: аллилуиа, яко воцарися Господь Бог вседержитель:
7 радуимся и веселимся, и дадим славу ему: яко прииде брак агнчий, и жена его уготовила есть себе.
8 И дано бысть ей облещися в виссон чист и свeтел: виссон бо оправдания святых есть.
9 И глагола ми: напиши: блажени званнии на вечерю брака агнча. И глагола ми: сия словеса истинна Божия суть.
10 И пад пред ногама его, поклонихся ему: и глагола ми: виждь, ни: клеврет ти есмь и братий твоих имущих свидeтелство Иисусово: Богу поклонися: свидeтелство бо Иисусово есть дух пророчествия.
11 И видeх небо отверсто, и се, конь бeл, и сeдяй на нем вeрен и истинен, и правосудный и воинственный:
12 очи же ему (еста) яко пламень огнен, и на главe его вeнцы мнози: имый имя написано, еже никтоже вeсть, токмо он сам:
13 и облечен в ризу червлену кровию. И нарицается имя его слово Божие.
14 И воинства небeсная идяху вслeд его на конех бeлых, облечени в виссон бeл и чист.
15 И из уст его изыде оружие остро, да тeм избиет языки: и той упасет я жезлом желeзным, и той перет точило вина ярости и гнeва Божия вседержителева.
16 И имать на ризe и на стегнe своем имя написано: Царь царем и Господь господем.
17 И видeх единаго ангела стояща на солнцe: и возопи гласом велиим, глаголя всeм птицам парящым посредe небесе: приидите и соберитеся на вечерю великую Божию,
18 да снeсте плоти царей и плоти крeпких и плоти тысящников, и плоти коней и сeдящих на них, и плоти всeх свободных и рабов, и малых и великих.
19 И видeх звeря и цари земныя и вои их собраны сотворити брань с сeдящим на кони и с воинствы его.
20 И ят бысть звeрь и с ним лживый пророк, сотворивый знамения пред ним, имиже прельсти приемшыя начертание звeрино и покланяющыяся иконe его: жива ввержена быста оба в езеро огненное горящее жупелом:
21 а прочии убиени быша оружием сeдящаго на кони, изшедшим из уст его: и вся птицы насытишася от плотей их.
1 И видeх ангела сходяща с небесе, имeюща ключь бездны и уже велико в руцe своей:
2 и ят змия, змия древняго, иже есть диавол и сатана, и связа и на тысящу лeт,
3 и в бездну затвори (вверже) его, и заключи его, и запечатлe над ним, да не прельстит ктому языки, дондеже скончается тысяща лeт: и по сих подобает ему отрeшену быти на мало время.
4 И видeх престолы и сeдящыя на них, и суд дан бысть им: и душы растесаных за свидeтелство Иисусово и за слово Божие, иже не поклонишася звeрю, ни иконe его, и не прияша начертания на челeх своих и на руцe своей. И ожиша и воцаришася со Христом тысящу лeт:
5 прочии же мертвецы не ожиша, дондеже скончается тысяща лeт. Се воскресeние первое.
6 Блажен и свят, иже имать часть в воскресeнии первeм: на нихже смерть вторая не имать области, но будут иерее Богу и Христу и воцарятся с ним тысящу лeт.
7 И егда скончается тысяща лeт, разрeшен будет сатана от темницы своея и изыдет прельстити языки сущыя на четырех углeх земли, гога и магога, собрати их на брань, ихже число яко песок морский.
8 И взыдоша на широту земли и обыдоша святых стан и град возлюбленный.
9 И сниде огнь от Бога с небесе и пояде я:
10 и диавол льстяй их ввержен будет в езеро огненно и жупелно, идeже звeрь и лживый пророк: и мучени будут день и нощь во вeки вeков.
11 И видeх престол велик бeл и сeдящаго на нем, егоже от лица бeжа небо и земля, и мeсто не обрeтеся им.
12 И видeх мертвецы малыя и великия стоящя пред Богом, и книги разгнушася: и ина книга отверзеся, яже есть животная: и суд прияша мертвецы от написаных в книгах, по дeлом их.
13 И даде море мертвецы своя, и смерть и ад даста своя мертвецы: и суд прияша по дeлом своим,
14 и смерть и ад ввержена быста в езеро огненное. И се есть вторая смерть.
15 И иже не обрeтеся в книзe животнeй написан, ввержен будет в езеро огненное.
1 И видeх небо ново и землю нову: первое бо небо и земля первая преидоста, и моря нeсть ктому.
2 И аз иоанн видeх град святый, иерусалим нов сходящь от Бога с небесе, приготован яко невeсту украшену мужу своему.
3 И слышах глас велий с небесе, глаголющь: се, скиния Божия с человeки, и вселится с ними: и тии людие его будут, и сам Бог будет с ними Бог их:
4 и отимет Бог всяку слезу от очию их, и смерти не будет ктому: ни плача, ни вопля, ни болeзни не будет ктому, яко первая мимоидоша.
5 И рече сeдяй на престолe: се, нова вся творю. И глагола ми: напиши, яко сия словеса истинна и вeрна суть.
6 И рече ми: совершишася. Аз есмь алфа и омега, начаток и конец: аз жаждущему дам от источника воды животныя туне.
7 Побeждаяй наслeдит вся, и буду ему Бог, и той будет мнe в сына.
8 Страшливым же и невeрным, и скверным и убийцам, и блуд творящым и чары творящым, идоложерцем и всeм лживым, часть им в езерe горящем огнем и жупелом, еже есть смерть вторая.
9 И прииде ко мнe един от седми ангел, имущих седмь фиал исполненых седмих язв послeдних, и рече ко мнe, глаголя: гряди, покажу ти невeсту агнчу жену.
10 И веде мя духом на гору велику и высоку и показа ми град великий, святый иерусалим низходящь с небесе от Бога,
11 имущь славу Божию: и свeтило его подобно камени драгому, яко камени иаспису кристалловидну:
12 имущь стeну велику и высоку, имущь врат дванадесять, и на вратeх ангелов дванадесять и имена написана, яже суть имена дванадесятим колeном сынов Израилевых:
13 от востока врата троя и от сeвера врата троя, от юга врата троя и от запада врата троя.
14 И стeна града имeяше оснований дванадесять, и на них имен дванадесять апостолов агнчих.
15 И глаголяй со мною имeяше трость злату, да измeрит град и врата его и стeны его.
16 И град на четыри углы стоит, и долгота его толика есть, елика же и широта. И измeри град тростию на стадий дванадесять тысящ: долгота и широта и высота его равна суть.
17 И размeри стeну его во сто и четыридесять и четыри лакти, в мeру человeческу, яже есть ангела.
18 И бe создание стeны его иаспис: и град злато чисто, подобен стклу чисту.
19 И основания стeны града всяким драгим камением украшена бяху: основание первое иаспис, второе сапфир, третие халкидон, четвертое смарагд,
20 пятое сардоникс, шестое сардий, седмое хрисолиф, осмое вирилл, девятое топазий, десятое хрисопрас, первоенадесять иакинф, второенадесять амефист.
21 И дванадесять врат дванадесять бисеров: едина каяждо врата бeша от единаго бисера. И стогны града злато чисто, яко сткло пресвeтло.
22 И храма не видeх в нем: Господь бо Бог вседержитель храм ему есть, и агнец.
23 И град не требуя солнца и луны, да свeтят в нем, слава бо Божия просвeти его, и свeтилник его агнец.
24 И языцы спасени во свeтe его пойдут, и царие земстии принесут славу и честь свою в него.
25 И врата его не имут затворитися во дни: нощи бо не будет ту.
26 И принесут славу и честь языков в него:
27 и не имать в него внити всяко скверно, и творяй мерзость и лжу, но токмо написаныя в книгах животных агнца.
1 И показа ми чисту рeку воды животныя, свeтлу яко кристалл, исходящу от престола Божия и агнча.
2 Посредe стогны его и по обаполы рeки древо животное, еже творит плодов дванадесяте, на кийждо мeсяц воздая плод свой: и листвие древа во исцeление языком.
3 И всяка анафема не будет ктому: и престол Божий и агнечь будет в нем, и раби его послужат ему,
4 и узрят лице его, и имя его на челeх их.
5 И нощи не будет тамо, и не потребуют свeта от свeтилника, ни свeта солнечнаго, яко Господь Бог просвeщает я: и воцарятся во вeки вeков.
6 И рече ми: сия словеса вeрна и истинна: и Господь Бог святых пророк посла ангела своего показати рабом своим, имже подобает быти вскорe.
7 Се, гряду скоро: блажен соблюдаяй словеса пророчества книги сея.
8 И аз иоанн видeх сия и слышах. И егда слышах и видeх, падох поклонитися на ногу ангела показующаго ми сие:
9 и глагола ми: виждь, ни: клеврет бо твой есмь и братии твоея пророков и соблюдающих словеса книги сея: Богу поклонися.
10 И глагола ми: не запечатлeй словес пророчествия книги сея: яко время близ есть.
11 Обидяй да обидит еще, и скверный да осквернится еще: и праведный правду да творит еще: и святый да святится еще.
12 И се, гряду скоро, и мзда моя со мною, воздати коемуждо по дeлом его.
13 Аз есмь алфа и омега, начаток и конец, первый и послeдний.
14 Блажени творящии заповeди его, да будет область им на древо животное, и враты внидут во град.
15 Внe же пси и чародeе, и любодeе и убийцы, и идолослужителе и всяк любяй и творяй лжу.
16 Аз Иисус послах ангела моего засвидeтелствовати вам сия в церквах. Аз есмь корень и род давидов, и звeзда утренняя (свeтлая) и денница.
17 И дух и невeста глаголют: прииди, и слышяй да глаголет: прииди. И жаждяй да приидет, и хотяй да приимет воду животную туне.
18 Сосвидeтелствую бо всякому слышащему словеса пророчества книги сея: аще кто приложит к сим, наложит Бог на него язв написанных в книзe сей:
19 и аще кто отимет от словес книги пророчествия сего, отимет Бог часть его от книги животныя, и от града святаго, и написанных в книзe сей.
20 Глаголет свидeтелствуяй сия: ей, гряду скоро: аминь. Ей, гряди Господи Иисусе.
21 Благодать Господа нашего Иисуса Христа со всeми вами. Аминь.